出埃及記 28 - 現代台語譯本漢字版

祭司的禮服

¹ 「你著對以色列人的中間，叫你的兄哥亞倫及伊的子拿答、亞比戶、以利亞撒、以他瑪來你遮，做祭司服事我。

² 你著給你的兄哥亞倫做聖的禮服，互伊有榮光及威嚴。

³ 許個得著我智慧的神充滿的𠢕的師傅，你著吩咐𪜶給亞倫做禮服，互伊分別作聖做祭司服事我。

⁴ 諸個禮服包括胸袋、以弗得、外袍、過繡的內袍、禮帽，及腰帶。𪜶著給你的兄哥亞倫及伊的子做聖的禮服，互𪜶做祭司服事我。

⁵ 禮服著用金線，及藍色、紫色、朱紅色的紗，以及幼麻做。

⁶ 「𪜶著用金線，及藍色、紫色、朱紅色的紗，以及挲過的幼麻，用奇巧的手路做以弗得。

⁷ 著做兩條肩帶連佇以弗得。

⁸ 以弗得的腰帶著及以弗得仝款用奇巧的手路，用金線及藍色、紫色、朱紅色的紗，以及挲過的幼麻織起來，互伊及以弗得連做一個。

⁹ 著提兩塊紅瑪瑙，刻雅各十二個子的名；

¹⁰ 照𪜶出世的順序，六個刻佇一塊，六個刻佇另外一塊。

¹¹ 著用刻印仔的手路，將雅各的子的名刻佇寶石，鑲佇金框裡。

¹² 著將此兩塊寶石安佇以弗得的肩帶，做以色列十二支族的紀念石。亞倫著佇兩個肩頭揹𪜶的名，將𪜶帶來上主面前，互上主會記得。

¹³ 著用金做兩個框，

¹⁴ 閣用純金拍兩條鍊仔，親像絞索仔，然後安佇金框。」

胸袋

¹⁵ 「你著做一個判斷的胸袋，用及做以弗得仝款奇巧的手路，用金線及藍色、紫色、朱紅色的紗，以及挲過的幼麻做。

¹⁶ 胸袋著四方的，拗雙層；長闊攏二十二公分。

¹⁷ 你著佇胸袋頂面鑲四綴寶石；第一綴是紅寶石、黃玉、赤玉；

¹⁸ 第二綴是綠寶石、藍寶石、金鋼石；

¹⁹ 第三綴是紫瑪瑙、白瑪瑙、紫色的水晶；

²⁰ 第四綴是青玉、紅瑪瑙、碧玉；諸個攏著鑲佇金框。

²¹ 諸個寶石照雅各的子的名，共十二塊，用刻印仔的手路，逐塊刻一個名，代表十二支族。

²² 閣用純金親像絞索仔按呢拍兩條鍊仔，安佇胸袋。

²³ 胸袋的雙頭著做兩個金環，

²⁴ 將彼兩條金鍊仔連佇胸袋雙頭兩個環，

²⁵ 閣用兩條鍊仔的雙頭連佇兩個框，安佇以弗得肩帶的頭前。

²⁶ 你著做兩個金環，安佇胸袋雙頭的墘，近以弗得向內面彼旁。

²⁷ 閣著做兩個金環，安佇以弗得頭前的肩帶下面，倚近相連的所在，用奇巧的手路織的以弗得的帶頂面。

²⁸ 𪜶著用藍色的幼帶，將胸袋的環及以弗得的環縛做夥，貼佇用奇巧的手路織的以弗得的帶，將胸袋及以弗得固定啲。

²⁹ 「亞倫入聖所的時，著將有刻雅各的子的名彼個判斷的胸袋掛佇胸前，帶來上主的面前，互上主會記得。

³⁰ 你著將烏陵及土明，下佇判斷的胸袋內面。亞倫到上主面前的時，著將諸個下佇伊的胸前。按呢，亞倫常常佇上主的面前為以色列人做判斷。」

祭司其他的禮服

³¹ 「你著做穿佇以弗得內面的外袍，歸領是藍色的。

³² 袍頂面的對中，著為著頭殼留一個孔，領緣著織互勇，親像戰甲的領孔，才免破裂。

³³ 袍的下腳蒲著用藍色、紫色、朱紅色的紗做石榴。著做金的鈃鈴仔下佇石榴及石榴的中間；

³⁴ 袍歸個下腳蒲，一個鈃鈴仔一粒石榴，一個鈃鈴仔一粒石榴。

³⁵ 亞倫服事的時，著穿外袍。伊入聖所到上主面前，以及出來的時，著會當互人聽著鈃鈴仔的聲，才免受刣死。

³⁶ 「著用純金做一塊牌，用刻印仔的手路刻『聖化歸上主』。

³⁷ 著用一條藍色的帶，將彼塊牌縛佇禮帽的頭前。

³⁸ 此塊牌著常常佇亞倫的頭額，互亞倫擔當以色列人奉獻聖的禮物的時所犯的罪，互許個祭物得著上主的接納。

³⁹ 「著用幼麻織內袍，用幼麻布做禮帽，用刺繡的手路做腰帶。

⁴⁰ 「你著為亞倫的子做內袍、腰帶，及頭巾，互𪜶有榮光及威嚴。

⁴¹ 諸個著互你的兄哥亞倫及伊的子穿，給𪜶抹油，授職，給𪜶分別作聖，互𪜶做祭司服事我。

⁴² 著用幼麻布給𪜶做禮褲，對腰到大腿，遮𪜶的下體。

⁴³ 亞倫及伊的子入會幕，抑是來聖所倚近祭壇服事的時，著穿禮褲，才免𪜶受刑罰來死。這欲做亞倫及伊的後代永遠的規例。」