出埃及記 16 - 現代台語譯本漢字版

嗎哪及鵪鶉

¹ 以色列人全體會眾對以琳出發，佇離開埃及了後第二個月的十五日，來到以琳及西奈中間的汛的曠野。

² 𪜶佇遐埋怨摩西、亞倫。

³ 以色列人給𪜶講：「阮寧可佇埃及地死佇上主的手頭。彼時，阮有歸鼎的肉，有餅通食到飽。恁給阮導來到此個曠野，是欲互阮所有的會眾攏餓死是無！」

⁴ 上主對摩西講：「我欲對天落米糧互恁。𪜶逐個人逐日著出去拾彼一日的份；我欲按呢試驗𪜶，看𪜶有欲遵行我的命令抑無。

⁵ 到第六日，𪜶著準備兩日的食物，拾平時的重倍。」

⁶ 摩西、亞倫對以色列眾人講：「今暝恁就會知，導恁出埃及地的是上主。

⁷ 明仔早起恁會看見上主的榮耀，因為上主有聽著恁對伊的怨言。阮算什麼，恁竟然埋怨阮！」

⁸ 摩西閣講：「上主會互恁暗時有肉通食，早起時有米糧通食到飽；因為恁對上主的怨言，伊攏有聽著。阮算啥；恁毋是埋怨阮，是啲埋怨上主。」

⁹ 摩西給亞倫講：「你著叫以色列人全體會眾來到上主的面前，因為伊已經聽著恁的怨言。」

¹⁰ 亞倫抵啲對以色列人全體會眾講話的時，𪜶看見曠野有上主的榮光佇雲中顯現。

¹¹ 上主對摩西講：

¹² 「我已經聽見以色列人的怨言；你著給𪜶講：『到黃昏，恁欲有肉通食，早起時有米糧通食到飽，按呢恁就知我是上主 — 恁的上帝。』」

¹³ 暗頭仔，有鵪鶉飛來，蓋滿歸個營地；透早，營地四圍有一重露水。

¹⁴ 露水焦去，𪜶看著曠野的地面有細細圓圓的物，幼幼親像霜。

¹⁵ 以色列人看著，毋知是什麼，互相講來講去：「這是什麼？」 摩西給𪜶講：「這就是上主互恁食的米糧。

¹⁶ 上主按呢吩咐：恁著拾逐個人會當食的份量，一個人兩公升，照家內的人數去拾。」

¹⁷ 以色列人照按呢去做，有的拾多，有的拾少。

¹⁸ 到用器具量的時，拾多的無賰，拾少的嘛無欠；逐個人攏照𪜶食的份量去拾。

¹⁹ 摩西給𪜶講：「毋通將賰的留到隔早起。」

²⁰ 毋拘有人毋聽摩西的話，將賰的留到隔早起，就生蟲臭去；摩西就對𪜶發受氣。

²¹ 𪜶逐早起照逐個人食的份量去拾；日頭一下出，許個糧食就溶去。

²² 到第六日，𪜶拾重倍的份，逐個人四公升；全會眾的領袖將此項事給摩西報告。

²³ 摩西給𪜶講：「上主按呢講：『明仔載是安歇的日子，是上主聖的安歇日；恁愛烘的今仔日就先烘起來，愛煮的就今仔日煮起來；賰的，著收啲，留到隔早起。』」

²⁴ 𪜶就照摩西的吩咐給賰的食物留到隔早起；諸個食物無臭去，嘛無生蟲。

²⁵ 摩西閣講：「恁今仔日就食諸個，因為今仔日是上主的安歇日；今仔日恁佇野地尋無米糧。

²⁶ 六日，恁通去拾，第七日是安歇日，此日恁無食物通拾。」

²⁷ 第七日，有人出去拾，尋攏無。

²⁸ 上主對摩西講：「恁毋肯遵守我的命令及教示，欲到底時？

²⁹ 恁著知，上主已經將安歇日賜互恁，所以第六日伊互恁兩日的米糧，第七日逐個人著𫢶佇家己的所在，毋通出去。」

³⁰ 人民就佇第七日安歇。

³¹ 以色列人將此個物叫做嗎哪；伊親像芫荽的籽，色緻是白的，滋味親像摻蜜的薄餅。

³² 摩西講：「上主按呢吩咐：『著貯兩公升淀淀的嗎哪，留互恁的後代。互𪜶看我導恁出埃及的時佇曠野互恁食的米糧。』」

³³ 摩西給亞倫講：「你提一個甕仔，貯兩公升淀淀的嗎哪，囥佇上主的面前，留互咱的後代。」

³⁴ 亞倫照上主吩咐摩西的話，將嗎哪留啲做見證。

³⁵ 以色列人食嗎哪攏總四十年久，一直到𪜶來佇有人住的所在。𪜶食嗎哪，直到𪜶來到迦南地的邊界。

³⁶ 當時量物件標準的單位是二十公升。