出埃及記 30 - 現代台語譯本漢字版

燒香的壇

¹ 「你著用金合歡木做一座燒香的壇，

² 是四方的，長及闊攏四十五公分，高九十公分。壇彼四支翹起來的角著及壇連接做一塊。

³ 壇的頂面、四圍，以及許個角，攏著用純金包啲；嘛著佇壇的四圍鑲金線。

⁴ 你著佇金線的下面、壇的雙旁、兩支橫杆的頂面，做兩個金環，通穿槓扛壇。

⁵ 著用金合歡木做槓，用金包啲。

⁶ 你著將香壇囥佇約櫃前的帳簾頭前，及約櫃頂面的蓋相對，遐是我及你相會的所在。

⁷ 亞倫逐早起整理燈火的時，著佇壇頂燒芳芳的香。

⁸ 到黃昏亞倫點燈的時，嘛著燒香。恁著世世代代佇上主的面前不斷按呢燒香。

⁹ 毋通佇此個壇燒別款的香，嘛毋通佇遮獻燒化祭、素祭，及奠酒祭。

¹⁰ 亞倫著一年一遍，用贖罪祭的血抹壇頂的四支角，給香壇行潔淨禮。恁世世代代著按呢做。此個壇佇上主的面前是至聖的。」

性命的贖金

¹¹ 上主閣對摩西講：

¹² 「你調查以色列人人口的時，𪜶逐個人著為家己的性命獻贖金互上主，才免佇普查的時災禍臨到𪜶。

¹³ 所有點算過的人，逐個著照聖所的公秤提六公克的銀獻互上主。

¹⁴ 所有點算過二十歲以上的人，著將此六公克的銀獻互上主。

¹⁵ 好額人毋免出較多，散赤人毋通出較少；逐個人攏著獻六公克的銀互上主，做性命的贖金。

¹⁶ 你著對以色列人收此個贖金，做會幕的路用，互以色列人佇上主的面前得著記念，這是恁性命的贖金。」

銅盆

¹⁷ 上主對摩西講：

¹⁸ 「你著用銅做洗盪的盆及盆座，下佇會幕及祭壇的中間，內面貯水。

¹⁹ 亞倫及伊的子欲佇遐洗手，洗腳。

²⁰ 𪜶入會幕，抑是倚壇前服事，獻用火燒的祭物互上主的時，著用水洗，才免死。

²¹ 𪜶著按呢洗手洗腳，才免死；這欲做亞倫及伊的後代世世代代永遠的規例。」

通抹的聖油

²² 上主閣對摩西講：

²³ 「你著取上等的香料，就是流質的沒藥六公斤、芳的肉桂三公斤、芳的菖蒲三公斤、

²⁴ 桂皮六公斤，攏照聖所的公秤，以及橄欖油四公升，

²⁵ 照做香料的方法調和，做通抹的聖油。

²⁶ 著用此個油抹會幕及約櫃、

²⁷ 桌及桌頂所有的器具、燈台及燈台的器具、香壇、

²⁸ 燒化祭的祭壇及壇所有的器具，以及洗盪的盆及盆座。

²⁹ 你著給𪜶分別作聖，互𪜶成做至聖；所有摸著諸個物件的攏成做聖。

³⁰ 你著給亞倫及伊許個子抹油，互𪜶分別作聖做祭司服事我。

³¹ 你著給以色列人講：『此個油欲佇恁世世代代做我的聖油。

³² 毋通倒佇一般人的身軀，嘛毋通用此個調和的方法做親像此款的油。此個油是聖的，恁嘛著給伊當做聖。

³³ 所有製造及聖油仝款的油，抑是用來抹祭司以外的人的，著對人民的中間給𪜶革出。』」

香的作法

³⁴ 上主對摩西講：「你著提蘇合香、香螺、白松香諸個香料，及純的乳香，逐項平重，

³⁵ 用製造芳料的方法做香，閣用鹽調和，互伊清氣聖化。

³⁶ 你著提一屑仔此個香，研做粉，下佇會幕內約櫃前；我欲佇遐及你相會；恁著看這做至聖。

³⁷ 恁毋通照此個方法為著家己做香；著看伊做聖，歸互上主。

³⁸ 若有人製造仝款的香欲鼻芳，著對人民的中間給伊革出。」