列王紀上卷 15 - 現代台語譯本漢字版

猶大王亞比雅

¹ 尼八的子以色列王耶羅波安第十八年，亞比雅做猶大王，

² 佇耶路撒冷作王三年；伊的老母叫做瑪迦，是押沙龍的查某子。

³ 亞比雅做伊的老父以前所做一切的罪惡；伊的心無親像伊的阿祖大闢的心完全順服上主 — 伊的上帝。

⁴ 毋拘上主 — 伊的上帝因為大闢的緣故，互伊佇耶路撒冷有一葩燈，互伊的子續接伊的位，閣互耶路撒冷堅固。

⁵ 大闢佇赫人烏利亞彼件事以外，攏做上主看做好的事，一生無違背上主的命令。

⁶ 羅波安及耶羅波安常常交戰。

⁷ 亞比雅其他的事蹟，伊所做一切的事攏記載佇猶大列王史。亞比雅嘛曾及耶羅波安交戰。

⁸ 亞比雅轉去伊的列祖遐，人給伊安葬佇大闢城；伊的子亞撒續接伊作王。

猶大王亞撒

⁹ 以色列王耶羅波安第二十年，亞撒做猶大王。

¹⁰ 伊佇耶路撒冷作王四十一年；伊的阿嬤叫做瑪迦，是押沙龍的查某子。

¹¹ 亞撒親像伊的祖大闢做上主看做好的事，

¹² 對國內除去孌童，以及伊的祖先所造一切的偶像；

¹³ 閣廢除伊的阿嬤瑪迦太后的位，因為瑪迦有造亞舍拉可惡的神像。亞撒將神像剉掉，佇汲淪溪谷放火燒。

¹⁴ 雖然許個山頭壇猶未除去，毋拘亞撒一生完全順服上主。

¹⁵ 伊將伊的老父及伊本身分別作聖的金、銀，及器具，攏帶入上主的聖殿。

¹⁶ 亞撒及以色列王巴沙常常交戰。

¹⁷ 以色列王巴沙來攻擊猶大，修建拉瑪城，欲阻擋人佇猶大王亞撒遐出入。

¹⁸ 亞撒就將上主聖殿及王宮的府庫賰的金銀，攏交互伊的人臣，派𪜶去大馬士革見敘利亞王，希旬的孫，他伯臨門的子便‧哈達，對伊講：

¹⁹ 「咱來結盟，親像你的老父曾及我的老父結盟。今我用金銀做禮物送你，請你廢除你及以色列王巴沙立的約，互伊對猶大撤退。」

²⁰ 便‧哈達同意亞撒王的話，就派伊的軍長去攻擊以色列的城，攻破以雲、但、亞伯‧伯‧瑪迦、加利利湖附近的地區、拿弗他利地區。

²¹ 巴沙聽著此個消息，就停工無閣修建拉瑪，猶原住佇得撒。

²² 對按呢，亞撒王命令猶大所有的人民，逐個人攏著服從，將巴沙用來欲修建拉瑪的石頭及柴料，搬去重建便雅憫地區的迦巴及米斯巴。

²³ 亞撒其他的事蹟、伊的成就、伊所做的事，及伊所起的城，攏記載佇猶大列王史。亞撒年老的時，致著腳的病。

²⁴ 亞撒轉去伊的列祖遐，及伊的列祖安葬佇大闢城；伊的子約沙法續接伊作王。

以色列王拿答

²⁵ 猶大王亞撒第二年，耶羅波安的子拿答做以色列王。伊統治以色列兩年。

²⁶ 拿答做上主看做歹的事，行伊老父的路，及伊的老父仝款互以色列人陷落罪。

²⁷ 以薩迦支族亞希雅的子巴沙背叛拿答。拿答及以色列軍兵圍困非利士人的基比頓城的時，巴沙給伊刣死。

²⁸ 猶大王亞撒第三年，巴沙刣死拿答，篡伊的位。

²⁹ 巴沙一下作王，就刣死耶羅波安全家，將所有會喘氣的攏剿滅，無給耶羅波安留一個；抵抵照上主通過伊的僕人示羅人亞希雅所講的話。

³⁰ 這是因為耶羅波安有犯罪，閣互以色列人陷落罪；伊按呢做有激動上主 — 以色列的上帝受氣。

³¹ 拿答其他的事蹟，及伊所做一切的事，攏記載佇以色列列王史。

³² 亞撒及以色列王巴沙常常交戰。

以色列王巴沙

³³ 猶大王亞撒第三年，亞希雅的子巴沙佇得撒做以色列人民的王二十四年。

³⁴ 伊做上主看做歹的事，行耶羅波安的路，互所有的以色列人陷落罪。