列王紀下卷 10 - 現代台語譯本漢字版

亞哈的後代受刣死

¹ 亞哈有七十個子孫佇撒馬利亞。耶戶寫批去撒馬利亞，互遐的首領、長老，及亞哈子孫的監護人，

² 講：「既然恁主人的子孫及恁做夥，恁閣有戰車、戰馬、堅固的城，及武器，此張批送到恁遐的時，

³ 恁著佇恁主人子孫的中間，揀一個上好上適合的，互伊續接伊的老父作王，恁嘛通為著恁主人的家交戰。」

⁴ 𪜶非常驚，講：「連約何蘭及亞哈謝兩個王都𣍐當對抗伊，咱哪有法度？」

⁵ 王宮總管、市長，及長老，以及王子孫的監護人，派人去見耶戶，講：「阮是你的僕人，你給阮講的，阮攏欲照按呢做。阮無欲設立人作王；請照你的意思去做。」

⁶ 耶戶閣寫批互𪜶，講：「恁若歸順我，欲聽趁我的話，著取恁主人子孫的頭殼，明仔載此個時帶來耶斯列互我。」彼時，王的子孫七十人攏住佇城內給𪜶養育的尊貴的人𪜶兜。

⁷ 耶戶的批一下到，𪜶就將王的子孫七十人全部刣死，將許個頭殼下佇籃仔內，送去耶斯列 耶戶遐。

⁸ 有一個使者來給耶戶講：「𪜶帶王許個子孫的頭殼來。」耶戶講：「將𪜶疊做兩堆，下佇城門口，到明仔早起。」

⁹ 隔早起，耶戶出來，徛啲，對眾人民講：「恁攏無罪。是我反叛約何蘭王，給伊刣死，毋拘諸個人是啥人給𪜶刣死的？

¹⁰ 對按呢通知，上主有關亞哈家所講的話，無一句落空；因為上主通過伊的僕人以利亞講的話，攏有實現。」

¹¹ 屬亞哈家佇耶斯列賰的人，以及伊的人臣、親密的朋友、祭司，耶戶攏給𪜶刣死，連一個都無留啲。

亞哈謝的親屬受殺害

¹² 耶戶出發，去撒馬利亞。佇中途，伊到牧者剪羊毛的厝，

¹³ 抵著猶大王亞哈謝的親屬，問𪜶講：「恁是什麼人？」 𪜶應講：「阮是亞哈謝的親屬，抵欲落去訪問王及王后的子。」

¹⁴ 耶戶講：「活活給𪜶掠起來。」耶戶的部下就給𪜶掠起來，佇剪羊毛的厝的井邊刣死𪜶，共四十二人，連一個都無留。

¹⁵ 耶戶繼續進前，抵著利甲的子約拿達來迎接伊；耶戶給伊請安，對伊講：「我誠心對待你，你豈嘛按呢對待我？」 約拿達應講：「是。」 耶戶講：「若是按呢，你的手伸出來。」約拿達就伸手互伊。伊就牽約拿達上車。

¹⁶ 耶戶講：「及我做夥來去，看我按怎為著上主熱心做代誌。」伊就互約拿達坐伊的車。

¹⁷ 到撒馬利亞，耶戶刣死所有屬亞哈家留佇撒馬利亞的人，連一個都無留啲，抵照上主通過以利亞所講的話。

拜巴力的人受殺害

¹⁸ 耶戶召集眾人民，給𪜶講：「亞哈服事巴力猶無夠，耶戶欲閣較熱心服事伊。

¹⁹ 所以著召集巴力所有的先知、祭司，及攏總拜巴力的人來我遮，一個都𣍐當無來，因為我欲為巴力舉行大祭祀；無來的，欲互伊死。」這是耶戶的詭計，欲刣死所有拜巴力的人。

²⁰ 耶戶講：「著為巴力召集嚴肅會。」𪜶就宣布。

²¹ 耶戶派人去以色列逐所在宣告此個消息；拜巴力的人攏齊到，無一個無來。𪜶就進入巴力的廟；巴力的廟內，人揢甲滿滿滿。

²² 耶戶吩咐管理禮服的人講：「禮服提出來互所有拜巴力的人穿。」彼個人就提禮服出來互𪜶。

²³ 耶戶及利甲的子約拿達入巴力的廟，給拜巴力的人講：「恁著詳細搜查，恁中間毋通有拜上主的人，只有拜巴力的人會當佇遮。」

²⁴ 𪜶就入去欲獻祭祀及燒化祭。耶戶已經有安排八十個人佇廟的外面，閣對𪜶講：「我將諸個人交互恁，若有人逃走，放伊走的人著賠命。」

²⁵ 耶戶獻燒化祭了後，對護衛兵及軍官講：「入去，總刣！一個都毋通互走去。」𪜶就用刀刣死所有的人，將身屍擲佇遐。然後閣去到巴力廟的內殿，

²⁶ 將柱像攏提出來燒。

²⁷ 𪜶毀壞巴力的柱像，拆毀巴力的廟，給伊改做便所，到今仔日。

²⁸ 按呢，耶戶對以色列消滅巴力崇拜。

²⁹ 毋拘耶戶及尼八的子耶羅波安仝款，互以色列人陷落罪，就是去拜伯特利及但的金牛。

³⁰ 上主給耶戶講：「因為你有完成我看做好的事，照我的心意對待亞哈家，你的子孫欲續接你做以色列的王到第四代。」

³¹ 毋拘耶戶無專心遵守上主 — 以色列的上帝的律法，及耶羅波安仝款，互以色列人陷落罪。

耶戶死

³² 彼時，上主互以色列國開始衰微；敘利亞王哈薛拍敗以色列，

³³ 佔領約旦河東旁基列全地，對亞嫩山谷附近的亞羅珥起，到基列及巴珊，就是迦得人、呂便人、瑪拿西人的地區。

³⁴ 耶戶其他的事蹟、伊的所做，及伊的成就，攏記載佇以色列列王史。

³⁵ 耶戶轉去伊的列祖遐了後，安葬佇撒馬利亞。伊的子約哈斯續接伊作王。

³⁶ 耶戶佇撒馬利亞做以色列王總共二十八年。