列王紀下卷 19 - 現代台語譯本漢字版

國王請問以賽亞

¹ 希西家王一下聽著𪜶的報告，就拆裂伊的衫，穿麻衫，入去上主的殿。

² 伊派宮廷總管以利亞敬、書記舍伯那，及資深的祭司，攏穿麻衫，去見亞摩斯的子先知以賽亞。

³ 𪜶給以賽亞講：「希西家按呢講：『今仔日是患難的日，是受責罰凌辱的日，親像有囝仔欲出世，毋拘無力給生出來。

⁴ 亞述王有派伊的部下總司令來褻瀆永活的上帝，豈採上主 — 你的上帝有聽著，會處罰講諸個話的人。所以，著替留佇遮的人祈禱。』」

⁵ 希西家王的大臣來見以賽亞的時，

⁶ 以賽亞對𪜶講：「恁著按呢給恁的主人講：『上主按呢講：毋通因為恁所聽著亞述王的部下對我的誹謗來驚惶。

⁷ 看咧，我欲擾亂伊的心，互伊聽著風聲，倒轉去家己的國家；我欲互伊佇遐互人刣死。』」

亞述王閣來恐嚇

⁸ 總司令聽著亞述王已經離開拉吉去攻擊立拿，就出發去立拿及王會合。

⁹ 亞述王聽見衣索匹亞王特哈加欲來攻擊𪜶，就派使者去見希西家，吩咐𪜶

¹⁰ 對猶大王希西家講：「毋通互恁所倚靠的上帝騙去，講：耶路撒冷𣍐陷落佇亞述王的手頭。

¹¹ 恁一定有聽著亞述諸王對列國所做的代誌；𪜶給列國攏剿滅。恁豈有法度避免？

¹² 我的祖先毀滅的國家，歌散、哈蘭、利色，以及住佇提拉撒的伯‧伊甸人，𪜶的神明豈有解救𪜶？

¹³ 哈馬的王、亞珥拔的王、西法瓦音城的王、希拿及以瓦的王佇叨位？」

¹⁴ 希西家對使者的手接著批，讀了後，就上去上主的聖殿，佇上主的面前將批搋開。

¹⁵ 希西家向上主祈禱講：「坐佇天使基路伯頂面的上主 — 以色列的上帝啊，只有你是地上萬國的上帝。你創造天及地。

¹⁶ 上主啊，求你俯耳孔聽，開你的目睭看。求你聽西拿基立差使者來講一切褻瀆你活活上帝的話。

¹⁷ 上主啊，亞述諸王確實有互列國及𪜶的土地攏荒廢，

¹⁸ 給𪜶的神明攏㧒互火燒滅，其實許個毋是神，不過是人的手用柴用石造的。

¹⁹ 今，上主 — 阮的上帝啊，求你救阮脫離伊的手，互地上萬國攏會知只有你上主是上帝。」

以賽亞互王的信息

²⁰ 亞摩斯的子以賽亞差人去見希西家，講：「上主 — 以色列的上帝按呢講：『你因為亞述王西拿基立的事對我祈禱，我有聽見。

²¹ 關係西拿基立，我上主按呢講： 在室女錫安看輕你，恥笑你； 少女耶路撒冷對你搖頭。

²² 你啲侮辱啥人，褻瀆啥人？ 你啲對啥人大聲？ 你啲對啥人驕傲，給伊看毋上目？ 其實你是啲無視我以色列神聖的上帝！

²³ 你有通過你的使者侮慢主。 你講：我駛真多戰車𬦰上高山， 去到黎巴嫩上高的山尖。 我佇遐剉上高的柏香樹， 剉上好的松樹。 我𬦰到上高的山尖， 進入上茂盛的樹林。

²⁴ 我佇外邦挖井，飲𪜶的水。 我嘛用腳蹋埃及所有的河流， 蹋甲河流攏焦去。

²⁵ 「『恁豈毋曾聽見？ 真早我做此個計劃， 古早就決定， 今已經實現， 就是你互堅固的城堡攏倒壞， 變做荒埔石堆。

²⁶ 遐的住民攏無力； 𪜶驚惶，見笑。 𪜶親像野地的草， 幼軟的芛，厝尾頂的草， 猶未大欉就焦去。

²⁷ 「『你住叨位，你出，你入， 你對我的受氣，我攏知。

²⁸ 因為你有對我發受氣， 我有聽著你自高的話； 我欲用鉤仔鉤你的鼻， 用馬咬韁掛佇你的嘴， 互你對來彼條路倒轉去。』

²⁹ 「希西家，這欲互你做記號：今年，明年，恁攏會食野生的物；第三年，恁會撒種，收成，栽種葡萄，食所結的果子。

³⁰ 猶大家逃脫所賰的子民會親像植物，下面釘根，頂面結果子。

³¹ 對耶路撒冷欲有賰落來的子民出來，對錫安山欲有人逃脫出來。上主 — 萬軍的統帥的熱誠一定會成全此個事。

³² 「所以，關係亞述王，上主有按呢講：『伊𣍐進入此個城，連一支箭嘛𣍐射入來。伊𣍐夯盾牌倚近城，嘛𣍐起土堆攻城。

³³ 伊對叨一條路來，嘛會對彼條路轉去；伊𣍐進入此個城。上主按呢講。

³⁴ 我為著我的緣故，嘛為著我的僕人大闢的緣故，欲保護解救此個城。』」

³⁵ 彼暝，上主的天使去亞述軍營，刣死十八萬五千個人。隔早起，人起來，發見逐所在攏是身屍。

³⁶ 亞述王西拿基立就撤營，倒轉去尼尼微，住佇遐。

³⁷ 有一日，伊佇尼斯洛的廟啲拜伊的神明的時，伊的子亞得米勒及沙利色用刀給伊刣死，然後逃走去亞拉臘的地；伊另外一個子以撒‧哈頓繼承伊作王。