出埃及記 23 - 現代台語譯本漢字版

正義及公道

¹ 「毋通散布謠言；毋通及歹人鬥孔作偽證。

² 毋通隨多數人做歹；佇訴訟，毋通偏倚大旁，作證歪曲正直。

³ 佇訴訟，毋通偏袒散赤人。

⁴ 「若抵著你的對敵的牛抑是驢迷路，一定著牽倒來交伊。

⁵ 若看著怨恨你的人的驢載傷重倒落去，毋通行開，著及伊做夥將驢載的物件放落來。

⁶ 「散赤人的案件，你毋通歪曲正義。

⁷ 毋通誣告人；毋通害死無罪及正直的人；因為我一定𣍐給歹人看做正直。

⁸ 毋通收賄賂，因為賄賂會互目金的人變做睛瞑，閣會歪曲正直的人的證詞。

⁹ 「毋通壓制寄居的人；因為恁曾寄居佇埃及，了解出外人的感受。」

安歇年及安歇日

¹⁰ 「六年內你著耕作，著收成農作物。

¹¹ 第七年，著互土地歇睏無耕作，你的人民中間的散赤人通食土地自然出產的物；𪜶食賰的通互野獸食。你的葡萄園及橄欖園嘛著按呢做。

¹² 「六日內你著做工，第七日著安歇，互牛驢歇睏，互奴隸及寄居的攏通回復元氣。

¹³ 「我命令恁的，恁著遵守；別個神明的名，毋通提起，嘛毋通講互人聽。」

三個重要的節期

¹⁴ 「一年三遍，你著守節服事我。

¹⁵ 著守除酵節，照我的命令，佇亞筆月所指定的日期，食無酵餅七日久，因為你佇此個月出埃及。你毋通空手來敬拜我。

¹⁶ 「你佇園裡勞碌栽種，收成頭水土產的時，著守收割節。 「你佇秋季收囥對園裡勞苦得著的農作物的時，著守收囥節。

¹⁷ 一年三遍，所有的查甫人著來敬拜至高的上主。

¹⁸ 「有酵的餅𣍐用得及牲禮做夥獻；節期所獻牲禮的油𣍐用得留到隔早起。

¹⁹ 「土地頭水上好的收成，著送到上主 — 你的上帝的厝。 「毋通用山羊母的奶煮伊的子。」

應允及警戒

²⁰ 「我欲差派使者佇路裡保護恁，導恁去我為著恁準備的地。

²¹ 恁佇伊的面前著切實遵行伊的命令；恁若違背伊，伊無欲赦免恁的過失；因為伊代表我。

²² 恁若真正聽趁伊的話，照我所命令恁的去做，恁的對敵就是我的對敵，我欲抵敵恁的敵人。

²³ 我的使者欲行佇恁的頭前，導恁去亞摩利、赫、比利洗、迦南、希未、耶布斯許個族的地；我欲給𪜶消滅。

²⁴ 恁毋通跪拜服事𪜶的神明，嘛毋通學𪜶的所做；著給許個神像全部毀壞，拍碎雕刻的柱像。

²⁵ 恁著服事上主 — 恁的上帝；我一定欲將米糧及水賞賜恁，閣互所有的病攏離開恁。

²⁶ 我嘛欲互恁境內的婦仁人攏會生育，𣍐流產，互恁食長歲壽。

²⁷ 「我欲佇恁的頭前顯出威嚴；恁無論去叨位，我欲互許個人民攏驚惶，互恁的對敵越轉身逃走。

²⁸ 我欲降瘟疫佇𪜶中間，給希未人、迦南人、赫人攏趕走。

²⁹ 毋拘我𣍐佇一年內將𪜶全部趕出去，才免土地荒廢，野獸增加煞傷害恁。

³⁰ 我欲為著恁漸漸將𪜶趕走，聽候恁人口增加，到會當承接彼個地做產業。

³¹ 我欲給恁定國界，對紅海到幼發拉底河，對曠野到地中海；我欲將彼個地徛起的人民交佇恁的手，互恁將𪜶攏趕出去。

³² 毋通及遐的人以及𪜶的神明立約。

³³ 毋通互𪜶住佇恁的地，才免𪜶引誘恁得罪我；恁若服事𪜶的神明，這欲成做害恁的羅網。」