列王紀上卷 21 - 現代台語譯本漢字版

拿伯的葡萄園

¹ 後來閣有代誌發生。耶斯列人拿伯佇耶斯列有一坵葡萄園，倚近撒馬利亞王亞哈的王宮。

² 亞哈給拿伯講：「你的葡萄園互我做菜園，因為真近我的王宮；我欲用閣較好的園給你換；你若愛銀，我就照價錢給你買。」

³ 拿伯給亞哈講：「上主𣍐允准我將祖先留落來的產業互你。」

⁴ 亞哈因為耶斯列人拿伯講的話，鬱卒無歡喜，倒去王宮；因為拿伯有講「我𣍐當用我的祖業互你」，亞哈就倒佇眠床，面向內面，嘛毋食。

⁵ 王后耶洗碧來伊遐，問伊講：「你是按怎鬱卒毋食飯？」

⁶ 伊應講：「因為我對耶斯列人拿伯講：『你的葡萄園互我，我用銀給你買；抑是你若愛，我就用葡萄園及你換。』伊講：『我的葡萄園，我𣍐當互你。』」

⁷ 王后耶洗碧給伊講：「你此陣豈毋是啲統治以色列國？起來，歡歡喜喜來食；我欲將耶斯列人拿伯的葡萄園互你。」

⁸ 耶洗碧用亞哈的名寫批，蓋王的印，寄批互許個及拿伯住仝城的長老及貴族。

⁹ 批內寫講：「恁著宣布禁食，互拿伯坐佇人民的頭前；

¹⁰ 閣叫兩個匪類坐佇伊的對面，作證告伊講：『你褻瀆上帝及侮辱王。』然後給伊拖出去，用石頭抌死。」

¹¹ 許個及拿伯住仝城的長老及貴族，就照耶洗碧寄互𪜶的批所寫的去做。

¹² 𪜶宣布禁食，互拿伯坐佇人民的頭前。

¹³ 閣叫兩個匪類來坐佇拿伯的對面，當眾人的面前作證告拿伯，講：「拿伯褻瀆上帝閣侮辱王。」眾人就給伊拖出去城外，用石頭抌死。

¹⁴ 長老及貴族就差人去給耶洗碧講：「拿伯已經互石頭抌死啦。」

¹⁵ 耶洗碧聽著拿伯互石頭抌死，就給亞哈講：「你去接收耶斯列人拿伯毋肯賣互你的葡萄園。伊已經死，無命啦。」

¹⁶ 亞哈聽著拿伯已經死，就起來，落去欲接收耶斯列人拿伯的葡萄園。

¹⁷ 上主的話臨到提斯比人以利亞，講：

¹⁸ 「你起來，去見住佇撒馬利亞的以色列王亞哈；伊此陣落去耶斯列欲接收拿伯的葡萄園。

¹⁹ 你著給伊講：『上主按呢講：你有刣死人閣接收伊的產業。』閣給伊講：『上主按呢講：狗佇什麼所在舐拿伯的血，嘛欲佇遐舐你的血，就是你本身的血。』」

²⁰ 亞哈對以利亞講：「我的對頭，你啲尋我是無？」 伊應講：「我啲尋你，因為你出賣家己，做上主看做歹的事。

²¹ 上主講：『我欲降災禍互你，欲剿滅你；所有佇以色列中屬亞哈的查甫人，無論自由的抑是無自由的，我攏欲給𪜶消滅。

²² 我欲互你的家及尼八的子耶羅波安的家，以及亞希雅的子巴沙的家仝款，因為你有惹我受氣，閣互以色列人犯罪。』

²³ 關係耶洗碧，上主嘛有講：『狗欲佇耶斯列的外城食耶洗碧。

²⁴ 屬亞哈的人，死佇城內的，欲互狗食；死佇野外的，空中的鳥嘛會給𪜶食。』」

²⁵ (前到今無人親像亞哈，伊受王后耶洗碧使弄，出賣家己，做上主看做歹的事。

²⁶ 伊做上可惡的事，因為伊拜偶像，及上主佇以色列人面前趕出的亞摩利人做仝款的事。)

²⁷ 亞哈聽著諸個話，就拆裂衫，穿粗麻布，禁食，穿粗麻布睏，失志鬱卒行來行去。

²⁸ 上主的話臨到提斯比人以利亞講：

²⁹ 「亞哈佇我的面前赫呢謙卑，你有看著無？因為伊佇我的面前謙卑，所以我無欲佇伊在生的時降此個災禍；到伊的子作王的時，我才欲降此個災禍互伊的家。」