出埃及記 4 - 現代台語譯本漢字版

上帝互摩西行神跡

¹ 摩西應講：「以色列人𣍐相信我，嘛𣍐聽我的話；𪜶會講：『上主毋曾對你顯現。』」

² 上主對伊講：「你的手攑什麼？」 伊講：「柺仔。」

³ 上主講：「給柺仔㧒𫢶土腳。」摩西一下給柺仔㧒落土腳，柺仔就變做蛇，伊就閃走。

⁴ 上主對摩西講：「伸手掠蛇尾。」摩西就伸手去掠，蛇就佇伊的手裡變做柺仔。

⁵ 上主閣講：「我互你有此款能力，是欲互以色列人信上主 — 𪜶列祖的上帝，亞伯拉罕的上帝、以撒的上帝、雅各的上帝，有對你顯現。」

⁶ 上主閣對伊講：「手伸入去衫仔內。」伊就給手伸入去；手一下伸出來，手已經致嚴重的皮膚病，白親像雪。

⁷ 上主閣講：「閣給你的手伸入去。」伊就閣伸入去；手一下伸出來，皮膚已經復原，及歸身軀的皮膚仝款。

⁸ 上主講：「𪜶若毋相信你，嘛無欲相信第一個神跡，𪜶會相信第二個神跡。

⁹ 此兩個神跡𪜶若攏毋信，閣毋聽你的話，你著對尼羅河舀水，倒佇土腳，許個水就會變做血。」

¹⁰ 摩西對上主講：「我的主啊，我毋是𠢕講話的人；你及你的僕人講話了後嘛是按呢；我是嘴舌鈍的人。」

¹¹ 上主對伊講：「什麼人互人口才？什麼人互人𣍐講話，𣍐聽見，目金抑是失明？豈毋是我上主？

¹² 今，你著去，我欲賜你口才，欲教你講你著講的話。」

¹³ 摩西講：「我的主啊，求你派別人去。」

¹⁴ 上主對摩西發受氣，講：「利未人亞倫豈毋是你的兄哥？我知伊真𠢕講話。現在伊來欲接你；伊看著你，心內會真歡喜。

¹⁵ 你著將應該講的話交代伊；我會賜你及伊口才，閣教恁做應該做的事。

¹⁶ 伊會替你對人民講話；伊做你的代言人，你親像伊的上帝，指示伊應該講的話。

¹⁷ 你著攑此支柺仔來行神跡。」

摩西轉去埃及

¹⁸ 摩西就倒去伊的丈人葉特羅遐，對伊講：「請互我倒去埃及，看我的親人猶活啲無。」 葉特羅給摩西講：「你通平安去。」

¹⁹ 上主佇米甸對摩西講：「你著倒去埃及，因為欲害你的性命許個人攏死啦。」

²⁰ 摩西導伊的某及兩個子，互𪜶騎驢仔，倒去埃及；摩西手攑上帝的柺仔。

²¹ 上主對摩西講：「你倒去埃及的時，一定著用我賜互你的能力，佇埃及王的面前行奇事；毋拘我欲互伊的心硬，毋肯放此個民族離開。

²² 你著給埃及王講：『上主按呢講：以色列是我的大子。

²³ 我曾給你講，著放我的子離開，去服事我；毋拘你拒絕，所以，我欲刣死你的大子。』」

²⁴ 摩西佇路中歇暝的所在，上主抵著伊，欲刣伊。

²⁵ 西坡拉提石刀割伊的子的包皮，焐摩西的腳，講：「你是我血的丈夫。」

²⁶ 上主就放伊煞。西坡拉講：「你是行割禮流血的新郎。」

²⁷ 上主對亞倫講：「你向曠野的方向去迎接摩西。」伊就去，佇上帝的山抵著摩西，給伊唚，給伊請安。

²⁸ 摩西將上主吩咐伊的話，及命令伊著行的神跡，攏給亞倫講。

²⁹ 摩西及亞倫就去招集以色列人的長老。

³⁰ 亞倫將上主對摩西講的話攏給𪜶講，閣佇人民的面前行許個神跡。

³¹ 人民就相信；𪜶聽見上主眷顧以色列人，閣知影𪜶的困苦，就跪落去敬拜上主。