列王紀上卷 5 - 現代台語譯本漢字版

所羅門準備起造聖殿

¹ 泰爾王希蘭聽著所羅門續接伊的老父大闢，受選立作王，就派人臣去見伊；希蘭一直是大闢的好朋友。

² 所羅門嘛派人去見希蘭，講：

³ 「你知我的老父大闢𣍐當為著上主 — 伊的上帝的名起聖殿，因為伊及四圍的對敵交戰，著等到上主互𪜶攏降服。

⁴ 今上主 — 我的上帝已經賜我天下太平，無對敵，無災禍。

⁵ 所以，我欲為上主 — 我的上帝的名起聖殿，是照上主對我的老父大闢的應允，講：『我欲互你的子續接你，坐你的位，伊欲為我的名起聖殿。』

⁶ 所以請你命令人，去黎巴嫩為我剉柏香樹；我的工人欲及你的工人做夥做工；我嘛欲照你定的工錢互你的工人；你知，阮無人親像恁西頓人赫呢𠢕剉樹。」

⁷ 希蘭聽見所羅門的話，真歡喜，就講：「今仔日上主應該受稱讚，因為伊賞賜大闢一個有智慧的子，治理真多的人民。」

⁸ 希蘭派人去見所羅門，講：「我有聽見你傳達互我的話。我會照你的需要提供柏香樹及松樹的柴料互你。

⁹ 我的工人會對黎巴嫩運木材落海，縛做歸排浮佇海裡，拖到你指定的所在，佇遐拆開了後，交互你。請你嘛照我的需要供給糧食互我的家。」

¹⁰ 希蘭就照所羅門的需要供給柏香樹及松樹的柴料互伊。

¹¹ 所羅門互希蘭兩千公噸的小麥，四十萬公升純的橄欖油，做伊家內的食物。所羅門逐年攏照按呢互希蘭。

¹² 上主照伊的應允賜智慧互所羅門。希蘭及所羅門彼此立約，和平相處。

¹³ 所羅門王對以色列人民強制召人工三萬。

¹⁴ 逐月日輪流派一萬人去黎巴嫩；𪜶一個月佇黎巴嫩，兩個月佇厝裡；亞多尼蘭做監督。

¹⁵ 所羅門有運搬的工人七萬，佇山裡拍石的有八萬。

¹⁶ 另外，所羅門有督工的官員三千三百人，監督許個工人。

¹⁷ 𪜶照王的命令，拍大閣貴重的石頭，運來下做殿的地基。

¹⁸ 所羅門的師傅及希蘭的師傅，以及迦巴勒人，做夥拍石，準備柴料及石材，來起聖殿。