列王紀上卷 11 - 現代台語譯本漢字版

所羅門離開上主

¹ 法老的查某子以外，所羅門王嘛愛真多外邦的查某囝仔，包含摩押、亞捫、以東、西頓，及赫人的查某囝仔。

² 上主曾命令以色列人，講：「恁毋通及許個外族人通婚，因為𪜶會引誘恁的心去隨別個神明。」毋拘所羅門貪戀許個查某囝仔。

³ 伊有娶七百個公主做某，閣有嬪妃三百；諸個女子誘惑伊的心。

⁴ 所羅門年老的時，諸個某誘惑伊去隨別個神明；伊的心無親像伊的老父大闢的心完全順服上主 — 伊的上帝。

⁵ 所羅門去隨西頓人的女神亞斯她錄，及亞捫人通厭惡的神明摩洛。

⁶ 所羅門做上主看做歹的事，無親像伊的老父大闢全心順服上主。

⁷ 彼時，所羅門為著摩押通厭惡的神明基抹，及亞捫人通厭惡的神明摩洛，佇耶路撒冷對面的山頂起山頭壇。

⁸ 許個外邦的某攏對𪜶的神明燒香獻祭；所羅門嘛為著𪜶按呢做。

⁹ 上主對所羅門受氣，因為伊的心離開曾兩遍對伊出現的上主 — 以色列的上帝；

¹⁰ 上主曾命令伊毋通拜別個神明。毋拘所羅門無遵守上主的命令。

¹¹ 上主就對所羅門講：「因為你已經做此款代誌，無遵守我的約，及我命令你的規例，所以我一定欲拆裂你的王國，將伊賜互你的人臣。

¹² 毋拘因為你的老父大闢的緣故，我𣍐佇你活啲的時做此個代誌；我欲對你的子的手拆裂此個國。

¹³ 總是我無欲將全國拆裂，會因為我的僕人大闢及我所揀的耶路撒冷的緣故，留一支族互你的子。」

所羅門的對敵

¹⁴ 上主興起一個對敵攻擊所羅門，就是以東人哈達，伊是以東王的後代。

^15-16 早前大闢拍以東的時，元帥約押去埋葬戰死的以色列人。約押及以色列軍兵𫢶遐六個月的中間，刣死以東所有的查甫人。

¹⁷ 彼時哈達猶閣是囝仔。哈達及伊的老父人臣中幾若個以東人，走去埃及。

¹⁸ 𪜶對米甸出發去巴蘭；對巴蘭帶幾若人及𪜶去埃及，到埃及王法老遐。法老就供給厝、米糧，及土地互𪜶。

¹⁹ 哈達佇法老面前得著真大的恩惠；法老閣用王后答比妮的小妹互伊做某。

²⁰ 答比妮的小妹給伊生一個子，號名叫做基努拔。答比妮佇法老的王宮給基努拔飼大漢，閣互伊及法老的子兒做夥住佇王宮。

²¹ 哈達佇埃及聽著大闢轉去伊的列祖遐，元帥約押嘛已經死。哈達就對法老講：「請准我離開，互我倒去我的本國。」

²² 法老給伊講：「你佇我遮豈有欠缺什麼，你哪想欲倒去你本國？」 伊應講：「我無欠什麼，毋拘請准我倒去。」

²³ 上帝閣興起一個對敵攻擊所羅門，就是以利雅大的子利遜；伊是對伊的主瑣巴王哈大底謝遐逃走出來。

²⁴ 大闢刣瑣巴人的時，利遜招集一群人，做彼黨的頭目去住佇大馬士革，佇大馬士革作王。

²⁵ 所羅門活啲的時，利遜及哈達像款做以色列的對敵。利遜統治敘利亞；伊怨恨以色列。

上帝對耶羅波安的應允

²⁶ 尼八的子耶羅波安嘛起來反叛王；伊是所羅門的人臣，是以法蓮支族的洗利達人；伊的老母是寡婦，叫做洗魯雅。

²⁷ 伊出手攻擊王的原因是按呢： 所羅門起造米羅，修補伊的老父大闢城的破隙。

²⁸ 耶羅波安真有才能。所羅門看著此個少年人殷勤，就派伊管理約瑟家所有的工程。

²⁹ 有一日耶羅波安離開耶路撒冷，示羅人先知亞希雅佇路裡抵著伊。彼時亞希雅穿一領新衫；𪜶兩人佇田裡，以外無別人。

³⁰ 亞希雅提伊穿的新衫，拆做十二塊，

³¹ 給耶羅波安講：「你通提十塊，因為上主 — 以色列的上帝按呢講：『你看，我欲對所羅門的手拆裂伊的王國，將十支族互你。

³² 毋拘因為我的僕人大闢，以及我佇以色列眾支族中所揀的耶路撒冷的緣故，伊猶有一支族。

³³ 因為𪜶棄拺我，去拜西頓人的神明亞斯她錄、摩押的神明基抹，及亞捫人的神明摩洛，無親像伊的老父大闢行我的道路，做我看做正直的事，守我的規例及命令。

³⁴ 毋拘，我無欲對伊的手收回伊全部的王國，猶原欲互伊一世人作王，攏是因為我的僕人大闢的緣故，伊是我所揀選的，有守我的誡命及規例。

³⁵ 總是我欲對伊的子收回王國，用十支族互你；

³⁶ 留一支族互伊的子，通互我的僕人大闢，佇我所揀選互人來敬拜我的城耶路撒冷，不時有一葩燈佇我的面前。

³⁷ 我揀選你，照你所愛的互你做以色列的王。

³⁸ 你若親像我的僕人大闢，聽我所有的命令，行我的道路，做我看做正直的事，守我的規例及誡命，我就及你同在，將以色列交互你，給你建立穩固的王朝，親像我為大闢所做的像款。

³⁹ 我欲因為按呢刑罰大闢的後代，毋拘𣍐到永遠。』」

⁴⁰ 所羅門愛欲刣死耶羅波安，耶羅波安就逃走去埃及，到埃及王示撒遐；伊就𫢶佇埃及到所羅門死。

所羅門死

⁴¹ 所羅門其他的事蹟及伊的智慧，攏記載佇所羅門記。

⁴² 所羅門佇耶路撒冷做以色列全國的王，共四十年。

⁴³ 所羅門轉去伊的列祖遐了後，埋葬佇伊的老父大闢的城。伊的子羅波安續接伊作王。