出埃及記 21 - 現代台語譯本漢字版

對待奴隸的條例

¹ 上主對摩西講：「你著為人民定諸個規例：

² 「你若買希伯來人做奴隸，伊通服事你六年久，第七年伊會當免付贖金自由離開。

³ 伊若單身來，就單身離開；伊若有娶某來，伊的某就及伊做夥離開。

⁴ 伊的主人若給伊娶某，某給伊生子抑是查某子，某及子兒著歸主人；伊著單身出去。

⁵ 奴隸若明明講：『我疼我的主人、我的某，及我的子兒，無愛出去做自由人。』

⁶ 伊的主人就著導伊去審判官遐，互伊倚門抑是門徛，用鑽仔鑽伊的耳仔；伊就永遠服事主人。

⁷ 「若有人賣查某子做奴隸，查某囝仔贖身的條例及查甫奴隸無像。

⁸ 主人若娶伊，後來無合意，著准伊贖身；主人既然無守信用，就無權將伊賣互外族人。

⁹ 主人若給伊娶來做新婦，就著給伊當做查某子款待。

¹⁰ 主人的子若閣娶，彼個女奴隸的食、穿，及作某的權利，猶原𣍐用得減少。

¹¹ 若無對伊盡此三項義務，伊就通免付贖金自由離開。」

暴力的刑罰條例

¹² 「拍死人的，一定著互伊死。

¹³ 若毋是故意刣人，是上帝容允此件事發生，我就給恁設一個所在，互彼個人通走去遐。

¹⁴ 人若惡意用計謀害死人，就是走去到我的祭壇遐，嘛著給伊掠起來處死。

¹⁵ 「拍父母的，一定著互伊死。

¹⁶ 「拐誘人的，無論給賣去，抑是猶佇伊的手，一定著互伊死。

¹⁷ 「咒詛父母的，一定著互伊死。

¹⁸ 「人若冤家，此個用石頭抑是拳頭母拍彼個，無給拍死，毋拘互伊受傷倒佇眠床；

¹⁹ 若彼個人會閣起來，攑柺仔行路，此個拍伊的，通算無罪；毋拘著賠償伊𣍐當做工的損失，嘛著負責給伊醫到好。

²⁰ 「人若用棍摃伊的奴隸，奴隸無論是男的抑是女的，若連鞭死，主人一定著受刑罰；

²¹ 若過一兩日才死，伊就免受刑罰，因為奴隸是伊的財產。

²² 「人若相拍，傷害有身的婦仁人，致到流產，毋拘無別項的傷害，彼個人著照婦仁人的丈夫的要求，經過審判官的裁決，賠償。

²³ 若有其他的傷害，彼個人著用命賠命，

²⁴ 目睭賠目睭，嘴齒賠嘴齒，手賠手，腳賠腳，

²⁵ 燒傷賠燒傷，傷害賠傷害，拍傷賠拍傷。

²⁶ 「人若給伊的奴隸拍歹一蕊目睭，奴隸無論是男的抑是女的，主人著因為彼蕊目睭放伊自由。

²⁷ 若給奴隸拍斷一支嘴齒，奴隸無論是男的抑是女的，主人著因為彼支嘴齒放伊自由。」

所有人的責任

²⁸ 「牛若觸死查甫人抑是婦仁人，著用石頭給彼隻牛抌死，毋拘毋通食伊的肉；牛的主人算無罪。

²⁹ 彼隻牛若平時就會觸人，有人給牛的主人警告，主人竟然無給牛縛好勢，煞互彼隻牛觸死人，就著用石頭抌死彼隻牛；牛的主人嘛著死。

³⁰ 若是裁決會當用銀贖回彼個主人的性命，伊著照所裁決的錢額繳納。

³¹ 牛無論觸著人的子抑是查某子，著照此個規例辦理。

³² 牛若觸著奴隸，無論是男的抑是女的，牛的主人著用三百四十公克的銀互奴隸的主人；牛嘛著用石頭抌死。

³³ 「人若徙開井蓋，抑是開井無蓋蓋，煞害牛抑是驢仔跋落彼內面，

³⁴ 井的主人著用銀賠償牲生的主人；死的牲生歸井的主人。

³⁵ 「人的牛若觸死別人的牛，活的牛著賣掉，賣的價錢及死的牛攏著對半分。

³⁶ 主人若知伊的牛平時會觸人，竟然無給牛縛好勢，伊就著用牛賠牛；死的牛歸伊家己。」