出埃及記 20 - 現代台語譯本漢字版

十條誡

¹ 上帝吩咐諸個一切的話，講：

² 「我是上主 — 你的上帝，有將你對埃及地，做奴才的家導出來。

³ 「我以外你毋通有別個上帝。

⁴ 「毋通為家己雕刻偶像，無論天頂、地上，及地下水內所有的物，攏毋通造𪜶的像；

⁵ 毋通給𪜶跪拜，嘛毋通服事𪜶，因為我上主 — 你的上帝是要求全情服事的上帝；怨恨我的人，我追究𪜶的罪，對父到子，到三四代；

⁶ 疼我，遵守我誡命的人，我施恩互𪜶，直到千代。

⁷ 「毋通濫用上主 — 你的上帝的名；因為濫用上主的名的人，我上主一定無給伊當做無罪。

⁸ 「著會記得安歇日，守做聖日。

⁹ 六日內著拍拼做你所有的工課，

¹⁰ 毋拘第七日是上主 — 你的上帝設立的安歇日；此日，你及你的子、查某子、奴僕、女婢、牲生，以及寄居佇恁中間的人，攏毋通做工，

¹¹ 因為六日久，上主創造天、地、海，及彼中間的萬物，第七日就歇睏；所以上主賜福安歇日，設立此日做聖日。

¹² 「著孝敬你的老父、你的老母，通互你佇上主 — 你的上帝賞賜你的地久長徛起。

¹³ 「毋通害死人。

¹⁴ 「毋通姦淫。

¹⁵ 「毋通偷提。

¹⁶ 「毋通作偽證陷害你的厝邊。

¹⁷ 「毋通貪你的厝邊的厝，嘛毋通貪你的厝邊的某、奴僕、女婢、牛、驢，抑是你的厝邊任何的物件。」

人民驚惶

¹⁸ 所有的人民看著熠爁，聽著雷彈及哨角的聲，閣看著山頂淐煙，就愕愕惙，遠遠徛啲，

¹⁹ 對摩西講：「請你給阮講就好，阮一定欲聽；毋通互上帝對阮講話，阮才免死。」

²⁰ 摩西對人民講：「毋免驚；上帝降臨是欲考驗恁，互恁常常敬畏伊，才免恁犯罪。」

²¹ 人民遠遠徛啲；摩西行倚密雲，去上帝遐。

祭壇的條例

²² 上主對摩西講：「你著給以色列人按呢講：『恁已經看見我對天頂及恁講話。

²³ 毋通為家己造任何金抑是銀的神像來及我比並。

²⁴ 著用土給我起祭壇，佇彼頂面獻燒化祭及平安祭，以及你的牛、你的羊；所有敬拜我的所在，我欲來遐賜福你。

²⁵ 你若用石頭給我起祭壇，毋通用拍過的石頭起；石頭若用傢俬拍過，就受拍垃墋。

²⁶ 毋通造崎仔層行上我的祭壇，才免露現你的下體。』」