列王紀下卷 11 - 現代台語譯本漢字版

亞她利雅篡位

¹ 亞哈謝的老母亞她利雅一下知伊的子受殺害，就起來剿滅猶大王室所有的後代。

² 毋拘約蘭王的查某子，亞哈謝的小妹約示芭，將亞哈謝的子約阿施，對許個受刣的王子中偷抱出來，將伊及伊的奶母藏佇聖殿的睏房，無互亞她利雅知，互約阿施免受殺害。

³ 亞她利雅治理猶大國的時，約阿施及伊的奶母做夥匿佇上主的殿六年久。

⁴ 到第七年，耶何耶大派人召集迦利人及所有護衛兵的官長，導𪜶入上主的聖殿來到伊遐；伊及𪜶立約，互𪜶佇上主的殿咒誓，閣互𪜶看王的子。

⁵ 閣吩咐𪜶講：「恁著按呢做：恁佇安歇日值班的時，著三分一顧守王宮，

⁶ 三分一顧守蘇珥門，三分一顧守護衛兵院的後門；按呢輪流顧守王宮。

⁷ 恁佇安歇日無值班的兩隊人員著顧守上主的殿，保護王。

⁸ 恁逐個人著帶軍器，佇王的四圍保護；若有人強欲入來，著互伊死；王無論佇叨位，恁攏著跟隨保護伊。」

⁹ 所有的官長攏照祭司耶何耶大的命令去做；逐個官長攏帶𪜶的部下，無論安歇日有值班抑是無值班，攏來祭司耶何耶大遐。

¹⁰ 祭司就將囥佇上主殿內大闢王的槍及盾牌交互許個官長。

¹¹ 護衛兵手攑武器，佇祭壇及聖殿遐，對殿的南旁到北旁，徛佇王的四圍保護。

¹² 祭司導約阿施出來，給伊戴王冠，將有關王權的約書交互伊，給伊抹油，設立伊作王；𪜶就拍噗仔，喝講：「願王萬歲！」

¹³ 亞她利雅聽著護衛兵及人民的聲，就去聚集佇上主聖殿的人民遐，

¹⁴ 看著王照規例徛佇聖殿入口的柱邊，官長及歕喇叭的人徛佇王的邊仔，國內的人民攏歡喜，歕喇叭。亞她利雅就拆裂伊的衫，喝講：「造反啦，造反啦！」

¹⁵ 因為祭司耶何耶大毋愛有人佇上主的聖殿互人刣死，就命令管軍隊的官長，講：「給伊對隊伍的中間趕出去；欲隨伊的，著互伊死。」

¹⁶ 𪜶閃開雙旁互亞她利雅過去；伊到進入王宮的馬門，就佇遐互人刣死。

耶何耶大的改革

¹⁷ 耶何耶大互王以及人民及上主立約，做上主的子民；閣互王及人民立約。

¹⁸ 對按呢，全國的人民攏給巴力的廟拆毀，拍碎祭壇及偶像，閣佇壇前拍死巴力的祭司馬坦。 耶何耶大派官員顧守上主的聖殿。

¹⁹ 伊及官長、迦利人、護衛兵，以及全國人民，請王對上主的聖殿落來，對護衛兵院的門進入王宮。約阿施就坐王位。

²⁰ 全國人民攏歡喜快樂，全城攏平靜；亞她利雅已經佇王宮互人刣死。

²¹ 約阿施坐位的時才七歲。