列王紀下卷 14 - 現代台語譯本漢字版

猶大王亞瑪謝

¹ 約哈斯的子以色列王約華施第二年，約阿施的子亞瑪謝開始做猶大王。

² 伊坐位的時二十五歲，佇耶路撒冷作王二十九年；伊的老母叫做約耶但，是耶路撒冷人。

³ 亞瑪謝做上主看做好的事，毋拘無親像伊的祖先大闢；伊猶原照伊的老父約阿施的所做去做，

⁴ 無拆毀山頭壇；人民繼續佇遐獻祭燒香。

⁵ 亞瑪謝的王權一下堅固，就將刣死伊老父猶大王許個人臣處死。

⁶ 毋拘伊無刣死許個人臣的子兒，是照摩西律法的冊所記載上主的命令：毋通因為子兒的所做給老父處死，嘛毋通因為老父的所做給子兒處死；逐個人著因為家己的罪死。

⁷ 亞瑪謝佇鹽的山谷刣死以東人一萬，閣攻取西拉，給伊改名做約帖，到今仔日。

⁸ 彼時，亞瑪謝派使者去見耶戶的孫，約哈斯的子，以色列王約華施，講：「來，咱來戰場拼輸贏。」

⁹ 以色列王約華施派使者去給猶大王亞瑪謝講：「黎巴嫩的草刺差使者去見黎巴嫩的柏香樹，講：『你的查某子互我的子做某！』後來黎巴嫩有一隻野獸經過，給草刺踐踏。

¹⁰ 你已經刣贏以東，心就驕傲聳勢。你𫢶恁兜享受你的榮光就好，哪欲惹災禍，互你本身及猶大國做夥滅亡？」

¹¹ 毋拘亞瑪謝聽𣍐落去。以色列王約華施就上來，佇猶大的伯‧示麥及猶大王亞瑪謝交戰。

¹² 猶大互以色列拍敗，逐個人走倒去𪜶兜。

¹³ 以色列王約華施佇遐掠著猶大王亞瑪謝，閣來拆毀耶路撒冷的城牆，對以法蓮門到角門，約兩百公尺。

¹⁴ 約華施將上主聖殿及王宮的府庫所有的金銀及器具攏提去，閣掠人做人質，才倒去撒馬利亞。

¹⁵ 約華施其他的事蹟、伊的所做及成就，以及及猶大王亞瑪謝交戰的事，攏記載佇以色列列王史。

¹⁶ 約華施轉去伊的列祖遐，及以色列諸個王做夥安葬佇撒馬利亞；伊的子耶羅波安二世續接伊作王。

猶大王亞瑪謝死

¹⁷ 約哈斯的子以色列王約華施死了，約阿施的子猶大王亞瑪謝閣再活十五年。

¹⁸ 亞瑪謝其他的事蹟，攏記載佇猶大列王史。

¹⁹ 佇耶路撒冷有人計謀欲害亞瑪謝，伊就逃走去拉吉。𪜶派人趇到拉吉，佇遐給伊刣死。

²⁰ 人用馬將伊的屍體載倒來耶路撒冷，將伊安葬佇大闢城，列祖的墓地。

²¹ 猶大的人民設立烏西亞續接伊的老父亞瑪謝作王，彼時伊十六歲。

²² 亞瑪謝王轉去伊的列祖遐了後，烏西亞收回以拉他歸屬猶大國，閣給伊修建。

以色列王耶羅波安二世

²³ 約阿施的子猶大王亞瑪謝第十五年，約華施的子耶羅波安二世佇撒馬利亞做以色列王；伊作王共四十一年。

²⁴ 伊做上主看做歹的事，無離開尼八的子耶羅波安的路，互以色列人陷落罪。

²⁵ 伊收回以色列邊界的地，對哈馬隘口到死海，抵抵照上主 — 以色列的上帝通過伊的僕人，迦特‧希弗人亞米太的子先知約拿所講的話。

²⁶ 上主看見以色列人，無論是自由的抑是無自由的，攏受極大的苦難，嘛無人幫贊𪜶。

²⁷ 上主決意無欲對天下擦消以色列的名，就通過約華施的子耶羅波安二世解救𪜶。

²⁸ 耶羅波安二世其他的事蹟、伊的所做及成就，以及伊按怎交戰，按怎將以前屬猶大的大馬士革及哈馬收回歸屬以色列，攏記載佇以色列列王史。

²⁹ 耶羅波安二世轉去伊的祖先以色列許個王遐，伊的子撒迦利亞續接伊作王。