列王紀上卷 14 - 現代台語譯本漢字版

耶羅波安的子死

¹ 彼時，耶羅波安的子亞比雅破病；

² 耶羅波安給伊的某講：「你起來變裝，去示羅；互人知你是耶羅波安的某。先知亞希雅住佇遐；伊曾預言講我欲做諸個人民的王。

³ 今你著帶十塊麵包、一寡餅，及一罐蜜，去見伊；伊會給你講咱的子會按怎。」

⁴ 耶羅波安的某就照按呢出發去示羅，來到亞希雅𪜶兜。亞希雅因為年老，目睭柴柴無看見。

⁵ 上主給亞希雅講：「耶羅波安的某來，欲為著伊破病的子問你；你著按呢按呢給伊講。伊來的時，會裝做別個婦仁人。」

⁶ 伊抵仔入門，亞希雅聽著伊的腳步聲，就講：「耶羅波安的某，入來！你是按怎裝做別個婦仁人？我欲給你報一個歹消息。

⁷ 你倒去給耶羅波安講：『上主 — 以色列的上帝按呢講：我對人民中間提拔你，設立你做我子民以色列的統治者，

⁸ 對大闢家將王國分裂賞賜互你；毋拘你無親像我的僕人大闢遵守我的誡命，全心順趁我，做我看做正直的事。

⁹ 你竟然做歹超過所有你以前的人，為家己造別個神明，鑄偶像，激我受氣，將我擲佇你的尻脊後。

¹⁰ 因為按呢，我欲互災禍臨到耶羅波安的家，將以色列中屬耶羅波安的查甫人，無論自由的抑是無自由的，攏給𪜶消滅。我嘛欲將耶羅波安的家攏除滅，親像啲燒糞埽，給伊燒盡。

¹¹ 所有屬耶羅波安的人，死佇城內的，狗會給食；死佇野外的，空中的鳥會飛來食。上主按呢宣告。』

¹² 「今你倒去恁兜；你的腳一下踏入城，你的子就會死。

¹³ 以色列人民會為著伊啼哭，給伊埋葬；屬耶羅波安的人，只有伊得著安葬，因為佇耶羅波安的家，只有伊曾做一寡事互上主 — 以色列的上帝歡喜。

¹⁴ 上主欲為著家己興起一個王，統治以色列；伊欲消滅耶羅波安的家。什麼時會發生？就是現在！

¹⁵ 上主欲拍以色列，互𪜶搖動，親像水中的蘆葦；閣欲對伊賞賜𪜶列祖的好土地給𪜶拔出來，互𪜶四散佇幼發拉底河的彼旁，因為𪜶造亞舍拉女神的柱像，激上主受氣。

¹⁶ 耶羅波安本身犯罪，閣互以色列人陷落罪，所以上主欲棄拺以色列。」

¹⁷ 耶羅波安的某起身倒去得撒；抵仔到厝的戶橂，伊的子就死。

¹⁸ 以色列人民為著伊啼哭，給伊埋葬，抵抵照上主通過伊的僕人先知亞希雅所講的話。

耶羅波安死

¹⁹ 耶羅波安其他的事蹟，伊按怎交戰，按怎作王，攏記載佇以色列列王史。

²⁰ 耶羅波安作王共二十二年，就轉去伊的列祖遐；伊的子拿答續接伊作王。

猶大王羅波安

²¹ 所羅門的子羅波安佇猶大作王。羅波安坐位的時四十一歲。伊佇耶路撒冷作王十七年；耶路撒冷是上主對以色列眾支族中揀選互人來敬拜伊的城。羅波安的老母叫做拿瑪，是亞捫人。

²² 猶大人民做上主看做歹的事，𪜶犯的罪比𪜶列祖所犯的閣較重，激動上主怨妒。

²³ 因為𪜶佇逐個高的山崙仔，逐欉青翠的樹下面，起山頭壇，造石柱像及亞舍拉女神。

²⁴ 國內閣有孌童；以色列人學上主佇𪜶面前趕出的外族人所做可惡的事。

²⁵ 羅波安王第五年，埃及王示撒上來攻擊耶路撒冷，

²⁶ 將上主聖殿及王宮的寶物攏搶去，閣搶所羅門所做許個金的盾牌。

²⁷ 羅波安王做銅的盾牌代替許個金盾牌，交互顧王宮大門的侍衛長顧守。

²⁸ 王逐遍入上主的殿，侍衛就夯諸個盾牌，後來閣帶倒轉下佇侍衛室。

²⁹ 羅波安其他的事蹟，及伊所做一切的事攏記載佇猶大列王史。

³⁰ 羅波安及耶羅波安常常交戰。

³¹ 羅波安轉去伊的列祖遐，及伊的列祖安葬佇大闢城。伊的老母叫做拿瑪，是亞捫人。羅波安的子亞比雅續接伊作王。