列王紀下卷 15 - 現代台語譯本漢字版

猶大王烏西亞

¹ 以色列王耶羅波安二世第二十七年，亞瑪謝的子烏西亞開始做猶大王。

² 伊坐位的時十六歲，佇耶路撒冷作王五十二年；伊的老母叫做耶可利雅，是耶路撒冷人。

³ 烏西亞做上主看做好的事，照伊的老父亞瑪謝的所做去做。

⁴ 毋拘山頭壇猶未廢除，人民猶原佇遐獻祭燒香。

⁵ 上主降災禍，互王一生致著嚴重的皮膚病；伊就住佇受隔離的厝。伊的子約坦管理王家的事，治理國政。

⁶ 烏西亞其他的事蹟及伊的所做攏記佇猶大列王史。

⁷ 烏西亞轉去伊的列祖遐，人給伊安葬佇大闢城，伊的祖先的墓。伊的子約坦續接伊作王。

以色列王撒迦利亞

⁸ 猶大王烏西亞第三十八年，耶羅波安二世的子撒迦利亞佇撒馬利亞作王，統治以色列六月日久。

⁹ 伊做上主看做歹的事，照伊的祖先的所做，無離開尼八的子耶羅波安的路，互以色列人陷落罪。

¹⁰ 雅比的子沙龍背叛撒迦利亞，佇人民的面前給伊刣死，篡伊的位。

¹¹ 撒迦利亞其他的事蹟攏記載佇以色列列王史。

¹² 上主曾對耶戶講：「你的子孫會坐以色列的王位到第四代。」此個話就按呢實現。

以色列王沙龍

¹³ 猶大王烏西亞第三十九年，雅比的子沙龍佇撒馬利亞做以色列王一月日久。

¹⁴ 迦底的子米拿現對得撒上去撒馬利亞，刣死雅比的子沙龍，篡伊的位。

¹⁵ 沙龍其他的事蹟，及伊背叛的陰謀，攏記載佇以色列列王史。

¹⁶ 彼時，米拿現對得撒去攻打提斐薩，及城內的住民以及四圍的地區；因為城內的人毋肯投降，米拿現就給𪜶剿滅，甚至破開所有有身的婦仁人的腹肚。

以色列王米拿現

¹⁷ 猶大王烏西亞第三十九年，迦底的子米拿現作王，佇撒馬利亞統治以色列十年。

¹⁸ 伊做上主看做歹的事，一世人無離開尼八的子耶羅波安的路，互以色列人陷落罪。

¹⁹ 亞述王提革拉‧比列色來侵犯以色列。米拿現送銀三萬四千公斤互亞述王，求伊幫贊堅固王權。

²⁰ 米拿現強迫以色列的好額人負擔諸個銀，逐個人出五百七十公克，送互亞述王。亞述王就倒去伊本國。

²¹ 米拿現其他的事蹟及伊的所做，攏記載佇以色列列王史。

²² 米拿現轉去伊的列祖遐，伊的子比加轄續接伊作王。

以色列王比加轄

²³ 猶大王烏西亞第五十年，米拿現的子比加轄佇撒馬利亞作王，統治以色列兩年。

²⁴ 伊做上主看做歹的事，無離開尼八的子耶羅波安的路，互以色列人陷落罪。

²⁵ 伊的侍衛官，利瑪利的子比加背叛，佇撒馬利亞王宮的堡壘給伊刣死，篡伊的位；共謀的人有亞珥歌伯、亞利耶，以及五十個基列人。

²⁶ 比加轄其他的事蹟及伊的所做，攏記載佇以色列列王史。

以色列王比加

²⁷ 猶大王烏西亞第五十二年，利瑪利的子比加佇撒馬利亞作王，統治以色列二十年。

²⁸ 伊做上主看做歹的事，無離開尼八的子耶羅波安的路，互以色列人陷落罪。

²⁹ 比加做以色列王的時，亞述王提革拉‧比列色攻取以雲、亞伯‧伯‧瑪迦、亞挪、基低斯，及夏瑣諸個城，基列、加利利，以及拿弗他利全地區；閣將許個住民攏掠去亞述。

³⁰ 烏西亞的子約坦第二十年，以拉的子何細亞背叛利瑪利的子比加，給伊刣死，篡伊的位。

³¹ 比加其他的事蹟及伊的所做，攏記載佇以色列列王史。

猶大王約坦

³² 利瑪利的子以色列王比加第二年，烏西亞的子約坦開始做猶大王。

³³ 伊坐位的時二十五歲，佇耶路撒冷作王十六年；伊的老母叫做耶露莎，是撒督的查某子。

³⁴ 約坦做上主看做好的事，照伊的老父烏西亞的所做去做。

³⁵ 毋拘山頭壇猶未廢除，人民猶原佇遐獻祭燒香。約坦起上主聖殿的上門。

³⁶ 約坦其他的事蹟及伊的所做，攏記載佇猶大列王史。

³⁷ 彼時，上主開始差敘利亞王利汛及利瑪利的子以色列王比加去攻擊猶大。

³⁸ 約坦轉去伊的列祖遐，安葬佇伊的祖大闢的城，伊的祖先的墓。伊的子亞哈斯續接伊作王。