列王紀上卷 12 - 現代台語譯本漢字版北部支族反叛 ( 代下 10.1-19 ) 1 羅波安去示劍,因為以色列人民欲佇遐設立伊作王。 2 以前尼八的子耶羅波安為著閃避所羅門王,走去住佇埃及。耶羅波安猶佇埃及的時,聽著羅波安作王的消息。 3 以色列人差人去請伊倒來;耶羅波安就及以色列會眾來見羅波安,對伊講: 4 「你的老父互阮背重的擔;求你減輕你的老父下佇阮肩頭頂的重擔,減少阮的苦工,阮就服事你。」 5 羅波安給𪜶講:「恁倒去,三日後才閣來。」人民就倒去。 6 羅波安的老父所羅門猶活啲的時,有元老服事伊;羅波安王請教𪜶,講:「恁有什麼計策,我通回復諸個人民?」 7 𪜶應伊講:「今仔日你若願意做諸個人民的僕人服事𪜶,用好話回答𪜶,𪜶就會永遠做你的僕人。」 8 毋拘羅波安拒絕諸個元老互伊的計策,去及許個及伊做夥大漢,服事伊的少年人參詳; 9 伊給𪜶講:「諸個人民有對我講:『求你減輕你的老父下佇阮肩頭頂的重擔。』今恁有什麼意見互咱通給𪜶回復?」 10 許個及伊做夥大漢的少年人給伊講:「諸個人民對王講:『求你減輕你的老父下佇阮肩頭頂的重擔。』王著按呢應𪜶講:『我的尾指比我的老父的腰較粗。 11 我的老父互恁背重的擔,我欲互恁閣較重的擔;我的老父用鞭刑罰恁,我欲用鐵刺的鞭刑罰恁。』」 12 耶羅波安及眾人民照羅波安王的話,佇第三日倒來見伊。 13 王用歹聲嗽應人民;伊毋聽元老互伊的建議, 14 照少年人的意見對人民講:「我的老父互恁背重的擔,我欲互恁閣較重的擔;我的老父用鞭刑罰恁,我欲用鐵刺的鞭刑罰恁。」 15 王毋肯聽人民的請求,因為此個代誌是出佇上主,欲實現上主通過示羅人亞希雅對尼八的子耶羅波安所講的話。 16 以色列眾人民一下知王毋肯聽𪜶的請求,就對王講: 大闢的王國阮無份; 耶西的子及阮無關係。 以色列人啊,恁攏倒去恁兜! 今,大闢家,恁家己顧互好! 對按呢,以色列人攏倒去𪜶兜。 17 毋拘羅波安猶原做住佇南部猶大地區的以色列人的王。 18 羅波安王派監督強制勞工的亞多蘭去以色列人遐;以色列人民用石頭給伊抌死。羅波安王就趕緊上戰車走倒去耶路撒冷。 19 對按呢,北部的以色列人反叛大闢家,到今仔日。 20 以色列人民聽著耶羅波安倒來,就差人請伊去全會眾面前,設立伊做以色列人民的王。猶大支族以外,無人隨大闢家。 示瑪雅的預言 ( 代下 11.1-4 ) 21 羅波安到耶路撒冷,就聚集猶大家及便雅憫支族特選的戰士,共十八萬人,欲及以色列家交戰,互歸個王國閣歸屬所羅門的後代。 22 毋拘上帝的話臨到上帝重用的人示瑪雅,講: 23 「你去給所羅門的子猶大王羅波安,猶大及便雅憫全家,以及其他的人民講: 24 『上主按呢講:恁毋通去及恁的兄弟以色列人交戰;逐個人倒去家己的厝,因為此個代誌出佇我。』」𪜶就聽趁上主的話倒轉去。 耶羅波安離開上主 25 耶羅波安佇以法蓮山區重建示劍,住佇遐;後來離開示劍,重建比努伊勒。 26 耶羅波安心內講:「今此個國毋知會閣歸屬大闢家𣍐; 27 諸個人民若上去耶路撒冷佇上主的殿獻祭,𪜶的心會歸向𪜶的主猶大王羅波安;𪜶會給我刣死,閣倒去歸屬猶大王羅波安。」 28 王及人參詳了後,決定鑄造兩隻金的牛仔,就對人民講:「恁去耶路撒冷敬拜傷辛苦。以色列,看咧,諸個是導恁對埃及地出來的神明。」 29 伊下一隻佇伯特利,一隻佇但。 30 此個代誌互以色列人民陷落罪,因為𪜶去但及伯特利拜金牛仔。 31 王佇山頭起殿;設立毋是利未支族的人做祭司。 32 耶羅波安學猶大定節期守節,毋拘將日期定佇八月十五;閣佇祭壇獻祭。伊將所設立山頭壇的祭司派去伯特利,家己嘛去伯特利獻祭互伊所鑄的金牛仔。 33 伊佇八月十五,就是伊照家己的意思定的日,去伯特利佇伊所起造的祭壇獻祭;伊給以色列人定節期,閣佇祭壇獻祭燒香。 |
The Bible Society in Taiwan, 2021
Bible Society in Taiwan