列王紀上卷 19 - 現代台語譯本漢字版

以利亞佇何烈山山頂

¹ 亞哈將以利亞所做一切的事，及伊用刀刣死巴力所有的先知的代誌，攏給耶洗碧講。

² 耶洗碧就派使者去給以利亞講：「明仔載此個時，我若無取你的性命親像你取𪜶逐個人的性命，願神明加倍責罰我。」

³ 以利亞驚著，就趕緊逃命，來到猶大的別是巴，將僕人留佇遐。

⁴ 伊家己佇曠野行一日，來到一欉羅騰樹腳，就坐佇遐求死，講：「夠額啦！上主啊，今求你取我的性命，因為我無比我的列祖較強。」

⁵ 伊就倒佇羅騰樹腳，睏去；有天使來搭伊，講：「起來食。」

⁶ 以利亞一下看，看著頭殼邊有用熱的石頭烘的餅，閣有一瓶水；伊就食就飲，閣倒落去睏。

⁷ 上主的使者第二遍閣來給搭，講：「起來食，因為路猶真遠。」

⁸ 伊就起來食，起來飲；靠此遍食的力，行四十暝，四十日，到上帝的山，就是何烈山。

⁹ 伊到遐，入去一個洞，佇遐過暝；忽然，上主的話臨到伊，對伊講：「以利亞，你佇遮啲創什麼？」

¹⁰ 伊應講：「我為著上主 — 萬軍的統帥上帝大熱心；因為以色列人棄拺你的約，毀壞你的祭壇，用刀刣你的先知，只有賰我一人；𪜶猶數想我的性命，欲刣我。」

¹¹ 上主講：「你出來徛𫢶山頂，佇我的面前。」彼時，上主經過，佇伊面前有大閣強的風，山崩石裂，毋拘上主無佇風的內面；風了後有地動，上主嘛無佇地動的中間；

¹² 地動了後有火，上主嘛無佇火中；火了後，有細閣輕的聲。

¹³ 以利亞聽見，就用外衫掩面，出去徛佇洞口。忽然，有聲臨到伊講：「以利亞，你佇遮啲創什麼？」

¹⁴ 伊講：「我為著上主 — 萬軍的統帥上帝大熱心；因為以色列人棄拺你的約，毀壞你的祭壇，用刀刣你的先知，只有賰我一個；𪜶猶數想我的性命，欲刣我。」

¹⁵ 上主給伊講：「你去，照原路倒去，去大馬士革的曠野；到遐了後，著用油抹哈薛做敘利亞王，

¹⁶ 抹寧示的孫耶戶做以色列王，閣抹亞伯‧米何拉人沙法的子以利沙做先知續接你。

¹⁷ 將來，無互哈薛刣死的，會互耶戶刣死；無互耶戶刣死的，會互以利沙刣死。

¹⁸ 總是，我佇以色列中有留七千人，𪜶的腳頭窩毋曾跪拜巴力，毋曾用嘴給唚。」

以利沙受選召

¹⁹ 以利亞就離開遐；後來，尋著沙法的子以利沙。以利沙抵啲犁田；佇伊的頭前有十二對牛，伊家己趕第十二對。以利亞經過遐，將家己的外衫袚佇以利沙的身上。

²⁰ 以利沙就將許個牛放啲，走去趇以利亞，對伊講：「請互我代先及我的父母相辭，後來就來隨你。」以利亞給伊講：「你通倒去。著會記得我有對你做什麼。」

²¹ 以利沙就對遐倒去，刣一對牛，用套牛的器具做柴煮肉，互眾人食。後來，以利沙就起來隨以利亞，服事伊。