列王紀上卷 18 - 現代台語譯本漢字版

以利亞及巴力的先知

¹ 經過一段時間，到第三年，上主的話臨到以利亞講：「你去見亞哈；我欲落雨佇地面上。」

² 以利亞就去，欲見亞哈；彼時撒馬利亞飢荒真嚴重。

³ 亞哈就叫伊的管家俄巴底亞來。(俄巴底亞不止敬畏上主。

⁴ 耶洗碧啲刣上主的先知的時，俄巴底亞將先知一百人藏起來，每五十人藏佇一個洞內，用餅及水供給𪜶。)

⁵ 亞哈給俄巴底亞講：「你著四界去尋，到所有的水泉邊及溪邊，看會當尋著青草𣍐，通互馬、騾活啲，才免牲生死去。」

⁶ 𪜶就分區域去尋。亞哈行一條路，俄巴底亞家己行另外一條路。

⁷ 俄巴底亞佇路裡抵著以利亞；俄巴底亞認著伊，就仆落去，講：「你是我的主以利亞是無？」

⁸ 伊應講：「是。去給你的主人講，以利亞佇遮。」

⁹ 俄巴底亞講：「你的僕人有犯什麼罪，你竟然欲害我互亞哈刣死？

¹⁰ 我指永活的上主 — 你的上帝咒誓：逐族，逐國，我的主攏派人去啲尋你；𪜶若講『伊無佇遮』，就叫彼國彼族的人咒誓講，𪜶實在尋𣍐著你。

¹¹ 今你講：『去給你的主人講：以利亞佇遮。』

¹² 我一下離開，上主的神毋知欲給你帶去什麼所在。我若去給亞哈講你佇遮，伊來若尋無你，就會給我刣死。毋拘你的僕人對少年就敬畏上主。

¹³ 當耶洗碧啲刣上主的先知的時，我所做的豈無人給我的主講？我有將一百個上主的先知藏起來，每五十人藏佇一個洞內，用餅及水供給𪜶。

¹⁴ 今你講：『去給你的主人講：以利亞佇遮。』伊一定會給我刣死。」

¹⁵ 以利亞講：「我指我所服事的上主 — 萬軍的統帥咒誓講，今仔日我一定欲互亞哈看著我。」

¹⁶ 俄巴底亞就去見亞哈，給伊報告。亞哈就來見以利亞。

¹⁷ 亞哈看著以利亞就給伊講：「你此個害以色列悽慘落魄的！」

¹⁸ 以利亞應講：「害以色列悽慘落魄的毋是我，是你及你的老父的家；因為恁棄拺上主的誡命，去隨巴力。

¹⁹ 今你著派人去召集以色列眾人，以及食耶洗碧的飯的巴力先知四百五十人，及亞舍拉的先知四百人，叫𪜶攏去迦密山我遐。」

²⁰ 亞哈就派人去以色列眾人遐，召集先知去迦密山。

²¹ 以利亞行倚眾人，對𪜶講：「恁心存兩意無欲決斷，欲到什麼時？若上主是上帝，就著順趁上主；若巴力是上帝，就著順趁巴力。」眾人一句話都無應。

²² 以利亞閣給眾人講：「上主的先知只有賰我一個，毋拘巴力的先知有四百五十人。

²³ 給阮牽兩隻牛仔來，巴力的先知先揀一隻，切歸塊歸塊，下佇柴頂，毋通起火；我嘛會準備另外彼隻牛，下佇柴頂，嘛𣍐起火。

²⁴ 互巴力的先知求叫𪜶神明的名，我求叫上主的名。叨一個用火回應祈禱，彼個就是上帝。」眾人攏贊成。

²⁵ 以利亞對巴力的先知講：「恁揀一隻牛仔，先去準備，因為恁人較多，恁求叫恁的神明的名，毋拘毋通起火。」

²⁶ 許個先知將互𪜶的牛仔攢好勢；對早起到日晝求叫巴力的名，講：「巴力啊，著應阮。」毋拘無聲無說，攏無應答；𪜶佇所起的壇周圍趒跳。

²⁷ 到中晝，以利亞譏刺𪜶講：「喝較大聲咧！伊是神明，可能伊是啲默想，抑是啲無閒，抑是出外去旅遊，抑是啲睏，恁著給伊叫醒。」

²⁸ 𪜶大聲求叫，照𪜶的儀式，用刀刜，用槍鑿家己，致到歸身軀流血。

²⁹ 對過晝到獻下昏祭的時，𪜶大聲嚷，烏白喝；毋拘攏無應答，無動靜，嘛無什麼回應。

³⁰ 以利亞給眾人講：「恁倚來我遮。」眾人就近倚來伊遐；伊就整修倒壞的上主的祭壇。

³¹ 以利亞照雅各子孫十二支族的數目提十二塊石；上主曾對雅各講：「你的名欲叫做以色列。」

³² 以利亞用諸個石頭，奉上主的名起一座壇，佇壇的周圍開會貯得十四公升種籽的溝。

³³ 閣排柴，將牛切一塊一塊，下佇柴頂；講：「用四桶貯淀淀的水，摒佇燒化祭及柴的頂面。」

³⁴ 閣講：「摒第二遍。」𪜶就摒第二遍；閣講：「摒第三遍。」𪜶就摒第三遍。

³⁵ 水流佇壇的四圍，溝嘛有水滿滿。

³⁶ 到獻下昏祭的時，先知以利亞行倚祭壇，講：「上主 — 亞伯拉罕、以撒、雅各的上帝，求你今仔日互人知你是以色列的上帝，嘛知我是你的僕人，閣照你的話做諸個一切的代誌。

³⁷ 上主啊，著應我，著應我，互諸個人民知上主你就是上帝，互𪜶的心越倒轉。」

³⁸ 上主就降火，將燒化祭、柴、石頭，及土燒了了，溝內的水攏燒甲焦焦。

³⁹ 眾人看著，就仆佇土腳講：「上主，伊是上帝！上主，伊是上帝。」

⁴⁰ 以利亞給𪜶講：「給巴力的先知掠起來，連一個都毋通互走去。」眾人就掠𪜶；以利亞就帶𪜶落去基順溪邊，佇遐給𪜶刣死。

旱災結束

⁴¹ 以利亞給亞哈講：「今你通去飲食；因為有聽著大雨的聲。」

⁴² 亞哈就去飲食。以利亞上去迦密山頂，跪佇土腳，面俯佇兩個腳頭窩的中央。

⁴³ 以利亞對伊的僕人講：「你上去，看海彼旁。」 僕人就上去看，講：「無看著什麼。」 以利亞講：「你閣去。」伊連續叫伊去看七遍。

⁴⁴ 到第七遍，僕人給伊講：「有看著雲對海裡起來，親像手盤赫細。」 以利亞講：「你去對亞哈講：『著準備車落去，才免互雨阻擋。』」

⁴⁵ 一時仔久，天因為風及雲變烏暗，落大雨。亞哈就坐車去耶斯列。

⁴⁶ 上主的氣力臨到以利亞，伊就腰帶縛好勢，歸綴路走佇亞哈的頭前，直到耶斯列的城門。