出埃及記 36 - 現代台語譯本漢字版

¹ 比撒列及亞何利亞伯，以及所有得著上主賞賜𪜶智慧聰明，互𪜶知按怎起造聖所逐款工程的師傅，攏照上主命令𪜶的去做。

人民奉獻禮物

² 摩西召集比撒列、亞何利亞伯，及所有受感動，得著上主賞賜𪜶智慧，歡喜來做工的師傅。

³ 𪜶對摩西提以色列人為著起造聖所所獻的禮物。人民逐早起繼續將甘心奉獻的禮物帶來互摩西。

⁴ 所以許個𠢕起造聖所的師傅，攏暫停𪜶原來的工課，

⁵ 來對摩西講：「人民奉獻的禮物非常多，超過上主命令欲起造的工程所著用的。」

⁶ 對按呢，摩西下令，𪜶就佇全營宣布，講：「無論男女，攏毋通閣為著聖所的工程奉獻禮物。」按呢人民才無閣奉獻。

⁷ 𪜶奉獻的材料，已經有夠做所有的工程，閣有賰。

起造會幕

⁸ 𪜶中間所有𠢕的師傅，用十幅的布做會幕；諸個布是用挲過的幼麻，及藍色、紫色、朱紅色的紗織的，頂面閣用真幼的手路繡基路伯。

⁹ 每幅布長十二公尺，闊兩公尺；逐幅的寸尺攏像款。

¹⁰ 𪜶將五幅布接做一組；另外五幅嘛按呢。

¹¹ 閣佇逐組相接的布，路尾彼幅的邊仔做藍色的鈕環。

¹² 𪜶佇此組布做五十個鈕環；佇第二組布路尾彼幅的邊仔，嘛做五十個鈕環；兩組的鈕環攏兩個兩個相對。

¹³ 𪜶閣做五十個金鉤仔，用鉤仔將兩組布連做夥，成做一個會幕。

¹⁴ 𪜶用山羊毛織十一幅帳，做蓋會幕的布篷；

¹⁵ 每幅帳長十三公尺，闊兩公尺；十一幅的寸尺攏像款。

¹⁶ 𪜶將五幅帳連做一組，另外六幅嘛連做一組。

¹⁷ 佇逐組相接的帳，路尾彼幅的邊仔做五十個鈕環。

¹⁸ 𪜶閣做五十個銅的鉤仔，互布篷連做一個。

¹⁹ 𪜶用染做紅色的羊的皮蓋布篷，閣用上好的皮蓋佇上頂面。

²⁰ 𪜶用金合歡木做會幕的壁枋。

²¹ 壁枋長四公尺，闊六十六公分。

²² 逐塊枋有兩個榫通相接；會幕所有的枋攏照按呢做。

²³ 南旁的壁枋做二十塊。

²⁴ 此二十塊枋的下面，做四十個銀的座；逐塊枋的下面有兩個孔通鬥𪜶的榫。

²⁵ 會幕的第二面，就是北旁，嘛做二十塊壁枋，

²⁶ 及四十個銀的座；逐塊枋的下面有兩個孔。

²⁷ 會幕的後面，就是西旁，做六塊枋。

²⁸ 會幕後面的角頭，做兩塊枋，

²⁹ 下面搋開，頂面相連直到頂面第一個環；兩旁攏是按呢，欲做角頭的路用。

³⁰ 有八塊枋，及十六個銀的座；逐塊枋的下面有兩個榫孔。

^31-32 𪜶用金合歡木做橫楗；南旁及北旁各五支，會幕的後面，就是西旁，嘛五支。

³³ 壁枋對中彼支橫楗，對此頭迵到彼頭。

³⁴ 壁枋用金包啲，閣做金環通套橫楗；橫楗嘛用金包。

³⁵ 𪜶閣用藍色、紫色、朱紅色的紗，及挲過的幼麻織帳簾；此個帳簾用真幼的手路繡基路伯。

³⁶ 𪜶用金合歡木做四支柱，用金包啲，閣有金鉤仔；柱鬥佇四個有榫孔的銀的座頂面。

³⁷ 𪜶閣用藍色、紫色、朱紅色的紗，及挲過的幼麻，用刺繡的手路做會幕的門簾。

³⁸ 𪜶做五支柱，柱有鉤仔吊門簾；柱斗及橫杆用金包啲；彼五個有榫孔的座是銅的。