列王紀上卷 8 - 現代台語譯本漢字版

迎接約櫃入聖殿

¹ 彼時，所羅門召集以色列的長老、逐支族的首領，以及逐宗族的族長來耶路撒冷，欲迎接上主的約櫃，對錫安的大闢城運起來聖殿。

² 以他念月，就是七月，搭寮節的時，以色列人攏聚集佇所羅門王遐。

³ 以色列的長老攏來，許個祭司就扛約櫃起來。

⁴ 祭司及利未人將上主的約櫃、會幕，以及布棚內一切聖的器具扛入聖殿。

⁵ 所羅門王及聚集佇伊遐的以色列全會眾，佇約櫃前獻牛、羊做祭物，祭物多甲𣍐算得。

⁶ 祭司扛上主的約櫃入內殿，就是至聖所，下佇指定的所在，天使基路伯翼股下面。

⁷ 基路伯佇下約櫃所在的頂面搋開𪜶的翼，遮蓋約櫃及扛約櫃的槓。

⁸ 槓真長，槓尾佇內殿前的聖所看會著，對外面就𣍐當看著；到今仔日槓猶佇遐。

⁹ 約櫃內面只有兩塊石版，以外攏無別項物；石版是以色列人出埃及地，上主佇何烈山及𪜶立約的時摩西所下的。

¹⁰ 當祭司對聖所出來的時，有雲充滿上主的殿，

¹¹ 因為按呢，祭司𣍐當徛啲服事；上主的榮光充滿上主的殿。

¹² 彼時所羅門講： 「上主曾講， 伊欲𫢶佇密雲的所在。

¹³ 我已經起一間堂皇的殿， 做你永遠徛起的所在。」

所羅門對人民講話

¹⁴ 以色列會眾攏徛啲，所羅門王越過來給𪜶祝福。

¹⁵ 伊講：「上主 — 以色列的上帝應該得著謳咾！伊親嘴對我的老父大闢應允的，攏親手實現。

¹⁶ 上主有講：『對我導我的子民以色列出埃及以來，我毋曾佇以色列眾支族中間揀一個城為我的名起聖殿；毋拘我有選立大闢來治理我的子民以色列。』

¹⁷ 「我的老父大闢心內有意思欲為上主 — 以色列的上帝的名起聖殿。

¹⁸ 總是上主對我的老父大闢講：『你有意思欲為我的名起聖殿，你此個心意真好；

¹⁹ 毋拘你毋通起，你親生的子會為我的名起聖殿。』

²⁰ 「今上主實現伊所講的話；我照上主的話起來續接我的老父大闢坐以色列的王位，閣為上主 — 以色列上帝的名起聖殿。

²¹ 我嘛佇遐為約櫃準備一個所在；櫃內有上主的約，就是伊導咱的列祖出埃及的時及𪜶立的約。」

所羅門的祈禱

²² 所羅門當以色列會眾的面前，徛佇上主的祭壇前，攑雙手向天，講：

²³ 「上主 — 以色列的上帝，天頂地下無一個神明親像你；你對許個一心一意順服你的僕人守約施慈愛。

²⁴ 你有執守對你的僕人我的老父大闢的應允；你親嘴應允的，今仔日攏親手實現。

²⁵ 上主 — 以色列的上帝，求你實現對你的僕人我的老父大闢的應允；你有講：『你的子孫若親像你佇我的面前謹慎生活，你的後代就會永遠坐以色列的王位。』

²⁶ 以色列的上帝，你對你的僕人我的老父大闢所講的，求你實現。

²⁷ 「上帝啊，你豈真正住佇地上？天及天頂的天都無夠通互你住，何況我所起此間聖殿？

²⁸ 上主 — 我的上帝，求你俯落聽你的僕人的祈禱懇求，聽你的僕人今仔日佇你面前的求叫祈禱。

²⁹ 願你暝日看顧此個聖殿，就是你講你欲臨在的所在。你的僕人向此個所在祈禱的時，求你聽。

³⁰ 你的僕人及你的子民以色列向此所在祈禱的時，願你佇天頂，你住的所在，聽阮的祈求，赦免阮。

³¹ 「人若得罪厝邊，受迫著咒誓，伊來此間殿佇你的壇前咒誓伊是無辜的，

³² 求你佇天頂俯落聽來辦理，審判你諸個僕人：定歹人做有罪，照伊的所做給伊報應；定無辜的做無罪，照伊的正直給伊報賞。

³³ 「你的子民以色列若得罪你，互對敵拍敗，𪜶若反悔歸向你，宣認你的名，閣佇此間聖殿對你祈禱懇求，

³⁴ 求你佇天頂俯落聽，赦免你的子民以色列的罪，互𪜶倒來你所賞賜𪜶列祖的地。

