列王紀下卷 13 - 現代台語譯本漢字版

以色列王約哈斯

¹ 猶大王亞哈謝的子約阿施作王第二十三年，耶戶的子約哈斯佇撒馬利亞作王，統治以色列十七年。

² 伊做上主看做歹的事，隨尼八的子耶羅波安的所做，互以色列人陷落罪，攏無停止。

³ 上主就對以色列人發受氣，幾若遍將𪜶交佇敘利亞王哈薛及伊的子便‧哈達的手。

⁴ 約哈斯懇求上主，上主聽伊的祈禱，因為伊有看見以色列人受敘利亞王制壓。

⁵ 上主賞賜以色列一個拯救者，救𪜶脫離敘利亞人的手。以色列人就猶原平安住佇𪜶家己的厝。

⁶ 毋拘𪜶無離開耶羅波安的家所行的路，互以色列人陷落罪，繼續犯罪；佇撒馬利亞，亞舍拉的柱像猶留啲。

⁷ 敘利亞王拍敗以色列，踐踏𪜶親像啲踐踏五穀場的土沙。敘利亞王只有允准約哈斯留馬兵五十、戰車十台，及步兵一萬。

⁸ 約哈斯其他的事蹟、伊所做的事及成就，攏記載佇以色列列王史。

⁹ 約哈斯轉去伊的列祖遐了後，安葬佇撒馬利亞；伊的子約華施續接伊作王。

以色列王約華施

¹⁰ 猶大王約阿施三十七年，約哈斯的子約華施佇撒馬利亞作王，做以色列王十六年。

¹¹ 伊做上主看做歹的事，無離開尼八的子耶羅波安的路，互以色列人陷落罪，繼續犯罪。

¹² 約華施其他的事蹟、伊的所做，以及伊及猶大王亞瑪謝交戰勇猛的事，攏記載佇以色列列王史。

¹³ 約華施轉去伊的列祖遐，及以色列諸個王做夥安葬佇撒馬利亞。伊的子耶羅波安二世坐王位。

以利沙死

¹⁴ 以利沙犯著致命的病。以色列王約華施落來看伊，仆佇伊的面啼哭，講：「師父啊，師父啊！以色列的戰車及馬兵啊！」

¹⁵ 以利沙對伊講：「你去攑弓箭。」伊就去攑弓及箭來。

¹⁶ 以利沙閣給以色列王講：「你準備開弓。」伊就準備開弓。以利沙給王的手按啲，講：

¹⁷ 「你拍開東旁的窗仔。」伊就拍開。以利沙講：「射箭！」伊就射箭。以利沙講：「這是上主勝利的箭，刣贏敘利亞人的箭。你會佇亞弗攻擊敘利亞人，徹底給𪜶消滅。」

¹⁸ 以利沙閣講：「箭攑起來。」伊就給箭攑起來。以利沙閣給王講：「拍土腳。」王拍三遍就停啲。

¹⁹ 上帝重用的人對伊受氣講：「你應該著拍五六遍，才會當拍敗敘利亞，徹底給伊消滅。今，你只有會當拍敗敘利亞人三遍。」

²⁰ 以利沙死，人給伊埋葬。 逐年春天，摩押人會來侵犯以色列。

²¹ 有一遍，有人抵仔啲埋葬死人，忽然看著歸陣摩押人，就將死人㧒佇以利沙的墓內，趕緊逃走。死人一下磕著以利沙的骨頭，就閣活，徛起來。

以色列及敘利亞交戰

²² 約華施的老父約哈斯在位的時，敘利亞王哈薛常常制壓以色列人。

²³ 毋拘上主因為伊及亞伯拉罕、以撒、雅各所立的約，猶原施恩互以色列，憐憫𪜶，眷顧𪜶，毋甘給𪜶剿滅，毋甘給𪜶放拺。

²⁴ 敘利亞王哈薛死，伊的子便‧哈達續接伊作王。

²⁵ 以前哈薛及約哈斯交戰，對伊的手攻取幾若個城；約哈斯的子約華施三遍拍敗哈薛的子便‧哈達，收回許個城。