列王紀上卷 6 - 現代台語譯本漢字版

所羅門起造聖殿

¹ 以色列人出埃及了後四百八十年，所羅門做以色列王第四年二月，就是西弗月，伊動工起造上主的聖殿。

² 所羅門王為上主起的殿，長二十七公尺，闊九公尺，高十三公尺半。

³ 殿前的走廊深四公尺半，闊九公尺，及殿平闊。

⁴ 伊為著聖殿做內面闊外面狹的窗仔。

⁵ 伊佇倚聖殿，包括前殿及內殿的外壁四圍起廂房；

⁶ 第一層闊兩公尺二十公分，第二層闊兩公尺七十公分，第三層闊三公尺十公分；佇聖殿的外壁四圍閣做幫牆，才免互楹仔插入殿的壁。

⁷ 起造聖殿的石材已經攏佇石場拍好，所以起造的時就無槌、斧頭，及逐種鐵器的聲。

⁸ 廂房第一層的入口佇聖殿的南旁；對第一層有捲螺梯上第二層，對第二層上到第三層。

⁹ 伊用柏香柴做樑，用柏香柴板做厝頂；按呢，聖殿就起好。

¹⁰ 倚聖殿的壁起的廂房，逐層高兩公尺二十公分；柏香柴的樑攏靠佇殿的幫牆。

¹¹ 上主對所羅門講：

¹² 「關係你所起此間聖殿，你若切實遵行我的規例、命令，及誡命，我就欲對你實現我應允你的老父大闢的話。

¹³ 我欲𫢶佇以色列人的中間，一定𣍐放拺我的子民以色列。」

聖殿內部的設備

¹⁴ 所羅門完成起造聖殿的工作。

¹⁵ 伊用柏香柴板貼聖殿內面的壁，對土腳到壁頂；閣用松樹板鋪殿的土腳。

¹⁶ 閣佇殿內面的後旁隔一間內殿做至聖所，長九公尺；對土腳到壁頂用柏香柴板隔起來。

¹⁷ 前殿長十八公尺。

¹⁸ 聖殿內面的柏香柴板攏有刻匏仔及花蕊；殿內攏用柏香柴包啲，連一塊石頭都看𣍐著。

¹⁹ 內殿準備欲安置上主的約櫃。

²⁰ 內殿，長、闊、高攏九公尺，內面貼純金；香壇用柏香柴蓋啲。

²¹ 所羅門用純金貼聖殿的內部，嘛用純金貼內殿的入口，閣牽金鍊仔。

²² 聖殿的內部及內殿前的香壇攏貼金，到歸間聖殿攏貼滿。

造兩個基路伯

^23-26 佇內殿的內面，所羅門用橄欖柴造兩個天使基路伯，逐個高四公尺四十公分。基路伯兩旁的翼逐旁長兩公尺二十公分；對此旁的翼尾到彼旁的翼尾，約四公尺四十公分。另外一個基路伯嘛像款。

²⁷ 伊將基路伯下佇內殿的內面；基路伯的翼搋開，第一個基路伯一旁的翼抵著此旁的壁，第二個一旁的翼抵著彼旁的壁；𪜶另外兩支翼佇殿的中央相磕。

²⁸ 伊閣用金貼許個基路伯。

聖殿的妝飾

²⁹ 聖殿的前殿及內殿四圍的壁，攏有刻基路伯、棕樹，及花蕊的形狀。

³⁰ 前殿及內殿的地板攏貼金。

³¹ 所羅門閣用橄欖柴做入內殿的門；門楣及門徛攏是五角形的柱。

³² 佇用橄欖柴造的兩個門扇刻基路伯、棕樹，及花蕊，攏貼金；閣用金鑲佇基路伯及棕樹頂面。

³³ 閣佇前殿的入口用橄欖柴做四角形的門徛。

³⁴ 用松樹柴做雙旁的門扇；兩旁的門扇各有兩片，會拗得；

³⁵ 頂面刻基路伯、棕樹，及花蕊，攏貼金；閣將金拍平，鑲佇雕刻物的頂面。

³⁶ 伊閣用拍好的石三排及柏香柴一排來起內埕。

³⁷ 所羅門作王第四年二月，就是西弗月，下上主聖殿的地基。

³⁸ 到十一年八月，就是布勒月，聖殿所有的工程攏照計劃完成；起造共七年久。