列王紀下卷 18 - 現代台語譯本漢字版

猶大王希西家

¹ 當以拉的子以色列王何細亞第三年，亞哈斯的子希西家開始做猶大王。

² 伊坐位的時二十五歲，佇耶路撒冷作王二十九年；伊的老母叫做亞比雅，是撒迦利亞的查某子。

³ 希西家做上主看做好的事，照伊的祖先大闢一切的所做。

⁴ 伊廢除山頭壇，毀壞石柱，剉亞舍拉的柱像，拍碎摩西造的銅蛇；因為彼時以色列人猶對銅蛇燒香，叫伊做尼忽士但。

⁵ 希西家倚靠上主 — 以色列的上帝；佇伊以前及以後的猶大列王，無人會當及伊比。

⁶ 希西家對上主忠誠，無離開伊，執守上主所命令摩西的誡命。

⁷ 上主及伊同在，伊無論去叨位，所做的攏順利；伊背叛亞述王，無閣服事伊。

⁸ 伊拍敗非利士人，直到迦薩及四圍的地區，對干焦有守望台的庄社到有堡壘的城。

⁹ 希西家王第四年，就是以拉的子以色列王何細亞第七年，亞述王撒縵以色上來圍攻撒馬利亞。

¹⁰ 到第三年年尾，就是希西家第六年，以色列王何細亞第九年，撒馬利亞受攻破。

¹¹ 亞述王將以色列人掠去亞述，互𪜶住佇哈臘、歌散地區的哈博河邊，以及米底亞人的城。

¹² 因為𪜶毋聽趁上主 — 𪜶的上帝的話，違背伊的約；上主的僕人摩西所命令𪜶的，𪜶毋聽趁，毋遵守。

亞述威脅耶路撒冷

¹³ 希西家王第十四年，亞述王西拿基立上來攻擊猶大所有堅固的城，閣給𪜶佔領。

¹⁴ 猶大王希西家派人去拉吉見亞述王，講：「我有得罪你，求你撤軍離開我；你無論要求什麼，我攏答應。」對按呢，亞述王罰猶大王希西家銀一萬公斤，金一千公斤。

¹⁵ 希西家就將上主聖殿及王宮的府庫所有的銀攏互伊。

¹⁶ 希西家閣將上主聖殿門頂的金及伊家己包佇柱頂的金剝落來，交互亞述王。

¹⁷ 亞述王對拉吉派元帥、將軍，及總司令，帶大軍去耶路撒冷 希西家王遐。𪜶上來到耶路撒冷，徛佇上池的水溝邊，佇漂布場的大路遐。

¹⁸ 𪜶大聲叫王，就有希勒家的子宮廷總管以利亞敬、書記舍伯那，以及亞薩的子史官約亞，出來見𪜶。

¹⁹ 總司令對𪜶講：「去給希西家講，亞述大王按呢講：『你啲靠勢什麼？

²⁰ 你想講有策略及軍力，其實是膨風的話。到底你是靠啥人，竟然敢反叛我？

²¹ 你所倚靠的埃及是一支斷去的蘆竹仔柺；人若靠伊，手會互伊鑿入去。所有倚靠埃及王法老的人攏會按呢。

²² 恁若對我講：阮倚靠上主 — 阮的上帝；希西家豈毋是有廢除上帝的山頭壇及祭壇，閣給猶大及耶路撒冷的人講：恁一定著佇耶路撒冷此個祭壇敬拜？』

²³ 今來，來及我的主人亞述王相輸。我互恁兩千隻馬，恁豈有法度尋夠額的人通騎？

²⁴ 若無法度，恁哪會當拍敗我的主上細的一個部下？恁豈欲閣倚靠埃及的戰車及馬兵？

²⁵ 現在，我來攻擊毀滅此個所在，豈毋是上主的旨意？上主親身給我講：『上去攻取此塊土地，給伊毀滅。』」

²⁶ 希勒家的子以利亞敬、舍伯那，及約亞對總司令講：「請用亞蘭話對你的僕人講，阮聽有。請毋通用希伯來話講，驚了互城牆頂的人民聽著。」

²⁷ 總司令對𪜶講：「恁想講阮主人差我講諸個話，只有欲互恁及恁的國王聽是無？毋是，我嘛欲講互城牆頂的人聽。𪜶及恁仝款著食家己的糞，飲家己的尿。」

²⁸ 總司令閣徛起來大聲用希伯來話喝講：「著聽亞述大王的話。

²⁹ 王按呢講：『毋通互希西家騙去，因為伊𣍐當救恁脫離我的手。

³⁰ 伊叫恁信靠上主，講：上主一定會救咱；此個城𣍐陷落佇亞述王的手。』

³¹ 毋通聽希西家的話。亞述王按呢講：『及我講和，出來投降。按呢，恁逐個人就會當食家己種的葡萄及無花果，飲恁家己的井水，

³² 聽候我導恁到一個所在，親像恁的土地，有五穀及新酒，有米糧及葡萄園，有橄欖油及蜜，互恁活長歲壽。毋通互希西家騙去，伊講：上主一定會救咱。恁毋通聽伊的話。

³³ 萬國的眾神明，叨一個曾救伊家己的國脫離亞述王的手？

³⁴ 哈馬及亞珥拔的神明佇叨位？西法瓦音、希拿、以瓦的神明佇叨位？𪜶豈有解救撒馬利亞脫離我的手？

³⁵ 諸個國家的神明有叨一個曾對我的手救出伊家己的國家？按呢，上主哪會當救耶路撒冷脫離我的手頭？』」

³⁶ 毋拘人民攏靜靜，無應半句話，因為希西家王有給𪜶吩咐：「毋通應伊！」

³⁷ 彼時，希勒家的子宮廷總管以利亞敬、書記舍伯那，及亞薩的子史官約亞，攏拆裂𪜶的衫，對希西家報告亞述的總司令給𪜶講的話。