出埃及記 9 - 現代台語譯本漢字版

5. 瘟疫的災難

¹ 上主對摩西講：「你去見埃及王，給伊講：『上主 — 希伯來人的上帝按呢講：著放我的子民離開，互𪜶通敬拜我。

² 你若毋放𪜶去，猶原欲強迫𪜶留啲，

³ 上主就欲用伊的權能降嚴重的瘟疫佇你田野的牲生、馬、驢、駱駝、牛群、羊群。

⁴ 上主欲分別以色列人的牲生及埃及人的牲生；所有屬以色列人的牲生，連一隻都𣍐死。』」

⁵ 上主就設定欲降瘟疫的時間，講：「明仔載上主欲佇此個地做此項事。」

⁶ 隔日上主就做此個事；埃及的牲生攏死，毋拘，以色列人的牲生連一隻都無死。

⁷ 埃及王派人去看，以色列人的牲生連一隻都無死。毋拘埃及王的心固執，毋放此個民族離開。

6. 粒仔的災難

⁸ 上主對摩西及亞倫講：「恁著捧歸捧火爐的火灰；摩西著佇埃及王的面前將火灰向天撒去。

⁹ 火灰會佇埃及全地變做塵埃，落佇埃及全地的人及牲生的身軀，生粒仔，成做瘡。」

¹⁰ 𪜶兩人就捧火灰，去佇埃及王的面前；摩西向天撒去，人及牲生的身軀就生粒仔，成做瘡。

¹¹ 術士無法度佇摩西面前做此個事；𪜶及所有的埃及人攏生粒仔。

¹² 上主互埃及王的心硬，毋聽摩西及亞倫的話；抵抵照上主對摩西講的。

7. 冰雹的災難

¹³ 上主對摩西講：「明仔載你著透早起來，去徛佇埃及王的面前，對伊講：『上主 — 希伯來人的上帝按呢講：著放我的子民離開，互𪜶通敬拜我。

¹⁴ 此遍，我欲互閣較嚴重的災難臨到你及你的人臣，以及人民，互你知，佇普天下無一個會當及我比。

¹⁵ 現在，我若伸手用瘟疫攻擊你及你的人民，你就會對地上受消滅；

¹⁶ 總是為著欲互你看見我的權能，互我的名佇全世界受宣揚，我才留你的性命。

¹⁷ 毋拘你猶原阻擋我的子民，毋放𪜶離開。

¹⁸ 今，明仔載此個時，我欲降極大的冰雹，對埃及開國以來毋曾發生過。

¹⁹ 現在你著派人，將你所有佇田野的人及牲生攏帶去安全的所在；許個留佇室外的，無論人抑是牲生，攏會互冰雹抌死。』」

²⁰ 埃及王許個驚畏上主的話的人臣，就將𪜶的奴僕及牲生帶到安全的所在。

²¹ 毋拘許個無將上主的話看做要緊的，就將𪜶的奴僕及牲生留佇田野。

²² 上主對摩西講：「你向天伸手，埃及全地就會有冰雹落佇人、牲生，及田野所有的菜蔬。」

²³ 摩西攑伊的柺仔指天，上主就互埃及地有雷公熠爁，落冰雹；

²⁴ 雹啲落，閣有熠爁，情形非常嚴重；對埃及開國以來毋曾發生過。

²⁵ 佇埃及全地，冰雹拍所有佇田野的人及牲生，閣毀壞園裡的菜蔬，拍斷野地的樹木。

²⁶ 只有以色列人徛起的歌珊地區無落雹。

²⁷ 埃及王派人叫摩西及亞倫來，對𪜶講：「此遍我犯罪啦。上主是公義，我及我的人民做毋著。

²⁸ 上帝的雷及冰雹已經夠額啦。請為著阮祈求上主。我欲准恁離開；恁毋免閣留佇遮。」

²⁹ 摩西對伊講：「我一下出城，就欲攑雙手向上主祈禱；雷欲煞，冰雹會停，按呢欲互你知，大地攏屬佇上主。

³⁰ 毋拘我知，你及你的人臣猶無真正驚畏主上帝。」

³¹ 彼時，麻及大麥攏受損壞，因為大麥已經出穗，麻嘛開花。

³² 毋拘小麥及粗麥無受損壞，因為猶未大欉。

³³ 摩西離開埃及王出城，攑雙手向上主祈禱，雷及冰雹就停止，雨嘛無閣摒落地面。

³⁴ 埃及王看著雨、冰雹，及雷攏停止，就閣犯罪；伊及伊的人臣攏硬𪜶的心。

³⁵ 埃及王心硬，毋放以色列人離開，抵抵照上主對摩西講的。