列王紀上卷 9 - 現代台語譯本漢字版

上主閣對所羅門顯現

¹ 所羅門完成上主的聖殿、王宮，及伊所愛起的建築了後，

² 上主第二遍對所羅門顯現，親像以前佇基遍對伊顯現仝款。

³ 上主對伊講：「你佇我的面前祈禱懇求的，我攏有聽著。我已經將你所起此間殿分別作聖，做永遠敬拜我的所在。我的目睭、我的心嘛欲不時佇遐。

⁴ 你若親像你的老父大闢，佇我的面前心純全，所行所做正直，遵趁我的誡命，執守我的規例及命令，

⁵ 我就欲堅固你佇以色列國的王位到永遠；親像我有應允你的老父大闢講：『你的後代會坐以色列的王位永無斷。』

⁶ 恁及恁的子孫若越走離開我，無執守我頒布互恁的誡命及規例，去服事敬拜別個神明，

⁷ 我就欲將以色列人對我賞賜𪜶的地給𪜶消滅，嘛欲棄拺此間分別作聖用來敬拜我的殿，互以色列人佇萬國中做笑談，受人恥笑。

⁸ 此間聖殿現在雖然堂皇，到彼時，經過的人會著驚恥笑，講：『上主哪會按呢對待此個地及此間殿？』

⁹ 有人會應講：『是因為𪜶棄拺導𪜶的列祖出埃及地的上主 — 𪜶的上帝，去信奉別個神明，敬拜服事𪜶，所以上主互諸個一切的災禍臨到𪜶。』」

所羅門及希蘭的協約

¹⁰ 所羅門用二十年起上主的聖殿及王宮，此兩間完工的時，

¹¹ 所羅門王將加利利地二十個城互泰爾王希蘭；因為希蘭有照所羅門的請求，用柏香柴、松樹柴，及金互伊。

¹² 希蘭對泰爾出來，去看所羅門互伊的城，看了無合意，

¹³ 就講：「我的兄弟，你互我此款的城噢？」伊就叫許個城做迦步勒地，到今仔日。

¹⁴ 希蘭曾送金大約四千公斤互所羅門王。

所羅門其他的事蹟

¹⁵ 所羅門王派強制勞工起造上主的聖殿、家己的王宮、米羅、耶路撒冷的城牆，及夏瑣、米吉多，以及基色諸個城。

¹⁶ (早前埃及王法老上來攻取基色，放火燒城，刣死城內的迦南人，將城互伊的查某子，所羅門的某，做嫁妝。)

¹⁷ 所羅門重建基色，下‧伯‧和崙；

¹⁸ 巴拉，及猶大曠野的達莫。

¹⁹ 所羅門嘛起造真多城，囤積軍用品、戰車及戰馬；閣佇耶路撒冷、黎巴嫩，及伊治理的全地，起造伊所愛起的建築。

²⁰ 所有住佇境內的亞摩利人、赫人、比利洗人、希未人、耶布斯人賰落來的後代，毋是屬佇以色列，

²¹ 無互以色列人消滅的，所羅門強制𪜶做苦工，到今仔日。

²² 毋拘所羅門無互以色列人做奴隸；互𪜶做伊的戰士、人臣、首領、軍長、戰車長、馬兵長。

²³ 所羅門的督工有五百五十人，管理作工的人。

²⁴ 法老的查某子對大闢城搬入去所羅門為著伊起的宮殿。所羅門閣起米羅。

²⁵ 所羅門逐年三遍佇伊為上主起的祭壇獻燒化祭及平安祭；閣佇上主的面前燒香。按呢，伊完成起造聖殿的工程。

²⁶ 所羅門王佇以東地區的紅海海邊，倚近以祿的以旬‧迦別造船。

²⁷ 希蘭派伊的部下，就是經驗豐富的船員，及所羅門的部下做夥行船。

²⁸ 𪜶去俄斐，對遐運送金一萬四千公斤到所羅門王遐。