列王紀上卷 2 - 現代台語譯本漢字版

大闢互所羅門的遺言

¹ 大闢臨終的時，交代伊的子所羅門講：

² 「我啲欲行世間人攏著行的路；你著堅強，做大丈夫。

³ 你著遵守上主 — 你的上帝所吩咐的，行伊的道路；照摩西律法所記載，遵守伊的規例、誡命、命令，及教示。按呢，你無論做什麼，無論去叨位，攏會亨通；

⁴ 上主嘛會實現伊對我的應允：『你的子孫若謹慎生活，盡心盡意真誠佇我的面前行做，你的後代就會坐以色列的王位永無斷。』

⁵ 「你嘛知洗璐雅的子約押按怎對待我。伊有刣死尼珥的子押尼珥及益帖的子亞瑪撒此兩個以色列的元帥；伊佇太平的時用交戰的手段刣死𪜶，流𪜶的血，互血沐著伊的腰帶及鞋。

⁶ 所以你應該知著按怎做，毋通互伊白頭毛安然落陰間。

⁷ 你著好款待基列人巴西萊許個子，互𪜶常常及你做夥食；因為我逃避你的兄哥押沙龍的時，𪜶有好款待我。

⁸ 著會記得巴戶琳的便雅憫人基拉的子示每；我去瑪哈念的時，伊有用惡毒的話咒詛我。毋拘伊後來有落去約旦河迎接我，我就指上主對伊咒誓講：『我無欲用刀刣你。』

⁹ 今你毋通放伊煞。你是聰明的人，應該知著按怎做；著給伊刣死，互伊的白頭毛沐著血落陰間。」

大闢的死

¹⁰ 大闢轉去伊的列祖遐了後，安葬佇大闢城。

¹¹ 大闢作王統治以色列共四十年：佇希伯崙七年，佇耶路撒冷三十三年。

¹² 所羅門坐伊老父大闢的王位；伊的國非常穩固。

亞多尼雅的死

¹³ 哈及的子亞多尼雅去見所羅門的老母拔示芭；拔示芭問伊講：「你有帶平安來無？」 亞多尼雅應講：「有帶平安。」

¹⁴ 閣講：「我有代誌欲對你請求。」 拔示芭講：「請講。」

¹⁵ 亞多尼雅講：「你知此個國本來是我的，以色列眾人嘛攏愛我作王；毋拘國煞歸互我的小弟，因為這是上主的意思。

¹⁶ 今我有一件事請求你，向望你毋通給我推辭。」 拔示芭講：「什麼代誌？」

¹⁷ 伊講：「請你對所羅門王講：將書念的女子雅比莎賜我做某，因為王一定會聽你的話。」

¹⁸ 拔示芭講：「好，我替你給王講。」

¹⁹ 拔示芭就去見所羅門王，欲替亞多尼雅請求。王起來迎接伊，對伊鞠躬；王閣倒轉去坐伊家己的位，吩咐人為伊的老母安排坐位。拔示芭就坐佇王的正旁，

²⁰ 講：「我有一件小事欲請求你，請毋通給我推辭。」 王給伊講：「阿母，請你講；我𣍐給你推辭。」

²¹ 伊講：「請將書念的女子雅比莎互你的兄哥亞多尼雅做某。」

²² 所羅門王應伊的老母講：「你是按怎替亞多尼雅求書念的女子雅比莎？伊是我的兄哥，你歸氣替伊求王位；伊閣有祭司亞比亞他，及洗璐雅的子約押啲給擁護。」

²³ 所羅門王就指上主咒誓講：「亞多尼雅講諸個話，我若無互伊死，願上帝加倍責罰我。

²⁴ 上主選立我，互我坐我的老父大闢的王位，照伊的應允建立我的家；我指此位永活的上主咒誓，亞多尼雅今仔日一定著死。」

²⁵ 所羅門王就派耶何耶大的子比拿雅去給亞多尼雅刣死。

亞比亞他及約押的結局

²⁶ 王給祭司亞比亞他講：「你著倒去亞拿突你的家鄉。你應該著死，毋拘我今仔日無欲刣你，因為你曾佇我的老父大闢的面前扛至高上主的約櫃，閣及我的老父同受患難。」

²⁷ 所羅門就剝亞比亞他的職位，不准伊做上主的祭司；按呢就應驗上主佇示羅所講有關以利的家的話。

²⁸ 此個消息傳到約押，約押就逃走，入去上主的會幕，擒佇祭壇的角；因為約押雖然無隨押沙龍，毋拘有擁護亞多尼雅。

²⁹ 有人給所羅門王報告，約押走去上主的會幕，擒佇祭壇的角；所羅門就派耶何耶大的子比拿雅欲去給伊刣死。

³⁰ 比拿雅到上主的會幕，給約押講：「王叫你出來。」 約押應講：「毋，我欲死佇遮。」 比拿雅去給王回復講：「約押按呢講，按呢應我。」

³¹ 王給伊講：「你通照伊的話給伊刣死，閣給伊埋葬，互約押流無辜的人的血彼個罪無歸佇我及我的老父的家。

³² 上主欲互伊家己擔謀殺人的罪，因為伊無互我的老父大闢知，就去刣死比伊較好較正直的兩個人，尼珥的子以色列的元帥押尼珥，及益帖的子猶大的元帥亞瑪撒。

³³ 願約押謀殺人的罪永遠歸佇伊及伊的後代；毋拘大闢及伊的後代、伊的家，以及伊的位，欲永遠對上主得著平安繁榮。」

³⁴ 耶何耶大的子比拿雅就上去，刣死約押；人給伊埋葬佇曠野附近伊家己的厝。

³⁵ 王就設立耶何耶大的子比拿雅代替約押做元帥；閣設立祭司撒督代替亞比亞他。

示每的死

³⁶ 王派人叫示每來，給伊講：「你著佇耶路撒冷起厝，住佇遐，𣍐用得出去別位。

³⁷ 你著會記得，你過汲淪溪谷彼日一定著死，這是你家己做得來的。」

³⁸ 示每應王講：「按呢好。我的主我的王所講的，你的僕人遵命。」示每就住佇耶路撒冷真久。

³⁹ 過三年，示每兩個奴隸逃走去瑪迦的子迦特王亞吉遐。有人給示每講：「你的奴隸偷走去迦特。」

⁴⁰ 示每就準備驢，去迦特王亞吉遐，尋伊的奴隸。示每去迦特導伊的奴隸倒來。

⁴¹ 有人給所羅門報告，講：「示每出耶路撒冷去迦特閣倒轉來。」

⁴² 王就派人叫示每來，對伊講：「我豈毋是叫你指上主咒誓，閣警戒你講：『你著會記得，你離開耶路撒冷彼日一定著死。』你應我講：『按呢好，遵命。』

⁴³ 今你是按怎無遵守對上主所咒的誓，以及我警戒你的命令？」

⁴⁴ 王閣給示每講：「你真清楚，你對我的老父大闢所做一切的歹，上主欲因為你的歹給你刑罰。

⁴⁵ 毋拘上主欲祝福我，閣大闢的王位會永遠穩固。」

⁴⁶ 王下令，耶何耶大的子比拿雅就出去，刣死示每。對按呢所羅門的王國就真穩固。