列王紀下卷 16 - 現代台語譯本漢字版

猶大王亞哈斯

¹ 利瑪利的子以色列王比加第十七年，約坦的子亞哈斯開始做猶大王。

² 亞哈斯坐位的時二十歲，佇耶路撒冷作王十六年；伊無親像伊的祖先大闢做上主 — 伊的上帝看做好的事，

³ 顛倒去行以色列許個王的路，甚至燒伊家己的子獻做祭，學上主佇𪜶面前趕出的列國所做可惡的事；

⁴ 閣佇山頭壇、逐個山崙仔、逐欉青翠的樹下面獻祭燒香。

⁵ 彼時，敘利亞王利汛及利瑪利的子以色列王比加上來攻擊耶路撒冷，圍困亞哈斯，毋拘拍𣍐贏伊。

⁶ 當時敘利亞王利汛收回以拉他歸屬敘利亞，趕猶大人出以拉他。以東人就來以拉他徛起，到今仔日。

⁷ 亞哈斯派使者去見亞述王提革拉‧比列色，講：「我是你的僕人，你的子。敘利亞王及以色列王攻擊我，請來救我脫離𪜶的手。」

⁸ 亞哈斯將上主殿內及王宮府庫所有的金銀，做禮物送互亞述王。

⁹ 亞述王答應，就去攻打大馬士革，攻取此個城，掠許個住民去吉珥，閣刣死利汛。

¹⁰ 亞哈斯王去大馬士革欲迎接亞述王提革拉‧比列色；伊佇大馬士革看著一座壇。亞哈斯王將彼個壇的款式，詳細的圖樣及作法，寄互祭司烏利亞。

¹¹ 祭司烏利亞就佇亞哈斯王猶未對大馬士革轉來以前，照亞哈斯王對大馬士革寄來的圖樣起一座壇。

¹² 王對大馬士革倒來，看著壇，行倚去，佇彼頂面獻祭。

¹³ 伊獻燒化祭、素祭，及奠酒祭，將平安祭的血灑佇壇頂。

¹⁴ 伊閣將上主面前的銅壇，就是佇新的壇及聖殿中間的銅壇，對殿的頭前徙去下佇新的壇的北旁。

¹⁵ 亞哈斯王命令祭司烏利亞講：「早起時的燒化祭、下昏時的素祭、王的燒化祭及素祭、國內人民的燒化祭、素祭，及奠酒祭，攏著佇大壇的頂面獻；燒化祭及其他牲禮的血著灑佇大壇的頂面。銅壇我欲做求問的路用。」

¹⁶ 祭司烏利亞就照亞哈斯王的命令去做。

¹⁷ 亞哈斯王拆許個盆座的堵枋，將盆對許個盆座徙落來；閣將銅海對十二隻銅牛頂面搬落來，下佇鋪石板的地面。

¹⁸ 伊閣因為亞述王的緣故，將聖殿安歇日的走廊，及王專用入來聖殿的外門，攏拆掉。

¹⁹ 亞哈斯其他的所做攏記載佇猶大列王史。

²⁰ 亞哈斯轉去伊的列祖遐，安葬佇大闢城，伊的祖先的墓。伊的子希西家續接伊作王。