列王紀上卷 17 - 現代台語譯本漢字版

以利亞預言曠旱

¹ 住佇基列的提斯比人以利亞對亞哈講：「我指我所服事永活上主 — 以色列的上帝咒誓：『此幾年，我若無祈求，就無露水，嘛𣍐落雨。』」

² 上主的話臨到以利亞講：

³ 「你著離開遮，斡對東旁去，匿𫢶約旦河的東勢基立溪邊。

⁴ 你欲飲彼條溪的水；我已經命令烏鴉佇遐供給你。」

⁵ 伊就照上主的話，去𫢶佇約旦東勢的基立溪。

⁶ 逐日的早起時及日落的時，烏鴉攏帶餅及肉來互伊；伊飲溪裡的水。

⁷ 後來溪水焦，因為彼個地方無落雨。

以利亞及撒勒法的寡婦

⁸ 上主的話臨到以利亞，講：

⁹ 「起來，去西頓的撒勒法，住𫢶遐。我已經命令彼所在一個寡婦供給你。」

¹⁰ 伊就起來，去撒勒法；到城門的時，抵好有一個寡婦佇遐啲拾柴。以利亞就叫伊，講：「請用器具舀淡薄水互我飲。」

¹¹ 伊去舀水的時，以利亞閣叫伊講：「請順手提淡薄餅來互我。」

¹² 婦仁人講：「我指永活的上主 — 你的上帝咒誓，我連一塊餅都無，桶仔內只有一把仔麵粉，瓶內嘛只有一屑仔油。你看，我拾此兩枝柴，欲倒去為著我及我的子做餅；阮食了就欲等死。」

¹³ 以利亞給伊講：「免驚！你去，照你所講的去做；毋拘代先做一塊細塊餅互我，然後為著你及你的子做餅。

¹⁴ 因為上主 — 以色列的上帝按呢講：『桶內的麵粉𣍐減少，瓶內的油用𣍐了，直到上主落雨彼日。』」

¹⁵ 婦仁人就照以利亞的話做。以利亞、婦仁人，以及伊厝內的人食真多日，

¹⁶ 抵照上主通過以利亞所講的，桶內的麵粉無了，瓶內的油無減。

¹⁷ 諸個代誌了後，彼家的女主人的子破病，病甲真傷重，煞斷氣。

¹⁸ 婦仁人給以利亞講：「上帝重用的人啊，我及你有什麼關係？你來我遮煞互上帝想起我的罪，害我的子死。」

¹⁹ 以利亞給伊講：「將你的子交互我。」以利亞對婦仁人的胸前給囝仔抱去，帶去樓頂伊的房間，下佇伊家己的眠床。

²⁰ 伊求叫上主講：「上主 — 我的上帝啊，我住佇此個寡婦的厝，你哪欲降災禍互伊，害死伊的子？」

²¹ 以利亞就仆佇囝仔的身軀三遍，祈求上主講：「上主 — 我的上帝啊，求你互此個囝仔回魂。」

²² 上主聽以利亞的祈禱，互囝仔回魂，閣活起來。

²³ 以利亞就抱彼個囝仔對樓頂落來，入去厝內交互囝仔的老母。以利亞講：「你看，你的子活啦。」

²⁴ 婦仁人對以利亞講：「今我知你是上帝重用的人，上主通過你所講的話攏是真實。」