列王紀上卷 20 - 現代台語譯本漢字版

及敘利亞人交戰

¹ 敘利亞王便‧哈達召集伊的全軍，有三十二個王及伊去，有馬，有戰車，上去圍攻撒馬利亞。

² 閣派使者入城去見以色列王亞哈，對伊講：「便‧哈達按呢講：

³ 『你的金銀攏著交互我，你許個某及子兒上媠的嘛攏是我的。』」

⁴ 以色列王應講：「我的主，我的王，照你的話，我及我所有的攏是你的。」

⁵ 使者閣來講：「便‧哈達按呢講：『我已經有派人去給你講，愛你將你的金、銀、某、子兒，攏交互我。

⁶ 明仔載此個時，我欲閣派我的人臣來你遮，抄你及你的人臣的厝，所有你合意的，𪜶攏欲提去。』」

⁷ 以色列王召集國內的長老，對𪜶講：「恁看，此個人刁持尋縫欲害我；伊有派人來我遮，欲愛我的某、子兒，及金銀，我攏無拒絕。」

⁸ 長老及眾人民攏給王講：「聽伊，嘛毋通答應伊。」

⁹ 所以王給便‧哈達的使者講：「恁給我的主我的王講：『你頭一遍派人對你的僕人要求的我會互你；毋拘此遍的要求我做𣍐到。』」使者就倒去回復。

¹⁰ 便‧哈達閣派人來，講：「撒馬利亞的土粉，若有夠互隨我的人逐個搣一把，願神明加倍責罰我。」

¹¹ 以色列王應講：「恁給伊講：『抵仔穿戰甲的，毋通親像褪戰甲的誇口。』」

¹² 便‧哈達及許個王佇布棚內飲酒，聽著諸個話，就給伊的人臣講：「排陣進攻！」𪜶就排陣攻城。

¹³ 有一個先知來見以色列王亞哈，講：「上主按呢講：『你有看著此大陣人無？看咧，今仔日我欲將𪜶交佇你的手，你就知我是上主。』」

¹⁴ 亞哈講：「欲派什麼人？」 伊應講：「上主按呢講：『用諸個省長的少年軍兵。』」 亞哈講：「什麼人欲導頭進攻？」 伊應講：「就是你。」

¹⁵ 亞哈就點算省長的少年軍兵，有兩百三十二名；後來伊閣點算以色列的軍兵，共七千名。

¹⁶ 日中晝，𪜶就出戰。便‧哈達及許個來幫贊伊的三十二個王，佇布棚內飲酒醉。

¹⁷ 許個省長的少年軍兵做頭出去。便‧哈達派人去探查，𪜶回復講：「有人對撒馬利亞出來。」

¹⁸ 伊講：「不管是出來欲講和，抑是欲交戰，攏給𪜶活活掠起來。」

¹⁹ 許個省長的少年軍兵出城，軍兵隨𪜶；

²⁰ 逐個人刣死伊的對敵。敘利亞人逃走，以色列人趇𪜶。敘利亞王便‧哈達騎馬，及許個馬兵逃走。

²¹ 以色列王出城，攻擊許個戰車及戰馬，刣死真多敘利亞人。

²² 彼個先知來見以色列王，對伊講：「你著加強軍力，欲做什麼著好好計劃；明年春天，敘利亞王會閣來攻擊你。」

敘利亞人閣來侵犯

²³ 敘利亞王的人臣對伊講：「以色列人的上帝是山神，所以𪜶刣贏咱；毋拘若佇平原及𪜶交戰，咱一定會刣贏。

²⁴ 請你按呢做；解除許個王的職務，派省長代替𪜶。

²⁵ 閣照你損失的數目招募一隊軍兵，戰馬補戰馬，戰車補戰車。咱佇平原及𪜶交戰，穩當贏。」王就聽𪜶的建議去做。

²⁶ 隔年春天，便‧哈達點算敘利亞人，上去亞弗，欲及以色列人交戰。

²⁷ 以色列人嘛召集軍兵，準備軍糧，出去欲及𪜶交戰，佇𪜶的對面紮營。以色列人親像兩隊小群的山羊仔；毋拘敘利亞人遍滿地面。

²⁸ 有一個上帝重用的人來見以色列王，講：「上主按呢講：『因為敘利亞人講上主是山神，毋是平原的神，所以我欲將此大陣的人攏交佇你的手；恁就知我是上主。』」

²⁹ 以色列人及敘利亞人相對紮營七日；到第七日，雙旁軍兵交戰。佇彼一日，以色列人刣死敘利亞人步兵十萬。

³⁰ 其他的軍兵逃走入去亞弗城；彼個城的城牆倒，硩死所賰的兩萬七千人。便‧哈達走入城，匿佇一間厝的密房。

³¹ 伊的人臣給伊講：「阮聽講以色列家的王攏真仁慈；求你允准阮腰縖麻布，頷頸套索，出去投降以色列王；豈採伊會留你的性命。」

³² 𪜶就腰縖麻布，頷頸套索，去見以色列王，講：「你的僕人便‧哈達講：『求你留我的性命。』」 亞哈講：「伊猶活啲噢？伊是我的兄弟。」

³³ 許個人斟酌聽伊的口氣，連鞭順伊的話尾講：「是，便‧哈達是你的兄弟。」 亞哈講：「恁去導伊來。」便‧哈達出來見王，王就請伊坐王的車。

³⁴ 便‧哈達對亞哈講：「我的老父對你的老父搶來的城，我攏欲還你；閣你通佇大馬士革設商場，親像我的老父佇撒馬利亞設的仝款。」 亞哈講：「我照此個約放你倒去。」亞哈就及伊定條約，放伊倒去。

先知責備亞哈

³⁵ 有一個人，是先知的學生，奉上主的話給伊的同伴講：「拍我！」彼個人毋肯給伊拍。

³⁶ 伊就給伊的同伴講：「因為你毋聽上主的話，你一下離開我，會互獅咬死。」彼個人一下離開，果然抵著獅，互獅咬死。

³⁷ 伊閣抵著一個人，給伊講：「拍我！」彼個人就給伊拍，拍到著傷。

³⁸ 先知就將頭巾蓋到目睭，改裝，佇路裡聽候王。

³⁹ 王對遐經過的時，伊大聲對王講：「你的僕人出戰的時，有一個人掠一個俘虜來交我，講：『你著顧守此個人；伊若走去，你的性命著替伊的性命；若無，你著交出三十四公斤的銀。』

⁴⁰ 你的僕人無閒此項彼項的時，彼個俘虜續走去。」 以色列王給伊講：「你的話已經給家己判罪啊。」

⁴¹ 伊趕緊將蓋目睭的頭巾提掉；以色列王就認出伊是一個先知。

⁴² 伊給王講：「上主按呢講：『因為你將我決定欲毀滅的人放互去，所以你的性命著替伊的性命，你的人民著替伊的人民受毀滅。』」

⁴³ 以色列王就鬱卒無歡喜，倒去撒馬利亞伊的王宮。