出埃及記 31 - 現代台語譯本漢字版

起造會幕的師傅

¹ 上主對摩西講：

² 「我已經對猶大支族揀選戶珥的孫，烏利的子比撒列。

³ 我用上帝的神給伊充滿，互伊有智慧、聰明及智識，𠢕做逐款的工藝；

⁴ 𠢕設計圖案，用金、銀、銅做物件；

⁵ 閣𠢕刻欲鑲的寶石，𠢕用木材刻逐款工藝品。

⁶ 我閣對但支族，派亞希撒抹的子亞何利亞伯及比撒列同工。許個有智慧的人，我欲賜𪜶才能，互𪜶會當做我交代𪜶做的工作，

⁷ 就是會幕、約櫃及約櫃頂面的蓋、會幕一切的器具、

⁸ 桌及桌頂的器具、純金的燈台及燈台一切的器具、香壇、

⁹ 燒化祭的祭壇及壇一切的器具、洗盪的盆及盆座、

¹⁰ 幼工做的禮服，就是祭司亞倫及伊的子做祭司服事啲穿聖的禮服，

¹¹ 以及通抹的聖油及聖所啲用芳芳的香。𪜶著照我所命令你的去做。」

遵守安歇日

¹² 上主對摩西講：

¹³ 「你著吩咐以色列人講：『恁一定著守我的安歇日，因為這是我及恁中間世世代代的記號，互恁知我是給恁分別作聖的上主。

¹⁴ 所以恁著守安歇日做恁的聖日。無遵守此日做聖日的人，一定著互伊死；佇此日作工的人，著對人民的中間給伊除滅。

¹⁵ 六日著做工，毋拘第七日是獻互上主聖的安歇日，著完全歇睏；佇安歇日作工的，一定著給伊處死。』

¹⁶ 所以，以色列人著守安歇日，世世代代遵守安歇日做永遠的約。

¹⁷ 這是我及以色列人中間永遠的記號；因為上主佇六日的中間創造天地，第七日就停工歇睏。」

¹⁸ 上主佇西奈山及摩西講話講煞，就將兩塊石版交互摩西；此兩塊石版頂面的誡命是上帝親手寫的。