出埃及記 40 - 現代台語譯本漢字版

搭會幕

¹ 上主吩咐摩西，講：

² 「正月初一，你著將會幕的布棚搭起來。

³ 著將約櫃下佇彼內面，用帳簾給伊隔開；

⁴ 將排獻祭的餅的桌搬入去，給桌頂的物件排好勢；嘛將燈台搬入去，給燈點𤏸。

⁵ 著將燒香的金壇下佇約櫃的頭前，然後掛會幕入口的門簾；

⁶ 將燒化祭的祭壇下佇會幕的布棚門口；

⁷ 將洗盪的盆下佇會幕及祭壇的中間，內面貯水。

⁸ 聖所的四圍著有埕，埕的入口著掛門簾。

⁹ 「你著用聖油抹會幕及內面所有的器具，將會幕及攏總的器具分別作聖，諸個就攏成做聖。

¹⁰ 閣抹燒化祭的祭壇及伊攏總的器具，給壇分別作聖，壇就成做至聖；

¹¹ 嘛著抹洗盪的盆及盆座，給𪜶分別作聖。

¹² 「你著導亞倫及伊的子來會幕的入口，用水給𪜶洗。

¹³ 嘛著給亞倫穿聖的禮服，給伊抹油，互伊分別作聖做祭司服事我。

¹⁴ 閣導亞倫的子來，給𪜶穿內袍，

¹⁵ 給𪜶抹油，親像給𪜶老父抹油仝款，互𪜶做祭司服事我；𪜶受抹油，就世世代代永遠得著祭司的職份。」

¹⁶ 諸個，摩西攏照上主的吩咐做。

¹⁷ 第二年正月初一，會幕就搭起來。

¹⁸ 摩西搭會幕，下許個座，徛許個板，穿許個橫楗，𫞼許個柱。

¹⁹ 伊佇會幕的頂面蓋布篷，佇布篷的頂面閣蓋上等的皮，攏照上主對摩西的吩咐做。

²⁰ 伊閣將法版下佇約櫃內面，給槓穿佇約櫃雙旁，將蓋蓋佇約櫃頂面，

²¹ 扛約櫃入會幕，掛隔開的帳簾遮約櫃，攏照上主對摩西的吩咐做。

²² 摩西將排獻祭的餅的桌搬入會幕，下佇布棚的北旁，佇帳簾外面；

²³ 桌頂排奉獻互上主的餅，攏照上主對摩西的吩咐做。

²⁴ 伊閣將燈台下佇會幕內，佇會幕的南旁，桌的對面，

²⁵ 佇上主的面前點燈；攏照上主對摩西的吩咐做。

²⁶ 伊閣將金的香壇下佇會幕內面，帳簾的頭前；

²⁷ 佇彼頂面燒芳芳的香；攏照上主對摩西的吩咐做。

^28-29 伊佇會幕的布棚的入口掛門簾，佇門簾的頭前下燒化祭的祭壇，佇彼頂面獻燒化祭及素祭；攏照上主對摩西的吩咐做。

³⁰ 伊將洗盪的盆下佇會幕及祭壇的中間，盆內貯水。

^31-32 摩西、亞倫及伊許個子入會幕抑是倚近壇的時，先佇遐洗手，洗腳；攏照上主對摩西的吩咐做。

³³ 最後，摩西佇會幕及祭壇的周圍設埕，佇埕的入口掛門簾。按呢，摩西就完成搭會幕的工作。

上主的榮光充滿會幕

³⁴ 彼時，雲遮蓋會幕，上主的榮光充滿布棚。

³⁵ 摩西𣍐當入會幕，因為雲停佇彼頂面，閣上主的榮光充滿布棚。

³⁶ 雲對會幕升高的時，以色列人就出發向前行。

³⁷ 雲若停啲，𪜶就無出發，聽候到雲升高。

³⁸ 日時，上主的雲停佇會幕頂，暝時雲中有火；佇以色列全家歸個行程，𪜶攏有親目看著。