出埃及記 5 - 現代台語譯本漢字版

摩西及亞倫見埃及王

¹ 後來，摩西及亞倫去見埃及王，對伊講：「上主 — 以色列的上帝按呢講：『著互我的子民去曠野守節敬拜我。』」

² 埃及王講：「上主是啥人？我哪著聽伊的話，互以色列人離開？我毋識伊，嘛不准以色列人離開。」

³ 摩西及亞倫講：「希伯來人的上帝對阮顯現；請互阮行三日的路程去曠野，向上主 — 阮的上帝獻祭，才免伊用瘟疫及刀劍傷害阮。」

⁴ 埃及王給𪜶講：「摩西、亞倫，恁是按怎叫此個百姓作工？轉去作工！」

⁵ 埃及王閣講：「現在，此個民族人即多，恁竟然叫𪜶停工。」

⁶ 彼日，埃及王命令埃及的督工及以色列的工頭，講：

⁷ 「恁閣親像以前款麥稿互此個百姓做磚仔；麥稿，互𪜶家己去拾。

⁸ 著要求𪜶做及以前仝款數目的磚仔，連一塊都𣍐減得。𪜶貧憚，所以大聲要求欲出去向𪜶的上帝獻祭。

⁹ 著互諸個人做較重的工作，互𪜶悿甲𣍐去聽人使弄。」

¹⁰ 埃及的督工及以色列的工頭對人民宣布：「埃及王按呢講：『我無欲閣麥稿互恁。

¹¹ 恁家己去尋，家己去拾，毋拘恁交出來的磚仔𣍐用得減少。』」

¹² 以色列人就四散去埃及全地，拾麥欉的頭代替麥稿。

¹³ 督工壓迫𪜶，講：「恁逐日交出來的磚仔的數目，著及有互恁麥稿的時像款。」

¹⁴ 埃及王的督工拍𪜶派去管理以色列人的工頭，講：「此幾日恁哪無照以前規定的數目交磚仔？」

¹⁵ 以色列的工頭就來給埃及王哀求，講：「你是按怎按呢對待阮？

¹⁶ 督工無麥稿互阮，閣要求阮著交像款數目的磚仔。阮互人拍，攏是恁埃及人的毋著。」

¹⁷ 王講：「恁實在貧憚，有夠貧憚，才要求欲去給上主獻祭。

¹⁸ 現在，恁著轉去作工；麥稿毋互恁，磚仔的數量𣍐用得減。」

¹⁹ 以色列人的工頭聽著逐日交磚仔的數量𣍐減得，就知影慘啊。

²⁰ 𪜶對埃及王遐出來的時，抵著摩西及亞倫啲等𪜶。𪜶就給摩西及亞倫講：

²¹ 「願上主監察，給恁刑罰，因為恁害阮互埃及王及伊的人臣怨慼，互𪜶有理由刣阮。」

摩西怨嘆上主

²² 摩西倒轉去上主遐，講：「主啊，你是按怎歹款待此個民族？是按怎派我？

²³ 對我第一遍去見埃及王，奉你的名對伊講話開始，伊就壓迫此個民族；你一屑仔都無救你的子民。」