出埃及記 26 - 現代台語譯本漢字版

會幕

¹ 「你著用十幅布做會幕；諸個布是用挲過的幼麻，及藍色、紫色、朱紅色的紗織的，頂面著用真幼的手路繡基路伯。

² 每幅布長著十二公尺，闊兩公尺；逐幅的寸尺攏像款。

³ 著將五幅布接做一組；另外五幅嘛著按呢。

⁴ 閣佇逐組相接的布，路尾彼幅的邊仔著做藍色的鈕環。

⁵ 著佇此組布做五十個鈕環；佇第二組布路尾彼幅的邊仔，嘛做五十個鈕環；兩組的鈕環攏著兩個兩個相對。

⁶ 閣著做五十個金鉤仔，用鉤仔將兩組布連做夥，成做一個會幕。」

⁷ 「你著用山羊毛織十一幅帳，做蓋會幕的布篷；

⁸ 每幅帳長十三公尺，闊兩公尺；十一幅的寸尺攏像款。

⁹ 著將五幅帳連做一組，另外六幅嘛連做一組；彼個第六幅的一半著垂落佇布篷的頭前。

¹⁰ 佇逐組相接的帳，路尾彼幅的邊仔著做五十個鈕環。

¹¹ 閣著做五十個銅的鉤仔，鉤佇鈕環，互布篷連做一個。

¹² 布篷的帳加出來彼半幅，著垂佇會幕的後面。

¹³ 蓋會幕的布篷兩旁加出來的五十公分，著垂佇會幕的雙旁。

¹⁴ 「你著用染做紅色的羊的皮蓋布篷，閣用上好的皮蓋佇上頂面。

¹⁵ 「你著用金合歡木做會幕的壁枋。

¹⁶ 壁枋著長四公尺，闊六十六公分。

¹⁷ 逐塊枋著有兩個榫通相接；會幕所有的枋攏著照按呢做。

¹⁸ 南旁的壁枋著做二十塊。

¹⁹ 此二十塊枋的下面，著做四十個銀的座；逐塊枋的下面有兩個孔通鬥𪜶的榫。

²⁰ 會幕的第二面，就是北旁，嘛著做二十塊壁枋，

²¹ 及四十個銀的座；逐塊枋的下面有兩個孔。

²² 會幕的後面，就是西旁，著做六塊枋。

²³ 會幕後面的角頭，著做兩塊枋，

²⁴ 下面搋開，頂面相連直到頂面第一個環；兩旁攏是按呢，欲做角頭的路用。

²⁵ 著有八塊枋，及十六個銀的座；逐塊枋的下面有兩個榫孔。

^26-27 「你著用金合歡木做橫楗；南旁及北旁各五支，會幕的後面，就是西旁，嘛五支。

²⁸ 壁枋對中彼支橫楗，著對此頭迵到彼頭。

²⁹ 壁枋著用金包啲，閣做金環通套橫楗；橫楗嘛著用金包。

³⁰ 你著照我佇山頂指示你的款式給會幕搭起來。

³¹ 「你著用藍色、紫色、朱紅色的紗，及挲過的幼麻織帳簾；此個帳簾著用真幼的手路繡基路伯。

³² 你著用金合歡木做四支柱，用金包啲，閣有金鉤仔；柱鬥佇四個有榫孔的銀的座頂面；

³³ 帳簾著吊佇金鉤仔。你著將約櫃扛入帳簾內；此個帳簾是為著恁，將聖所及至聖所隔開。

³⁴ 閣著將施恩座安佇至聖所內面的約櫃頂面。

³⁵ 你著將排獻祭的餅的桌下佇帳簾外面的北旁；燈台下佇南旁，及桌相對。

³⁶ 「你著用藍色、紫色、朱紅色的紗，及挲過的幼麻，用刺繡的手路做會幕的門簾。

³⁷ 著用金合歡木做五支柱吊門簾；柱著用金包啲；柱的鉤仔著用純金做。閣著為柱鑄五個有榫孔的銅的座。」