列王紀下卷 2 - 現代台語譯本漢字版

以利亞受接上天

¹ 上主啲欲用捲螺仔風接以利亞上天的時，以利亞及以利沙做夥離開吉甲。

² 以利亞對以利沙講：「上主差我去伯特利，你著留𫢶遮。」 以利沙講：「我指永活的上主及你的性命咒誓，我一定無欲離開你。」𪜶兩個人就做夥落去伯特利。

³ 伯特利許個先知的學生出來見以利沙，對伊講：「上主今仔日欲接你的老師離開你去，你知無？」 伊講：「我知，請恁恬恬。」

⁴ 以利亞給伊講：「以利沙，上主差我去耶利哥，你著留𫢶遮。」 以利沙講：「我指永活的上主及你的性命咒誓，我一定無欲離開你。」𪜶就到耶利哥。

⁵ 耶利哥許個先知的學生來以利沙遐，對伊講：「上主今仔日欲接你的老師離開你，你知無？」 伊講：「我知，請恁恬恬。」

⁶ 以利亞對以利沙講：「上主差我去約旦河，你著留𫢶遮。」 以利沙講：「我指永活的上主及你的性命咒誓，我一定無欲離開你。」𪜶兩個人就做夥去。

⁷ 有五十個先知的學生隨𪜶去，遠遠徛佇𪜶的對面；𪜶兩人徛佇約旦河邊。

⁸ 以利亞將伊的外衫捲起來，拍河水，水就分雙旁；𪜶兩人行焦地過去。

⁹ 過去了，以利亞對以利沙講：「我受接離開你以前，你愛我為著你做什麼？你著給我講。」 以利沙講：「求你將感動你的神加倍互我。」

¹⁰ 以利亞講：「你所求的真困難。毋拘，我受接離開你的時，你若看著我，就會得著；若無，就得𣍐著。」

¹¹ 𪜶那行那講的時，忽然有火戰車火馬，將𪜶兩人隔開；以利亞就坐捲螺仔風受接上天。

¹² 以利沙看著，就喝講：「師父啊，師父啊！以色列的戰車及馬兵啊！」後來以利沙無閣看著以利亞；就將家己的衫拆做兩旁。

¹³ 伊拾以利亞加落落來的外衫，倒轉去徛佇約旦河邊，

¹⁴ 用彼領外衫拍河水，講：「上主 — 以利亞的上帝佇叨位？」拍水了後，水就分做兩旁，以利沙就過去。

¹⁵ 以利沙對面許個耶利哥先知的學生看著，就講：「感動以利亞的神臨在佇以利沙啦！」𪜶就來迎接伊，仆落佇伊的面前。

¹⁶ 𪜶對以利沙講：「你的僕人遮有五十個勇士；請你允准𪜶去尋你的老師；可能上主的神帶伊去，給伊㧒佇某一個山，抑是某一個山谷。」伊講：「毋免差人去。」

¹⁷ 𪜶一直給以利沙姑情，以利沙互𪜶逼甲真為難，就講：「恁通差許個勇士去。」𪜶就差五十人去，尋三日，尋攏無。

¹⁸ 以利沙佇耶利哥聽候；𪜶倒來了後，伊給𪜶講：「我豈無給恁講，毋免去尋？」

以利沙行的神跡

¹⁹ 耶利哥城的人對以利沙講：「先生，照你所知此個城的地勢真好；毋拘水質真僫，土地𣍐生產。」

²⁰ 以利沙講：「恁用一塊新的碗，貯鹽提來互我。」𪜶就提來互伊。

²¹ 伊去到水泉遐，將鹽倒佇水裡，講：「上主按呢講：『我醫好此個水；此個水𣍐閣互人死，嘛𣍐閣互地無生產。』」

²² 彼個水就變做好水，到今仔日；抵照以利沙所講的話。

²³ 以利沙對遐上去伯特利，佇路裡啲行的時，有少年人對城內出來，給伊恥笑，講：「禿頭的，閃走！禿頭的，閃走！」

²⁴ 伊越頭給𪜶看，奉上主的名咒詛𪜶，就有兩隻熊母對樹林出來，拆裂𪜶中間四十二個少年人。

²⁵ 伊對遐上迦密山；閣對遐倒去撒馬利亞。