出埃及記 34 - 現代台語譯本漢字版

重造石版

¹ 上主對摩西講：「你著拍兩塊及以前仝款的石版；你以前摔破的石版頂面的話，我欲閣寫佇此兩塊石版頂面。

² 明仔早起你著準備好勢；透早上西奈山，佇上高的所在朝見我。

³ 毋通有人及你做夥來；歸座山毋通有人，山腳嘛毋通有牛群羊群佇遐食草。」

⁴ 摩西就拍兩塊及以前仝款的石版。摩西透早起來，照上主的吩咐，手提兩塊石版上西奈山。

⁵ 上主佇雲中降臨，及摩西徛做夥，宣布上主的名。

⁶ 上主對摩西的面前經過，宣布講： 「上主，上主， 有仁慈恩典的上帝， 無快受氣，閣有豐盛的慈愛及信實；

⁷ 持守慈愛到千萬代， 赦免罪孽、過失，及罪過； 一定𣍐給有罪的判做無罪， 欲追究人的罪，對父到子，到三四代。」

⁸ 摩西就隨時仆落土腳敬拜，講：

⁹ 「主啊，我若對你得著恩典，主啊，求你及阮做夥行。阮是心硬固執的民族，求你赦免阮的罪孽及罪過，接納阮做你的子民。」

重新立約

¹⁰ 上主講：「今，我欲及你立約。我欲佇你全體人民的面前做奇妙的事，是佇天下萬族的中間猶毋曾做過的。按呢，你周圍的民族就欲看見上主通過你所做的事是偌呢通驚畏。

¹¹ 我今仔日所命令你的，你著遵守。我欲對你的面前趕出亞摩利人、迦南人、赫人、比利洗人、希未人，及耶布斯人。

¹² 你著謹慎，毋通及你欲去彼個所在的住民立約，才免𪜶成做害恁的羅網。

¹³ 你著拆毀𪜶的祭壇，摃碎𪜶的石柱像，剉斷𪜶的亞舍拉女神的神像。

¹⁴ 「毋通敬拜別個神明，因為上主是要求人全情服事伊的上帝，無容允有別個神明及伊比並。

¹⁵ 所以，你𣍐用得及彼所在的住民立約，才免𪜶服事𪜶的神明行邪淫，獻祭互𪜶的神明的時，你受邀請，就去食𪜶的祭物；

¹⁶ 才免互你的後生娶𪜶的查某子，佇𪜶的查某子服事𪜶的神明行邪淫的時，引誘你的後生做夥服事𪜶的神明行邪淫。

¹⁷ 「你毋通為家己鑄造神像。

¹⁸ 「你著守除酵節，照我的命令，佇亞筆月所指定的日期，食無酵餅七日久，因為你佇亞筆月出埃及。

¹⁹ 「所有頭上生的攏是我的；無論是牛、羊，頭上生的公的攏是我的。

²⁰ 頭上生的驢仔，著用羊仔贖回；若無欲贖回，就著摃斷驢仔的頷頸。恁的大子攏著贖回。 「你毋通空手來敬拜我。

²¹ 「六日內著做工，第七日著歇睏；栽種收割的時嘛著按呢。

²² 「初熟的小麥收成的時，著守七七收割節。閣著佇年尾守收囥節。

²³ 「恁所有的查甫人，著一年三遍來敬拜至高的上主 — 以色列的上帝。

²⁴ 我欲對你的面前將外族人趕出去，擴展你的領土；你一年三遍來見上主 — 你的上帝的時，一定無人會侵犯你的土地。

²⁵ 「毋通將牲禮的血及有酵的物做夥獻互我；𨃟過節的祭物嘛毋通留到隔早起。

²⁶ 「土地頭水上好的收成，著送到上主 — 你的上帝的厝。 「毋通用山羊母的奶煮伊的子。」

²⁷ 上主對摩西講：「你著將諸個話寫起來，因為我是照諸個話及你以及以色列人立約。」

²⁸ 摩西及上主佇遐四十暝日，無食飯無飲水。伊將此個約的話，就是十條誡，寫佇彼兩塊石版。

摩西落西奈山

²⁹ 摩西落西奈山的時，手提彼兩塊約版；因為上主有及伊講話，伊的面發光，毋拘伊家己毋知。

³⁰ 亞倫及以色列眾人看著摩西，看咧，伊的面發光；𪜶就真驚，毋敢倚近伊。

³¹ 摩西叫𪜶來，亞倫及會眾的領袖才攏倒轉去伊遐；摩西就及𪜶講話。

³² 然後以色列眾人攏進前倚來；摩西就將上主佇西奈山對伊講一切的話，攏吩咐𪜶。

³³ 摩西及𪜶講話了後，就用帕罩面。

³⁴ 毋拘摩西入去見上主及上主講話的時，面帕就提起來，到伊出來。伊出來，就將上主所吩咐的給以色列人講。

³⁵ 以色列人看著摩西的面發光；摩西用帕罩面，聽候到伊入去及上主講話才提起來。