出埃及記 39 - 現代台語譯本漢字版

做祭司聖的禮服

¹ 諸個師傅照上主對摩西的吩咐，用藍色、紫色、朱紅色的紗，用幼工做亞倫佇聖所服事欲穿的聖的禮服。

² 𪜶用金線，及藍色、紫色、朱紅色的紗，以及挲過的幼麻做以弗得；

³ 就是將金仔拍互薄薄薄，剪做線，摻佇藍色、紫色、朱紅色的紗，及幼麻，用奇巧的手路織做夥。

⁴ 𪜶閣做肩帶，及以弗得的雙旁連做夥。

⁵ 以弗得的腰帶及以弗得仝款用奇巧的手路，用金線及藍色、紫色、朱紅色的紗，以及挲過的幼麻織起來，及以弗得連做一個，攏照上主對摩西的吩咐做。

⁶ 𪜶閣琢兩塊紅瑪瑙，鑲佇金框裡，用刻印仔的手路將雅各的子的名刻佇彼頂面；

⁷ 安佇以弗得的肩帶，做以色列人的紀念石；攏照上主對摩西的吩咐做。

造胸袋

⁸ 𪜶做一個判斷的胸袋，用及做以弗得仝款奇巧的手路，用金線及藍色、紫色、朱紅色的紗，以及挲過的幼麻做。

⁹ 胸袋是四方的，拗雙層；長闊攏二十二公分。

¹⁰ 胸袋頂面鑲四綴寶石；第一綴是紅寶石、黃玉、赤玉；

¹¹ 第二綴是綠寶石、藍寶石、金鋼石；

¹² 第三綴是紫瑪瑙、白瑪瑙、紫色的水晶；

¹³ 第四綴是青玉、紅瑪瑙、碧玉；諸個攏鑲佇金框。

¹⁴ 諸個寶石照雅各的子的名，共十二塊，用刻印仔的手路，逐塊刻一個名，代表十二支族。

¹⁵ 𪜶用純金拍兩條鍊仔，親像絞索仔，安佇胸袋。

¹⁶ 𪜶閣做兩個金的框及兩個金環，將此兩個環安佇胸袋的雙頭，

¹⁷ 將彼兩條金鍊仔連佇胸袋雙頭兩個環，

¹⁸ 用兩條鍊仔的雙頭連佇兩個框，安佇以弗得肩帶的頭前。

¹⁹ 𪜶做兩個金環，安佇胸袋雙頭的墘，近以弗得向內面彼旁。

²⁰ 閣做兩個金環，安佇以弗得頭前的肩帶下面，倚近相連的所在，用奇巧的手路織的以弗得的帶頂面。

²¹ 𪜶用藍色的幼帶，將胸袋的環及以弗得的環縛做夥，貼佇用奇巧的手路織的以弗得的帶，將胸袋及以弗得固定啲。諸個攏照上主對摩西的吩咐做。

做祭司其他的禮服

²² 𪜶用織布的方法做穿佇以弗得內面的外袍，歸領是藍色的。

²³ 袍頂面的對中，為著頭殼留一個孔，周圍織領緣，親像戰甲的領孔，才免破裂。

²⁴ 袍的下腳蒲用藍色、紫色、朱紅色的紗做石榴。

²⁵ 閣用純金做鈃鈴仔，下佇石榴及石榴的中間；

²⁶ 袍歸個下腳蒲，一個鈃鈴仔一粒石榴，一個鈃鈴仔一粒石榴，通穿來服事上主。諸個攏照上主對摩西的吩咐做。

²⁷ 𪜶用織布的方法為亞倫及伊的子做幼麻的內袍、

²⁸ 禮帽，及頭巾，用挲過的幼麻做禮褲。

²⁹ 閣用挲過的幼麻，及藍色、紫色、朱紅色的紗，用刺繡的手路做腰帶；諸個攏照上主對摩西的吩咐做。

³⁰ 𪜶用純金做禮帽的牌，用刻印仔的手路刻「聖化歸上主」。

³¹ 閣用一條藍色的帶，將彼塊牌縛佇禮帽的頭前；諸個攏照上主對摩西的吩咐做。

會幕完工

³² 按呢，會幕的布棚所有的工程攏完成。上主命令摩西所著做的，以色列人攏照按呢做。

³³ 𪜶將會幕，就是布篷及所有的器具送去摩西遐，有鉤仔、板、橫楗、柱、有榫孔的座、

³⁴ 蓋布篷染做紅色的羊的皮及上等的皮、遮約櫃的蓋的帳簾、

³⁵ 約櫃及伊的槓、伊的蓋、

³⁶ 排獻祭的餅的桌及伊的器具、獻祭的餅、

³⁷ 純金的燈台及伊的燈盞、燈台的器具及點燈的油、

³⁸ 金的香壇、通抹的聖油及芳的香料、會幕的門簾、

³⁹ 銅的祭壇及銅的網仔、祭壇的槓及壇所有的器具、洗盪的盆及盆座、

⁴⁰ 埕四圍的帷及伊的柱、有榫孔的座及埕的門簾、杙仔及索仔、布篷及會幕內面所有的器具，

⁴¹ 以及幼工做的禮服，就是祭司亞倫佇聖所穿來服事的聖的禮服，及伊的子做祭司啲穿的禮服。

⁴² 上主命令摩西所著做的，以色列人攏照按呢做。

⁴³ 摩西看著所有的工程，攏有照上主的吩咐完成，就給𪜶祝福。