列王紀下卷 1 - 現代台語譯本漢字版

以利亞及亞哈謝王

¹ 亞哈死了，摩押背叛以色列。

² 以色列王亞哈謝佇撒馬利亞對王宮樓頂的欄杆跋落來，受傷；就差使者，對𪜶講：「恁去問以革倫的神明巴力‧西卜，我此個傷會好𣍐？」

³ 上主的使者給提斯比人以利亞講：「你起來，去見撒馬利亞王的使者，問𪜶講：『恁去問以革倫的神明巴力‧西卜，是因為以色列中無上帝是無？

⁴ 恁著去給王講，上主按呢講：你𣍐當閣對現在啲倒的眠床起來；你一定會死。』」以利亞就去。

⁵ 使者倒去見王，王問𪜶講：「恁是按怎倒來？」

⁶ 使者應伊講：「阮抵著一個人，伊給阮講：『恁倒去見差恁的王，對伊講，上主按呢講：你差人去問以革倫的神明巴力‧西卜，是因為以色列中無上帝是無？所以你𣍐當閣對現在啲倒的眠床起來；你一定會死。』」

⁷ 王問𪜶講：「來抵著恁，給恁講諸個話的人是什麼款人？」

⁸ 𪜶應講：「伊穿有毛的衫，腰縖皮帶。」 王講：「伊一定是提斯比人以利亞。」

⁹ 王就派一個管五十人的軍官導許個部下去以利亞遐。伊𬦰上山，看著以利亞坐佇山頂。軍官給以利亞講：「上帝重用的人，王命令你落來。」

¹⁰ 以利亞應軍官講：「我若是上帝重用的人，願天降火，燒你及你彼五十個人。」就有火對天落來，燒滅伊及彼五十人。

¹¹ 王閣派一個管五十人的軍官導許個部下去以利亞遐。軍官給以利亞講：「上帝重用的人，王命令你趕緊落來。」

¹² 以利亞應講：「我若是上帝重用的人，願天降火，燒你及你彼五十個人。」就有真大的火對天落來，燒滅伊及彼五十人。

¹³ 王第三遍閣派一個管五十人的軍官導許個部下去。彼個第三隊的軍官𬦰上山，跪佇以利亞的面前，哀求伊，講：「上帝重用的人，求你看我及你此五十個僕人的性命做寶貝。

¹⁴ 已經有火對天降落，燒滅以前兩個軍官，及彼一百人。今求你看我的性命做寶貝。」

¹⁵ 上主的使者對以利亞講：「你及伊落去，毋免驚伊。」以利亞就起來，及伊落去見王，

¹⁶ 對王講：「上主按呢講：『你派人去問以革倫的神明巴力‧西卜，是因為以色列中無上帝互你通問是無？所以你𣍐當閣對現在啲倒的眠床起來，你一定會死。』」

¹⁷ 亞哈謝就死，抵照以利亞所傳達上主的話。王無子，伊的小弟約何蘭續接伊作王；彼時是猶大王約沙法的子約蘭作王第二年。

¹⁸ 亞哈謝其他的事蹟攏記載佇以色列列王史。