³⁵ 「𪜶若得罪你，你給天關密無落雨；你刑罰𪜶的時，𪜶若向此所在祈禱，宣認你的名，離開𪜶的罪惡，

³⁶ 求你佇天頂俯落聽𪜶的祈禱，赦免你的僕人及你的子民以色列的罪，教示𪜶行正直的路，閣落雨佇你賞賜𪜶做產業的地。

³⁷ 「此個地若有飢荒、瘟疫、火燒風、病害、草蜢、草蜢公，抑是對敵圍困𪜶的城，無論有什麼災禍，什麼大病，

³⁸ 你的子民以色列中若有人為家己的災禍心艱苦，向此個聖殿攑手迫切懇求，

³⁹ 求你佇天頂，你徛起的所在，俯落聽來赦免𪜶，幫贊𪜶；因為你知𪜶的心，嘛只有你知世間人的心，願你照𪜶逐個人的行做對待𪜶，

⁴⁰ 互𪜶佇你賞賜阮列祖的地，一世人敬畏你。

^41-42 「若有外國人，毋是屬你的子民以色列的，因為聽著你的大名、大權能的作為，及你救助的手骨，對真遠的所在來，向此個殿祈禱，

⁴³ 求你佇天頂，你徛起的所在，聽𪜶的祈求，照外國人一切對你懇求的來做，互天下萬民攏會親像你的子民以色列像款，識你的名，敬畏你；閣互𪜶知此個聖殿是敬拜求叫你的所在。

⁴⁴ 「你的子民奉你的命令，無論出去什麼所在及對敵交戰的時，若向你所揀選的城，及我為著你的名起的殿，對上主祈禱，

⁴⁵ 求你佇天頂聽𪜶的祈禱懇求，互𪜶得勝。

⁴⁶ 「世間無一個人無犯罪，毋拘你的子民若得罪你，你對𪜶受氣，將𪜶交互對敵，給𪜶掠去對敵的地，無論遠抑是近，

⁴⁷ 𪜶若佇互人掠去的地回心轉意，閣佇𪜶受掠的地悔改，對你哀求：『阮有罪，阮背逆，阮做歹。』

⁴⁸ 𪜶若佇對敵掠𪜶去的地，全心全意歸順你，閣向你賞賜𪜶列祖的地，及你所揀選的城，以及我奉你的名起的殿，對你祈禱，

⁴⁹ 求你佇天頂，你徛起的所在，聽𪜶的祈禱懇求，照公道對待𪜶，

⁵⁰ 閣赦免許個得罪你的子民，以及𪜶一切的罪過，互𪜶對掠𪜶的人得著憐憫。

⁵¹ 因為𪜶是你的子民，你的產業，是你對埃及，對鑄鐵的火爐中救出來的。

^52-53 「至高的上主啊，求你開目睭看顧；你的僕人及你的子民以色列無論什麼時對你懇求，求你聽。你曾對地上萬民的中間分別阮的列祖做你的產業，是照你導𪜶出埃及的時，通過你的僕人摩西所應允的。」

所羅門為人民祝福

⁵⁴ 所羅門雙腳跪佇上主的壇前，攑雙手向天，對上主祈禱懇求煞，就起來。

⁵⁵ 伊徛啲，大聲祝福以色列全會眾，講：

⁵⁶ 「上主應該受稱讚！伊有照應允賜太平互伊的子民以色列；伊通過伊的僕人摩西所應允恩典的話，無一句無實現。

⁵⁷ 願上主 — 咱的上帝及咱同在，親像伊及咱的列祖同在像款。願伊無離開咱，無放拺咱，

⁵⁸ 互咱的心歸向伊，遵行伊一切的道路，守伊所互咱列祖的誡命、規例，及命令。

⁵⁹ 願我佇上主的面前所祈求諸個話，暝日透到上主 — 咱的上帝面前；閣照逐日的需要幫贊伊的僕人及伊的子民以色列。

⁶⁰ 互地上萬民知上主以外無別個上帝。

⁶¹ 所以恁著對上主 — 咱的上帝存純全的心，遵趁伊的規例，守伊的誡命，及今仔日仝款。」

奉獻聖殿

⁶² 王及以色列人民做夥佇上主面前獻祭。

⁶³ 所羅門向上主獻平安祭，牛兩萬兩千隻，羊十二萬隻。按呢，王及以色列人民為著上主的殿舉行奉獻禮。

⁶⁴ 彼日，王因為聖殿頭前的銅壇傷細，無夠通佇遐獻燒化祭、素祭，及平安祭的油，就將上主殿前的埕中央的所在分別作聖，佇遐獻燒化祭、素祭，及平安祭的油。

⁶⁵ 彼時，所羅門及以色列人民佇上主 — 咱的上帝面前守節，七日，閣七日，共十四日；以色列人民對哈馬隘口到埃及的溪谷來參加，成做盛況的大會。

⁶⁶ 節期煞隔日，王給人民解散，互𪜶倒去𪜶兜，𪜶就給王祝福。人民因為上主對伊的僕人大闢及伊的子民以色列所賞賜一切的恩惠，心內歡喜快樂。