出埃及記 3 - 現代台語譯本漢字版

上帝呼召摩西

¹ 摩西替伊的丈人，米甸的祭司葉特羅顧羊。伊導羊群入去曠野的西旁，到上帝的山，就是何烈山。

² 上主的使者佇莿的火焰中對伊顯現。伊注意看，看著莿互火燒，毋拘莿無燒去。

³ 摩西心內想講：「我著斡過去遐看此個奇怪的景象，是按怎莿無燒去？」

⁴ 上主看著摩西斡過來欲看，上帝就對莿內面叫伊，講：「摩西，摩西。」 摩西應講：「我佇遮。」

⁵ 上帝講：「你毋通閣行倚來；著給你的鞋褪起來，因為你徛的所在是神聖的地。」

⁶ 伊閣講：「我是你的祖先的上帝，亞伯拉罕的上帝、以撒的上帝、雅各的上帝。」摩西就遮伊的面，毋敢看上帝。

⁷ 上主講：「我確實有看著我的子民佇埃及所受的苦楚，有聽著𪜶受督工壓迫所發出的哀叫。𪜶的痛苦我攏知。

⁸ 今我欲落來解救𪜶脫離埃及人的手，導𪜶離開彼個地，去肥媠閣寬闊、流奶及蜜的地，就是迦南人、赫人、亞摩利人、比利洗人、希未人、耶布斯人許個族的所在。

⁹ 現在以色列人的哀叫已經透到我的耳孔，我嘛有看著埃及人按怎壓迫𪜶。

¹⁰ 今，你著去，我欲派你去埃及王遐，導我的子民以色列人對埃及出來。」

¹¹ 摩西對上帝講：「我是啥人，哪敢去見埃及王，導以色列人對埃及出來？」

¹² 上帝講：「我會及你同在，這是我派你去的證據。你導我的子民對埃及出來了後，恁著來此個山敬拜上帝。」

¹³ 摩西對上帝講：「我去以色列人遐，對𪜶講『恁列祖的上帝有派我來恁遮』，𪜶若問我講『伊叫做什麼名』，我欲按怎給𪜶應？」

¹⁴ 上帝對摩西講：「我是自有永有的。你著給以色列人講：『自有永有的派我來恁遮。』」

¹⁵ 上帝閣給摩西講：「你著對以色列人按呢講：『上主 — 恁列祖的上帝，亞伯拉罕的上帝、以撒的上帝、雅各的上帝派我來恁遮。』此個永遠是我的名，世世代代做我的稱呼。

¹⁶ 你去召集以色列人的長老，給𪜶講：『上主 — 恁列祖的上帝，亞伯拉罕、以撒、雅各的上帝，對我顯現，講：我實在眷顧恁；恁佇埃及抵著的事，我攏有啲關心。

¹⁷ 我一定欲救恁脫出佇埃及受的艱苦，導恁去到迦南、赫、亞摩利、比利洗、希未、耶布斯許個族徛起的所在，就是流奶及蜜的地。』

¹⁸ 「以色列人會聽你的話；你及𪜶的長老著去見埃及王，給伊講：『上主 — 希伯來人的上帝有對阮顯現。今，請允准阮行三日的路程，去曠野對上主 — 阮的上帝獻祭。』

¹⁹ 我知，若無用強烈的手段，埃及王𣍐互恁離開。

²⁰ 我欲出手，行奇事攻擊埃及，按呢，伊才會放恁離開。

²¹ 「我欲互埃及人好款待此個人民，𣍐互𪜶空手離開；

²² 恁逐個婦仁人欲對厝邊，以及寄居佇遐的婦仁人討金器、銀器，及衣服，通互恁的後生查某子用；按呢恁就給埃及人的財物搶來。」