出埃及記 15 - 現代台語譯本漢字版

摩西的歌

¹ 彼時，摩西及以色列人對上主唱此首詩歌： 我欲對上主唱歌，因為伊大勝利； 伊將戰馬及馬兵捙落海。

² 上主是我的氣力，我欲唱歌稱讚， 伊給我解救。 伊是我的上帝，我欲稱讚伊； 伊是我列祖的上帝，我欲尊崇伊。

³ 上主是戰士； 上主是伊的稱呼。

⁴ 埃及王的戰車及軍兵，上主給𪜶㧒佇海裡； 埃及王特選的軍官，攏沉落紅海。

⁵ 大湧吞滅𪜶； 𪜶親像石頭沉到深的所在。

⁶ 上主，你的正手有無比的權能； 上主，你的正手拍碎對敵。

⁷ 你發出大威力，捙倒許個起來攻擊你的； 你發出大受氣，燒毀𪜶親像燒麥稿。

⁸ 你鼻孔的氣互水淐高， 互大水疊歸堆； 海真深的水堅凍。

⁹ 對敵講：「我欲追𪜶，欲趇著𪜶； 我欲分戰利品來足我的心願； 我欲拔刀給𪜶消滅。」

¹⁰ 你一下歕風， 海水就給𪜶淹死； 𪜶親像鉛沉落大水。

¹¹ 上主啊，眾神明叨一個會當及你比？ 叨一個親像你神聖威嚴， 通驚畏，受稱讚，行奇事？

¹² 你伸出正手， 地就給𪜶吞滅。

¹³ 你用慈愛導你救贖的子民； 你用權能導𪜶進入你聖的所在。

¹⁴ 列邦聽見就愕愕惙； 住佇非利士地的互痛苦包圍。

¹⁵ 彼時，以東的族長驚惶； 摩押的英雄皮皮惙； 住佇迦南地的驚甲破膽。

¹⁶ 卬愕驚惶包圍𪜶； 上主，因為你的大權能， 𪜶親像石頭𣍐振動， 聽候你的子民經過， 聽候你贖回的子民過去。

¹⁷ 你欲導𪜶入去你產業的山，給𪜶栽培； 上主，遐是你為家己準備欲徛起的所在， 主啊，就是你的手所建立的聖所。

¹⁸ 上主欲作王，直到永遠。

美莉安的歌

¹⁹ 埃及王的戰馬、戰車，及馬兵跋落海的時，上主互海水回復原狀給𪜶淹密；毋拘以色列人佇海中行焦地。

²⁰ 亞倫的大姊，女先知美莉安，手提玲瓏鼓；眾婦女嘛提玲瓏鼓，隨伊那拍鼓那跳舞。

²¹ 美莉安回應，唱講： 恁著唱歌稱讚上主，因為伊大勝利； 伊將戰馬及馬兵捙落海。

苦水變甘

²² 摩西導以色列人對紅海向前行，到書珥的曠野；𪜶佇曠野行三日，尋無水。

²³ 到瑪拉的時，瑪拉的水會苦，𣍐飲得；𪜶給彼個所在叫做瑪拉。

²⁴ 人民埋怨摩西，講：「阮欲飲啥？」

²⁵ 摩西就求叫上主。上主指示伊一欉樹仔，伊將彼欉樹仔㧒佇水裡，水就變甘。 上主佇遐為著𪜶定規例及命令，佇遐給𪜶考驗。

²⁶ 上主講：「恁若注意聽我上主 — 恁的上帝的話，做我看做正直的事，真正聽趁我的誡命，遵守我所有的規例，我就𣍐互埃及人致著的病佇恁的身上發生，因為我是醫治恁的上主。」

²⁷ 𪜶到以琳，佇遐有十二個水泉，七十欉的棕樹；𪜶就佇遐的水邊紮營。