出埃及記 37 - 現代台語譯本漢字版

造約櫃

¹ 比撒列用金合歡木做一個約櫃，長一百十公分，闊六十六公分，高六十六公分；

² 用純金包此個櫃，內外攏包啲；四邊鑲金線；

³ 閣給伊鑄四個金環，安佇伊的四支腳；此旁兩個，彼旁兩個。

⁴ 伊用金合歡木做兩支槓，用金包啲，

⁵ 將槓穿佇約櫃邊的環裡，用來扛櫃。

⁶ 伊閣用純金做約櫃的蓋，長一百十公分，闊六十六公分。

⁷ 閣用金拍兩個天使基路伯，安佇蓋的雙頭，

⁸ 一頭一個；雙頭的基路伯及蓋連做歸塊。

⁹ 兩個基路伯面相對，向約櫃的蓋；翼搋高，遮約櫃的蓋。

造獻祭的餅的桌

¹⁰ 伊用金合歡木做一塊桌，長八十八公分，闊四十四公分，高六十六公分；

¹¹ 用純金包啲，四圍鑲金線。

¹² 桌面四個邊各做七點五公分闊的墘，墘的周圍鑲金線。

¹³ 伊做四個金環，安佇桌仔四支腳的角頭頂面。

¹⁴ 安環的所在倚近橫杆，通穿槓來扛桌。

¹⁵ 用金合歡木做兩支槓，用金包啲，通用來扛桌。

¹⁶ 閣用純金做桌頂的器具，就是盤及𥐵仔，以及獻奠酒祭欲用的壺及杯。

造燈台

¹⁷ 伊用純金拍一個燈台；燈台的座、中柱、杯、萼、花，攏連做歸座。

¹⁸ 燈台的雙旁伸出六支枝，一旁三支；

¹⁹ 每一支有三個杯，形狀親像杏花，有萼有花；燈台的六支枝攏是按呢。

²⁰ 燈台柱有四個杯，形狀親像杏花，有萼及花。

²¹ 伊佇三對相連的枝下面及柱相接的所在做萼；燈台的六支枝攏是按呢。

²² 許個萼及枝攏及柱連做一個，攏是用純金拍的。

²³ 伊用純金做七個燈盞、燈剪，及燈盤。

²⁴ 伊用三十五公斤的純金造燈台及諸個所有的器具。

造燒香的壇

²⁵ 伊用金合歡木做一座燒香的壇，是四方的，長及闊攏四十五公分，高九十公分。壇彼四支翹起來的角及壇連接做一塊。

²⁶ 壇的頂面、四圍，以及許個角攏用純金包啲；閣佇壇的四圍鑲金線。

²⁷ 伊佇金線的下面、壇的雙旁、兩支橫杆的頂面，做兩個金環，通穿槓來扛壇。

²⁸ 伊用金合歡木做槓，用金包啲。

做通抹的聖油及香

²⁹ 伊閣照做香料的方法做通抹的聖油及純的芳香。