列王紀上卷 1 - 現代台語譯本漢字版

大闢王的晚年

¹ 大闢王年老歲數多，蓋被嘛蓋𣍐燒。

² 伊的人臣對伊講：「請阮的主阮的王准阮尋一個少年的在室女，來奉待照顧你，睏佇你的身軀邊，互阮的主阮的王得著溫暖。」

³ 𪜶就佇以色列全國尋媠的查某囝仔；尋著書念一個女子，叫做雅比莎，導來王遐。

⁴ 此個查某囝仔真媠；伊奉待侍候王，毋拘王無及伊同房。

亞多尼雅計謀篡位

⁵ 彼時，大闢及哈及生的子亞多尼雅想欲作大，講：「我欲作王。」伊為家己準備戰車及馬兵，閣有五十個兵佇伊頭前開路。

⁶ 伊的老父毋曾給伊責備講：「你是按怎按呢做？」伊佇押沙龍尾後出世，生做不止英俊。

⁷ 亞多尼雅及洗璐雅的子約押，閣及祭司亞比亞他參詳，𪜶就支持伊。

⁸ 毋拘祭司撒督，及耶何耶大的子比拿雅、先知拿單，及示每、利以，及大闢的勇士，攏無擁護亞多尼雅。

⁹ 有一日，亞多尼雅佇隱‧羅結附近的瑣希列石磐遐，刣牛、羊，及肥的牲生獻祭，嘛請伊的眾兄弟，就是王的子，以及猶大所有王的人臣。

¹⁰ 毋拘伊無請先知拿單、比拿雅，及勇士，以及伊的小弟所羅門。

所羅門受選立做王

¹¹ 拿單給所羅門的老母拔示芭講：「哈及的子亞多尼雅作王啦，你豈無聽著？咱的主大闢嘛毋知。

¹² 今你來，我替你拍算，通保全你及你的子所羅門的性命。

¹³ 你入去見大闢王，對伊講：『我的主我的王啊，你豈毋是曾對你的女婢咒誓講，我的子所羅門欲續接你作王，欲坐你的位？是按怎亞多尼雅啲作王？』

¹⁴ 你佇遐及王講話的時，我會隨你的後面入去，來證實你的話。」

¹⁵ 拔示芭入去房間見王；王真老，書念的女子雅比莎啲給伊侍候。

¹⁶ 拔示芭鞠躬拜王；王講：「你愛什麼？」

¹⁷ 伊給王講：「我的主啊，你曾指上主 — 你的上帝對你的女婢咒誓講：『你的子所羅門欲續接我作王，伊欲坐我的位。』

¹⁸ 今亞多尼雅已經自稱作王，我的主我的王你猶毋知。

¹⁹ 伊有刣真多隻牛、羊，及肥的牲生獻祭，閣請王的眾子、祭司亞比亞他，及元帥約押；毋拘伊無請你的子所羅門。

²⁰ 我的主我的王啊，以色列人民的目睭攏啲看你，啲聽候你給𪜶宣布，什麼人欲續接我的主我的王坐王位。

²¹ 若無，我的主我的王轉去你的列祖遐了後，我及我的子所羅門一定會互人看做叛徒。」

²² 拔示芭猶啲及王講話的時，先知拿單入來。

²³ 有人給王報告：「先知拿單佇遮。」拿單到王的面前，仆佇土腳拜王。

²⁴ 拿單講：「我的主我的王，你豈曾講『亞多尼雅欲續接我作王，欲坐我的位』？

²⁵ 伊今仔日落去，刣真多牛、羊，及肥的牲生獻祭，閣請王的眾子，及諸個軍長，以及祭司亞比亞他。𪜶及亞多尼雅做夥飲食，講：『亞多尼雅王萬歲！』

²⁶ 毋拘伊無請我，嘛無請祭司撒督，及耶何耶大的子比拿雅，以及王的僕人所羅門。

