出埃及記 8 - 現代台語譯本漢字版

2. 水雞的災難

¹ 上主對摩西講：「你去埃及王遐，給伊講：『上主按呢講：放我的子民離開，互𪜶通敬拜我。

² 你若毋放𪜶去，我欲用水雞擾亂恁全國。

³ 尼羅河欲生足多水雞，𪜶欲對河裡起來，入去你的宮殿、你的房間，𬦰上你的眠床，閣欲進入你的人臣的厝，跳上你的人民的身軀，進入你的灶及抄麵粉的器具。

⁴ 水雞閣欲跳上你、你的人民，及所有人臣的身軀。』」

⁵ 上主閣對摩西講：「你給亞倫講：『攑你的柺仔指尼羅河、溪，及水池，互水雞𬦰起來埃及地。』」

⁶ 亞倫伸手指埃及全地的水；水雞就跳起來，蓋滿埃及地。

⁷ 埃及的術士用𪜶的法術嘛按呢做，互水雞上來埃及地。

⁸ 埃及王叫摩西及亞倫來，講：「請恁求上主互諸個水雞離開我及我的人民；我就欲互此個民族離開，去向上主獻祭。」

⁹ 摩西對埃及王講：「好！請給我講，什麼時通為著你、你的人臣，及人民祈禱，將水雞對你及王宮除滅，互水雞只有留佇尼羅河。」

¹⁰ 伊講：「明仔載。」 摩西講：「我會照你的要求做，按呢你就知，無一個會當及上主 — 阮的上帝比。

¹¹ 水雞會離開你及王宮，離開你的人臣及人民，只有留佇尼羅河。」

¹² 摩西及亞倫離開埃及王出去；摩西為著上主派來損壞埃及王的水雞，求叫上主。

¹³ 上主照摩西的懇求去做，互佇厝內、埕裡，及田野的水雞攏死。

¹⁴ 人給𪜶拾一堆一堆；埃及全地攏是臭味。

¹⁵ 埃及王看著代誌有解決，就硬伊的心，毋聽摩西及亞倫的話；抵抵照上主所講的。

3. 蝨母的災難

¹⁶ 上主對摩西講：「你著給亞倫講：『攑你的柺仔拍土粉，互埃及全地的土粉變做蝨母。』」

¹⁷ 𪜶就按呢做；亞倫攑柺仔拍土粉，人及牲生的身軀就攏有蝨母。埃及全地的土粉攏變做蝨母。

¹⁸ 人及牲生的身軀攏有蝨母。術士用𪜶的法術嘛欲互土粉變做蝨母，毋拘無法度。

¹⁹ 術士對埃及王講：「這是上帝的作為。」毋拘埃及王的心硬，毋聽摩西及亞倫的話；抵抵照上主講的。

4. 胡蠅的災難

²⁰ 上主對摩西講：「明仔早起，埃及王會去尼羅河；你著徛佇伊的面前，對伊講：『上主按呢講：放我的子民離開，去敬拜我。

²¹ 你若毋肯，我欲派歸群胡蠅飛來你遮，佇你的人臣及人民的身上，閣入王宮；埃及人的厝，及𪜶住的所在，嘛欲有歸群的胡蠅。

²² 彼日，我欲將我的子民徛起的歌珊地區分別出來；佇遐無歸群胡蠅。我按呢做，是欲互你知我上主是全地的主。

²³ 我欲將我的子民及你的人民分開；明仔載此個神跡一定會發生。』」

²⁴ 上主就按呢做。胡蠅歸陣飛入埃及王的宮殿及伊的人臣的厝；埃及全地攏因為歸群的胡蠅荒廢。

²⁵ 埃及王就叫摩西及亞倫來，講：「恁去，佇我的境內向恁的上帝獻祭。」

²⁶ 摩西應伊講：「按呢做𣍐通；因為阮欲獻互上主 — 阮的上帝的祭物，埃及人看做禁忌。阮若佇埃及人的面前用𪜶看做禁忌的物獻祭，𪜶豈𣍐用石頭給阮抌死？

²⁷ 阮欲行三日的路程去曠野，照上主 — 阮的上帝的命令獻祭互伊。」

²⁸ 埃及王講：「我允准恁離開，互恁佇曠野向上主 — 恁的上帝獻祭，毋拘𣍐用得去傷遠。閣恁著替我祈禱。」

²⁹ 摩西講：「我欲對你遮出去，向上主祈禱，求伊互歸陣胡蠅明仔載離開埃及王及你的人臣，以及人民。毋拘埃及王毋通閣騙阮，毋准此個民族離開去獻祭互上主。」

³⁰ 摩西就對埃及王遐出去，向上主祈禱。

³¹ 上主就照摩西的懇求，互胡蠅攏離開埃及王及伊的人臣，以及人民，無留半隻。

³² 此遍埃及王閣硬伊的心，毋放此個民族離開。