出埃及記 24 - 現代台語譯本漢字版

立約的血

¹ 上主對摩西講：「你及亞倫、拿答、亞比戶，以及以色列七十個長老，著上來我遮，對遠遠的所在仆落去拜我。

² 只有摩西通就近上主，其他的人毋通倚來，人民嘛毋通及你做夥上山。」

³ 摩西落山，將上主所有的命令及規例攏講互人民聽；人民齊聲應講：「上主講的話，阮攏欲遵趁。」

⁴ 摩西將上主的話攏寫起來。隔日透早，摩西佇山腳起一座祭壇，照以色列十二支族，𫞼十二支石柱。

⁵ 伊閣派以色列的少年人去獻燒化祭，嘛獻牛互上主做平安祭。

⁶ 摩西將血的一半貯佇盆裡，另外一半灑佇壇頂。

⁷ 摩西閣提立約的冊讀互人民聽，人民應講：「上主講的話，阮攏欲遵趁。」

⁸ 摩西將盆裡的血灑佇人民的身上，講：「這就是立約的血；此個約是上主照伊的話及恁建立的。」

⁹ 摩西、亞倫、拿答、亞比戶，以及以色列七十個長老攏上去山裡。

¹⁰ 𪜶看見以色列的上帝；伊的腳下親像鋪藍寶石，親像天赫呢光亮透明。

¹¹ 上帝無出手傷害以色列的領袖；𪜶攏看見上帝，佇遐亦食亦飲。

摩西佇西奈山

¹² 上主給摩西講：「你上山來我遮，留𫢶遮，我欲將我所寫，欲教示人民的律法及誡命的石版互你。」

¹³ 摩西及伊的助手約書亞就出發；摩西𬦰上上帝的山。

¹⁴ 摩西給許個長老講：「恁𫢶遮等阮，聽候阮倒轉來。亞倫及戶珥有及恁做夥；民眾若有代誌，通去尋𪜶。」

¹⁵ 摩西上山；山有雲蓋啲。

¹⁶ 上主的榮光停佇西奈山；雲遮山六日久。第七日，上主對雲中叫摩西。

¹⁷ 以色列人看見上主的榮光顯現，親像火佇山頂啲𤏸。

¹⁸ 摩西上山入雲中；伊留佇山頂四十暝四十日。