出埃及記 25 - 現代台語譯本漢字版

為聖所奉獻

¹ 上主給摩西講：

² 「你著吩咐以色列人奉獻禮物互我；所有甘心奉獻的物，恁攏通收起來。

³ 下面是恁通對𪜶收的禮物：金、銀、銅、

⁴ 藍色紫色朱紅色的紗、幼麻、山羊毛、

⁵ 染做紅色的羊的皮、上等的皮、金合歡木、

⁶ 點燈的油、製造通抹的聖油及芳香的芳料、

⁷ 紅瑪瑙，以及欲鑲佇以弗得及胸袋的寶石。

⁸ 𪜶著為我起一個聖的所在，互我通𫢶佇𪜶中間。

⁹ 𪜶著照我指示你的款式，起造會幕，製造內面所有的器具。」

約櫃

¹⁰ 「著用金合歡木做一個櫃，長一百十公分，闊六十六公分，高六十六公分。

¹¹ 你著用純金包此個櫃，內外攏著包；四邊著鑲金線。

¹² 你著鑄四個金環，安佇伊的四支腳；此旁兩個，彼旁兩個。

¹³ 著用金合歡木做兩支槓，用金包啲。

¹⁴ 著將槓穿佇約櫃邊的環裡，用來扛櫃；

¹⁵ 諸個槓著不時穿佇櫃的環裡，毋通抽出來。

¹⁶ 著將我欲賞賜你做見證的石版下佇櫃的內面。

¹⁷ 「著用純金做約櫃的蓋，長一百十公分，闊六十六公分。

¹⁸ 著用金拍兩個天使基路伯，安佇蓋的雙頭，

¹⁹ 一頭一個；雙頭的基路伯，著及蓋連做歸塊。

²⁰ 兩個基路伯著面相對，向約櫃的蓋；翼搋高，遮約櫃的蓋。

²¹ 著將蓋安佇櫃的頂面，閣將我所欲賞賜你的石版下佇櫃內。

²² 我欲佇遐及你相會，閣欲佇約櫃頂面的蓋，兩個基路伯中間，對你講我欲命令你傳互以色列人所有的事。」

排獻祭的餅的桌

²³ 「你著用金合歡木做一塊桌，長八十八公分，闊四十四公分，高六十六公分。

²⁴ 著用純金包此塊桌，四圍鑲金線。

²⁵ 桌面四個邊各做七點五公分闊的墘，墘的周圍鑲金線。

²⁶ 你著做四個金環，安佇桌仔四支腳的角頭頂面。

²⁷ 安環的所在著倚近橫杆，通穿槓來扛桌。

²⁸ 著用金合歡木做兩支槓，用金包啲，通用來扛桌。

²⁹ 閣著用純金做貯香料的盤及𥐵仔，以及獻奠酒祭欲用的壺及杯。

³⁰ 桌頂著有獻祭的餅，排佇我的面前。」

燈台

³¹ 「你著用純金拍一個燈台；燈台的座、中柱、杯、萼、花，攏連做歸座。

³² 燈台的雙旁著伸出六支枝，一旁三支；

³³ 每一支有三個杯，形狀親像杏花，有萼有花；燈台的六支枝攏是按呢。

³⁴ 燈台柱有四個杯，形狀親像杏花，有萼及花。

³⁵ 著佇三對相連的枝下面及柱相接的所在做萼；燈台的六支枝攏是按呢。

³⁶ 許個萼及枝攏及柱連做一個，攏是用純金拍的。

³⁷ 著做七個燈盞，點𤏸，互伊相對照光；

³⁸ 閣著做燈剪及燈盤，攏用純金做。

³⁹ 著用三十五公斤的純金造燈台及諸個所有的器具。

⁴⁰ 你著照我佇山頂指示你的款式，細膩做諸個物件。」