出埃及記 19 - 現代台語譯本漢字版

佇西奈山

¹ 以色列人出埃及地了後，佇第三個月的初一來到西奈的曠野。

² 𪜶離開利非訂來到西奈的曠野，就佇彼個山的對面紮營。

³ 摩西上山朝見上帝。 上主對山裡叫摩西，講：「你著對雅各的後代以色列人宣布：

⁴ 『我對埃及人所做的事，恁攏有看著；嘛知我按怎親像鷹鳥用翼載恁，導恁來歸佇我。

⁵ 今，恁若切實聽趁我的話，遵守我的約，就會佇列國中成做我的子民。全地攏是我的，

⁶ 毋拘恁是歸屬我的，是祭司的國度，聖潔的國民。你著將諸個話對以色列人講。』」

⁷ 摩西就去召集人民的長老，將上主命令的話攏給𪜶講。

⁸ 人民齊聲應講：「上主所講的阮攏欲遵趁。」摩西就將人民的話回復上主。

⁹ 上主給摩西講：「我欲佇密雲的中間來你遮，互人民聽見我及你講話，通永遠信任你。」 摩西將人民的話對上主講，

¹⁰ 上主閣給摩西講：「你去人民遐，吩咐𪜶佇今仔日及明仔載著潔淨家己，閣叫𪜶洗衫，

¹¹ 準備迎接第三日。第三日，上主欲佇所有人民的面前，降臨佇西奈山。

¹² 你著佇山的周圍給人民定界限，講：『恁著謹慎，毋通上山，嘛毋通侵犯山的邊界；若有人侵犯此個山的邊界，一定著互伊死；

¹³ 毋通給伊摸著，著用石頭給伊抌死，抑是用箭給射死。所有侵犯邊界的，無論是人抑是牲生，攏𣍐用得互伊活。』到哨角的聲拖長的時，𪜶才通上山。」

¹⁴ 摩西落山去人民遐，吩咐𪜶著潔淨家己，閣叫𪜶洗衫。

¹⁵ 伊對人民講：「著準備迎接第三日；毋通親近婦仁人。」

¹⁶ 到第三日清早，山頂雷公熠爁，烏雲密布，號角的聲大彈；營內的人民攏愕愕惙。

¹⁷ 摩西導人民離開營地，迎接上帝；𪜶攏徛佇山腳。

¹⁸ 歸個西奈山攏是火煙，因為上主佇火中降臨佇山頂；山的火煙親像火爐的煙淐高，歸個山大振動。

¹⁹ 哨角的聲愈彈愈大，摩西講話，上帝彈雷給伊應答。

²⁰ 上主降臨佇西奈山山頂；上主召摩西上山頂，摩西就𬦰上山。

²¹ 上主對摩西講：「你落去警戒人民，叫𪜶毋通超過界線欲來遮看上主，致到會有真多人死。

²² 親近上主的祭司嘛著潔淨家己，才免我給𪜶刑罰。」

²³ 摩西對上主講：「人民𣍐當上西奈山，因為你已經警戒阮，講：『著佇山的周圍設界限，給山分別作聖。』」

²⁴ 上主給伊講：「你落去，才閣及亞倫做夥上來；毋拘祭司及人民毋通超過界限欲來上主遮，才免我給𪜶刑罰。」

²⁵ 摩西就落山去人民遐，給𪜶宣布。