列王紀上卷 7 - 現代台語譯本漢字版

所羅門起造宮殿

¹ 所羅門起家己的宮殿，起十三年才完成。

² 伊閣起黎巴嫩林宮，長四十四公尺，闊二十二公尺，高十三公尺半；有柏香柴的柱四綴，柱頂有柏香柴的樑。

³ 內面有四十五支柱，每綴十五支，頂面用柏香柴蓋啲。

⁴ 閣有窗仔門三綴，窗仔及窗仔相對；攏總有三層。

⁵ 所有的門及門徛攏是四方；有窗仔門三綴，窗仔及窗仔相對；三層攏是按呢。

⁶ 伊閣起有柱的大廳，長二十二公尺，闊十三公尺半；柱的頭前有走廊，走廊有用柱托啲的天篷。

⁷ 閣起王位的廳，就是審判廳，王佇遐審判案件；此個廳的地板對此旁到彼旁攏鋪柏香柴。

⁸ 所羅門佇廳後面的埕起一間家己住的宮殿，起造的方法像款。所羅門另外為伊的某法老的查某子起一間及此個廳像款的宮殿。

⁹ 諸個宮殿，對地基到壁頂，對外面到大埕，攏是用貴重的石起的；諸個石照寸尺拍好，四面用鋸仔修整過。

¹⁰ 地基是用大塊貴重的石，長有的三公尺半，有的四公尺。

¹¹ 頂面有照寸尺拍好貴重的石，嘛有柏香柴。

¹² 大埕周圍有拍好的石三層、柏香柴一層，攏及上主聖殿的內埕以及殿的走廊像款。

戶蘭的工作

¹³ 所羅門王派人對泰爾請戶蘭來。

¹⁴ 伊是拿弗他利支族一個寡婦的子；伊的老父是泰爾人，是拍銅師傅。戶蘭真有智慧、聰明，及技術，𠢕拍逐項銅器。伊來所羅門王遐，做王交代伊一切的工。

銅柱

¹⁵ 戶蘭鑄造兩支銅柱，逐支高八公尺，柱的周圍五公尺三十公分。

¹⁶ 閣用銅鑄兩個柱斗下佇柱頂；逐個柱斗高兩公尺二十公分。

¹⁷ 兩支銅柱頂面的柱斗，攏有掛七組一目一目的網仔及一環一環的鍊仔。

¹⁸ 閣造兩綴石榴圍佇網仔的周圍，來妝飾柱頂的柱斗；兩旁柱斗攏是按呢。

¹⁹ 走廊柱頂的柱斗高一公尺八十公分，有刻百合花。

²⁰ 兩旁銅柱的柱斗，倚網仔邊椪圓的所在，攏有石榴兩百粒圍啲。

²¹ 伊徛兩支柱佇聖殿的走廊；正旁彼支叫做雅斤，倒旁彼支叫做波阿斯。

²² 柱頂有刻百合花；按呢，造柱的工程就完成。

銅海

²³ 戶蘭閣鑄一個圓形的銅海，深兩公尺二十公分，直徑四公尺四十公分，周圍十三公尺二十公分。

²⁴ 銅海的唇下面有匏仔圍啲，每四十五公分十粒，有兩排，是鑄銅海的時像時鑄的。

²⁵ 銅海安佇十二隻銅牛的頂面；三隻向北，三隻向西，三隻向南，三隻向東；牛尾向內面。

²⁶ 銅海的厚度七公分半；伊的唇親像杯的唇，形親像百合花；會當貯四萬公升。

銅座

²⁷ 戶蘭閣用銅製造十個盆座；逐個座長一公尺八十公分，闊一公尺八十公分，高一公尺三十公分。

²⁸ 逐個座四圍攏有堵枋鬥佇架裡。

²⁹ 堵枋有獅、牛，及基路伯；獅及牛的頂面及下面，攏有浮出來的花環雕刻。

³⁰ 逐個座有四個銅輪及銅的車輪心；座的四腳攏有架；架鑄佇盆的下面，四邊有花環的雕刻。

³¹ 座對內面到頂面深四十五公分；伊的嘴是圓的，直徑六十六公分，閣有雕刻。座的堵是四方的，毋是圓的。

³² 四個輪佇堵的下面；車輪心及座相連；逐個輪高六十六公分。

³³ 輪的形狀親像戰車輪；伊的車輪心、外環、軹，及內環，攏是鑄的。

³⁴ 座的四角有四個架，架及座連做一個。

³⁵ 座的頂面有圓的箍，高二十二公分；座的頂面有托柺及堵枋，攏及座連做一個；

³⁶ 托柺及堵枋頂面的空位，有刻基路伯、獅，及棕樹；四圍有刻花環。

³⁷ 伊照仝款的作法鑄十個座；寸尺，形狀攏像款。

³⁸ 戶蘭閣造十個銅盆，逐個盆直徑一公尺八十公分，通貯八百公升，十個盆座的頂面，每一個座下一個盆。

³⁹ 許個座，五個下佇聖殿的南旁，五個下佇北旁；銅海下佇聖殿的東南旁。

聖殿的用具

⁴⁰ 戶蘭閣造盆、托仔，及碗。按呢，戶蘭為著所羅門王完成上主聖殿一切的工：

⁴¹ 兩支柱、柱頂碗形的柱斗、蓋碗形柱斗的網仔；

⁴² 四百粒石榴，分做兩旁，一旁兩排，安佇兩領蓋碗形柱斗的網仔；

⁴³ 十個盆座及座頂十個盆；

⁴⁴ 一座銅海，銅海下面十二隻牛；

⁴⁵ 盆、托仔，及碗； 以上諸個器具攏是戶蘭為著所羅門王起上主聖殿用光亮的銅做的。

⁴⁶ 諸個器具是王佇約旦平原，用疏割及撒拉旦中間的黏土做模鑄造的。

⁴⁷ 因為銅做的器具傷多，所羅門就攏無過秤，銅的重量無法度計算。

⁴⁸ 所羅門閣造上主殿內所有的器具：金壇、排獻祭的餅的金桌；

⁴⁹ 內殿頭前的燈台，正旁五個，倒旁五個，攏用純金做；燈台的花、燈、鑷仔，嘛用金做；

⁵⁰ 燈台的杯、燈心的剪刀、盤、囥香的𥐵仔，及囥火炭的盆是純金做的；上內面至聖所的門及前殿的門的門鈕，攏是金的。

⁵¹ 按呢，所羅門王完成上主聖殿一切的工。所羅門將伊的老父大闢所獻的金、銀，及器具攏帶入去下佇上主聖殿的府庫。