²⁷ 這豈是我的主我的王的意思？王你猶毋曾對你的眾人臣宣布，什麼人欲續接我的主我的王坐你的位。」

²⁸ 大闢王應講：「給我叫拔示芭來。」拔示芭就入來，佇王的面前徛啲。

²⁹ 王咒誓講：「我指救我的性命脫離一切患難，永活的上主講：

³⁰ 『我既然有指上主 — 以色列的上帝對你咒誓，你的子所羅門欲續接我作王坐我的位，我今仔日一定欲照按呢做。』」

³¹ 拔示芭就鞠躬仆落去拜王，講：「願我的主大闢王萬萬歲！」

³² 大闢王閣講：「召祭司撒督、先知拿單，及耶何耶大的子比拿雅來。」𪜶就攏來王的面前。

³³ 王給𪜶講：「著導宮廷的官長及恁去，互我的子所羅門騎我的騾落去基訓。

³⁴ 佇遐，祭司撒督及先知拿單著用油抹伊做以色列王。恁嘛著歕哨角宣布：『所羅門王萬歲！』

³⁵ 然後恁隨伊上來，互伊來坐我的位，續接我作王；我選立伊統治以色列及猶大。」

³⁶ 耶何耶大的子比拿雅應王講：「阿們！願上主 — 我的主我的王的上帝嘛按呢宣布。

³⁷ 上主按怎及我的主我的王同在，願伊嘛按呢及所羅門同在，閣互伊的王權比我的主大闢王的王權閣較偉大。」

³⁸ 祭司撒督、先知拿單、耶何耶大的子比拿雅、基利提人及比利提人，就攏落去，互所羅門騎大闢王的騾，送伊到基訓。

³⁹ 祭司撒督就對會幕提貯油的角，用油抹所羅門；𪜶就歕哨角，人民攏喝講：「所羅門王萬歲！」

⁴⁰ 人民隨伊上來，閣歕𥰔仔，非常歡喜，歡呼的聲大甲地強欲裂開。

⁴¹ 亞多尼雅以及及伊做夥的人客抵仔食桌煞，聽見歡呼的聲。約押聽著哨角的聲就問：「城內是按怎有嘩嘩哮的聲？」

⁴² 伊猶啲講的時，祭司亞比亞他的子約拿單來。亞多尼雅給伊講：「入來，你是忠實的人，一定是欲報好消息。」

⁴³ 約拿單應亞多尼雅講：「咱的主大闢王已經設立所羅門作王。

⁴⁴ 王派祭司撒督、先知拿單、耶何耶大的子比拿雅、基利提人及比利提人，及所羅門做夥去；𪜶互所羅門騎王的騾。

⁴⁵ 祭司撒督及先知拿單，已經佇基訓給伊抹油互伊作王；𪜶攏對遐護送伊入城，歸城大聲歡呼；這就是恁所聽著的聲。

⁴⁶ 閣所羅門嘛已經坐王位。

⁴⁷ 王的人臣攏來給咱的主大闢王祝福，講：『願你的上帝互所羅門的名比你的名閣較尊貴，互伊的王權比你的王權閣較偉大。』王佇床裡俯落去敬拜，

⁴⁸ 祈禱講：『上主 — 以色列的上帝應該受稱讚，因為伊有賞賜一個人今仔日坐我的位，互我親目看著。』」

⁴⁹ 所有及亞多尼雅做夥的人客攏驚甲皮皮惙，隨人逃走。

⁵⁰ 亞多尼雅因為非常驚所羅門，就去擒祭壇的角。

⁵¹ 有人給所羅門講：「亞多尼雅驚所羅門王，去擒佇祭壇的角，講：『求所羅門王今仔日對我咒誓，一定無欲用刀刣死伊的僕人。』」

⁵² 所羅門講：「伊若對我盡忠，連一支頭毛嘛𣍐落佇土腳；伊若作惡，一定著死。」

⁵³ 所羅門王就差人對祭壇給伊導落來，亞多尼雅就來佇所羅門王面前跪拜。所羅門給伊講：「你倒去恁兜。」