出埃及記 14 - 現代台語譯本漢字版

過紅海

¹ 上主對摩西講：

² 「你著吩咐以色列人越倒轉，佇密奪及海中間的比‧哈希錄頭前，巴力‧洗分對面的海邊紮營。

³ 埃及王會想講以色列人迷路，行𣍐出曠野。

⁴ 我欲互埃及王的心硬，追趇恁；毋拘我欲拍敗埃及王及伊的全軍，顯出我的榮光。按呢，埃及人就知我是上主。」以色列人就照按呢做。

⁵ 有人來給埃及王報告：「以色列人逃走啦！」埃及王及伊的人臣就改變心意，講：「咱哪會做此款代誌？是按怎欲放彼個民族離開無閣服事咱？」

⁶ 埃及王就準備戰車，導伊的軍兵做夥去；

⁷ 伊導埃及所有的戰車，包括六百台特選的戰車出去，逐台車攏有戰車長。

⁸ 上主互埃及王的心硬，追趇以色列人。以色列人勇敢大膽離開的時，

⁹ 埃及人追趇𪜶；埃及王所有的戰馬、戰車、馬兵，及軍隊，佇比‧哈希錄頭前，巴力‧洗分對面的海邊，以色列人紮營的所在，趇著𪜶。

¹⁰ 埃及王倚近的時，以色列人一下看著埃及人趇倚來，就真驚，哀求上主。

¹¹ 𪜶給摩西講：「是埃及無墓地，你才導阮出來死佇曠野是無？你是按怎按呢對待阮，導阮出埃及？

¹² 阮佇埃及豈無給你講『插阮，出在阮服事埃及人』？阮寧可服事埃及人，比死佇曠野較好。」

¹³ 摩西給人民講：「毋免驚，徛互在，看上主今仔日按怎解救恁。恁今仔日看著的埃及人，一定永遠𣍐閣看著。

¹⁴ 上主欲為恁交戰；恁著安靜。」

¹⁵ 上主對摩西講：「你是按怎對我喉叫？著叫以色列人向前行。

¹⁶ 你攑柺仔伸手指海，給海分開；以色列人會佇海中行焦地。

¹⁷ 我欲互埃及人的心硬，𪜶欲隨恁落去；我欲拍敗埃及王及伊的全軍、戰車、馬兵，顯出我的榮耀。

¹⁸ 我拍敗埃及王及伊的戰車、馬兵，得著榮耀的時，埃及人就知我是上主。」

¹⁹ 上帝的使者本來行佇以色列大隊的頭前，彼時徙去𪜶後面，雲柱嘛對𪜶的頭前徙去後面，

²⁰ 來佇埃及營及以色列營的中間；埃及營互雲罩啲變做烏暗，毋拘以色列營暝時有光；兩旁歸暝𣍐當接近。

²¹ 摩西伸手指海，上主互真強的東風吹歸暝，互海水退去，海成做焦地，水分做兩旁。

²² 以色列人落海中行焦地，水佇𪜶的雙旁成做牆壁。

²³ 埃及人追趇𪜶；埃及王所有的戰馬、戰車，及馬兵攏隨𪜶落去海中。

²⁴ 到天欲光的時，上主對雲柱及火柱中間俯落看埃及的軍隊，拍亂𪜶的隊伍，

²⁵ 互𪜶的戰車的輪仔咬牢啲，行𣍐去；埃及人就講：「咱著趕緊走，離開以色列人，上主為著𪜶來拍咱。」

²⁶ 上主給摩西講：「你伸手指海，互水倒轉來淹埃及人、𪜶的戰車，及𪜶的馬兵。」

²⁷ 摩西就伸手指海；到天一下光，海水回復原狀。埃及人逃走，毋拘上主將𪜶捙落海。

²⁸ 海水流倒轉，給戰車及馬兵淹密；趇以色列人落去海中的埃及王全軍，無一個活啲。

²⁹ 總是以色列人佇海中行焦地，水佇𪜶的雙旁成做牆壁。

³⁰ 彼日，上主按呢解救以色列人脫離埃及人的手；以色列人看著埃及人攏死佇海邊。

³¹ 以色列人看著上主用大氣力對付埃及人所做的事，就敬畏上主，閣信服上主及伊的僕人摩西。