出埃及記 35 - 現代台語譯本漢字版

安歇日的條例

¹ 摩西召集以色列全會眾，對𪜶講：「下面是上主命令恁著遵行的事。

² 六日著做工，第七日是聖日，是獻互上主的安歇日，著完全歇睏；若有人佇此日做工，著互伊死。

³ 安歇日，恁逐口灶毋通起火。」

為會幕奉獻

⁴ 摩西對以色列全會眾講：「這是上主的命令：

⁵ 著奉獻禮物互上主；所有甘心奉獻的人，攏通帶禮物來獻互上主，就是金、銀、銅、

⁶ 藍色紫色朱紅色的紗、幼麻、山羊毛、

⁷ 染做紅色的羊的皮、上等的皮、金合歡木、

⁸ 點燈的油、製造通抹的聖油及芳香的芳料、

⁹ 紅瑪瑙，以及欲鑲佇以弗得及胸袋的寶石。」

會幕的器具

¹⁰ 「恁中間𠢕的師傅攏著來做上主所吩咐的物件，就是

¹¹ 會幕，包括伊的布篷及頂面的蓋，以及鉤仔、板、橫楗、柱、有榫孔的座、

¹² 約櫃及伊的槓、約櫃的蓋及遮伊的帳簾、

¹³ 排獻祭的餅的桌及伊的槓、桌頂的器具及獻祭的餅、

¹⁴ 燈台及伊的器具、燈盞及燈油、

¹⁵ 香壇及伊的槓、通抹的聖油及芳的香料、會幕的門簾、

¹⁶ 燒化祭的祭壇及伊銅的網仔、祭壇的槓及壇所有的器具、洗盪的盆及盆座、

¹⁷ 埕的帳帷及伊的柱、有榫孔的座及埕的門簾、

¹⁸ 會幕及埕的杙仔及索仔，

¹⁹ 以及幼工做的禮服，就是祭司亞倫佇聖所穿來服事的聖的禮服，及伊的子做祭司啲穿的禮服。」

人民的奉獻

²⁰ 以色列全會眾對摩西的面前出去。

²¹ 所有受感動，心歡喜的人，攏帶禮物來獻互上主；諸個禮物通用來做會幕逐種的器具及聖的禮服。

²² 所有甘心奉獻的查甫人及婦仁人攏將金器，就是胸前的鉼針、耳鉤、做印仔的手指、手環提來，搖搖咧做禮物獻互上主。

²³ 𪜶若有藍色紫色朱紅色的紗、幼麻、山羊毛、染做紅色的羊的皮，及上好的皮，嘛攏提來。

²⁴ 所有會當奉獻銀及銅的人，攏帶來做禮物獻互上主；所有有金合歡木通做逐款路用的，嘛攏帶來。

²⁵ 手藝真𠢕的婦女，將親手紡的藍色紫色朱紅色的紗及幼麻，攏提來。

²⁶ 手藝真好，心受感動的婦女，就紡山羊毛。

²⁷ 許個領袖嘛將會當鑲佇以弗得及胸袋的紅瑪瑙，及逐種寶石提來。

²⁸ 𪜶閣將油及芳料帶來做燈油及通抹的聖油，以及芳香。

²⁹ 為著上主吩咐摩西所著做的工，所有受感動心歡喜的以色列人，無論男女，攏將禮物帶來獻互上主。

起造會幕的師傅

³⁰ 摩西對以色列人講：「上主已經對猶大支族揀選戶珥的孫，烏利的子比撒列；

³¹ 閣用上帝的神給伊充滿，互伊有智慧、聰明及智識，𠢕做逐款的工藝；

³² 𠢕設計圖案，用金、銀、銅做物件；

³³ 閣𠢕刻欲鑲的寶石，𠢕用木材刻逐款工藝品。

³⁴ 上主閣互伊及但支族，亞希撒抹的子亞何利亞伯，得著才能，通傳授才藝。

³⁵ 諸個人上主將智慧充滿𪜶，互𪜶會做逐款的工藝，無論是雕刻、圖案設計，用藍色紫色朱紅色的紗及幼麻刺繡，編織；𪜶真𠢕做工藝，嘛真𠢕設計圖案。」